កម្មសិក្សាការី និង និស្សិត ជិត ២០ នាក់ នៅជប៉ុន ត្រូវបានជម្លៀសទៅកាន់​ទីកន្លែងសុវត្ថិភាព

អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​អះអាង​ថា មាន​កម្មសិក្សាការី និង​និស្សិត ប្រមាណ​ជិត ២០ នាក់ ស្នាក់នៅ​តំបន់​រងគ្រោះ​ដោយ​គ្រោះ​រញ្ជួយ​ដី​នៅ​ប្រទេស​ជប៉ុន ត្រូវ​បាន​ជម្លៀស​ទៅ​កាន់​ទីកន្លែង​សុវត្ថិភាព​ហើយ។ ក្រសួងការងារ ក៏ដូចជា​ស្ថានទូតកម្ពុជាប្រចាំនៅប្រទេស​ជប៉ុន បាន​កំពុង​បន្ត​តាម​ដាន​យ៉ាង​យកចិត្តទុកដាក់​ចំពោះ​សុខ​សុវត្ថិភាព​របស់​ពលរដ្ឋ​ខ្មែរ​នៅ​តំបន់​កើតហេតុ​ជាទីបំផុត។

លោក កត្តា អ៊ន រដ្ឋលេខាធិការ​ និងជាអ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​មាន​ប្រសាសន៍​នៅ​រសៀល​ថ្ងៃ​ទី ០២ មករា នេះ​ថា «គិត​ត្រឹម​ម៉ោង ១២ ថ្ងៃត្រង់ ថ្ងៃ​ទី ០២ មករា ម៉ោង​នៅ​កម្ពុជា មាន​កម្មសិក្សាការី​ពលករ​ជំនាញ និស្សិត និង​សហគមន៍​ខ្មែរ​តំបន់​មាន​ការ​រញ្ជួយ​ដី​រងគ្រោះ​មហន្តរាយ​ដោយ​រលក​យក្ស​ស៊ូណាមិ គឺ​មាន​សុវត្ថិភាព ដោយ​កម្មសិក្សាការី ១១ នាក់ និង​និស្សិត​ចំនួន ៨ នាក់ ត្រូវ​បាន​ជម្លៀស​ទៅ​កាន់​ទីកន្លែង​សុវត្ថិភាព»។

លោក​បាន​បន្ត​ថា ទីភ្នាក់ងារ​ឧតុនិយម​ជប៉ុន បាន​ដក​ការ​ព្រមាន​រលក​យក្ស​ស៊ូណាមិ ពី​តំបន់​រងគ្រោះ​ដោយសារ​រញ្ជួយ​ដី​នេះ។ ដូច្នេះ ក្រសួង​ការងារ បាន​សហការ​ជាមួយ​ស្ថានទូត​កម្ពុជា​ប្រចាំ​ជប៉ុន កំពុង​បន្ត​តាមដាន​ចំពោះ​សុវត្ថិភាព​របស់​ពលរដ្ឋ​ខ្មែរ​នៅ​តំបន់​កើតហេតុ​ជាទីបំផុត។

លោក កត្តា អ៊ន បាន​អំពាវនាវ​ដល់​កម្មសិក្សាការី​ពលករ​ជំនាញ និស្សិត និង​សហគមន៍​ខ្មែរ​នៅ​តំបន់​មាន​ការ​រញ្ជួយ​ដី​រងគ្រោះ​មហន្តរាយ​ដោយ​រលក​យក្ស​ស៊ូណាមិ ប្រសិនបើ​មាន​រង​ផល​ប៉ះពាល់​ណាមួយ សូម​ទំនាក់ទំនង​មក​ស្ថានទូត​កម្ពុជា ឬ អនុព័ន្ធ​ការងារ​កម្ពុជា ប្រចាំ​នៅ​ប្រទេស​ជប៉ុន និង​ក្រសួង​ការងារ និង​បណ្ដុះបណ្ដាល​វិជ្ជាជីវៈ ដើម្បី​អន្តរាគមន៍ និង​ជួយ​ឲ្យ​បាន​ទាន់​ពេលវេលា។

យោង​តាម​សេចក្ដីជូនដំណឹង​របស់​ស្ថានទូត​កម្ពុជា​ប្រចាំ​នៅ​ប្រទេស​ជប៉ុន ចុះ​ថ្ងៃ​ទី ០២ មករា បាន​ឲ្យ​ដឹង​ថា កាលពី​ថ្ងៃ​ទី ១ ខែ​មករា ឆ្នាំ ២០២៤ មាន​គ្រោះ​រញ្ជួយ​ដី​កម្រិត ៧.៦ រ៉ិចទ័រ អាច​បង្ក​ហានិភ័យ នៃ​គ្រោះ​មហន្តរាយ​ដោយ​រលក​យក្ស​ស៊ូណាមិ នៅ​តាម​តំបន់​ជាប់មាត់​សមុទ្រ នៃ​ខេត្ត Ishikawa ដែល​រង​ផល​ប៉ះពាល់​ច្រើន​ជាងគេ និង​បណ្ដា​ខេត្ត​ក្បែរ​ខាង ដូចជា Niigata, Toyama, Yamagata, Fukui និង Hyogo ជាដើម។

ក្នុង​គ្រោះ​រញ្ជួយ​ដី​នេះ មាន​ចំនួន​អ្នក​ស្លាប់​យ៉ាងហោចណាស់ ២៤ នាក់ (មិន​ទាន់​បញ្ជាក់​អត្តសញ្ញាណ) នៅ​ខេត្ត Ishikawa និង​អ្នករបួស​ជាង ៦០ នាក់​ទៀត ក្នុង​ខេត្ត Ishikawa, Niigata, Fukui, Toyama និង Gifu ខណៈ​អគារ​ជាង ១០០ ខ្នង នៅ​ខេត្ត Ishikawa ត្រូវ​បាន​រងគ្រោះ​ដោយ​អគ្គិភ័យ និង​អគារ​ជាច្រើន​ទៀត​បាន​ដួល​រលំ។

រហូតមកដល់​ពេលនេះ មាន​ប្រជាជន​ជាង ៤៥ ០០០ គ្រួសារ បាន​ជម្លៀស​ទៅ​កាន់​ទី​សុវត្ថិភាព ដែល​ក្នុង​ចំណោម​គ្រួសារ​ទាំងនេះ នៅ​តំបន់​ខ្លះ មិន​មាន​ថាមពល​អគ្គិសនី​សម្រាប់​ប្រើប្រាស់​ទេ។

យ៉ាងណាមិញ ស្ថានទូត​កម្ពុជា មិនបាន​បញ្ជាក់​ថា មាន ឬ មិន​មាន​ពលរដ្ឋ​ខ្មែរ​រង​ផល​ប៉ះពាល់​នៅ​ក្នុង​គ្រោះ​រញ្ជួយ​ដី​នេះ​នៅឡើយ​ទេ បើ​គិត​មកដល់ពេលនេះ។ ទោះជា​មិន​ទាន់​មាន​ការ​ប៉ះពាល់​ដល់​ពលរដ្ឋ​ក៏ដោយ តែ​ស្ថានទូត​កម្ពុជា​ប្រចាំ​នៅ​ប្រទេស​ជប៉ុន បាន​បន្ត​អំពាវនាវ​ប្រជាពលរដ្ឋ​ខ្មែរ ដែល​កំពុង​រស់នៅ​ក្នុង​តំបន់​រងគ្រោះ​ខាងលើ មាន​ការ​ប្រុងប្រយ័ត្ន​ខ្ពស់ និង​បន្ត​អនុវត្ត​តាម​ការ​ណែនាំ​របស់​អាជ្ញាធរ​ជប៉ុន។ ក្នុង​​ករណី​ទទួល​បាន​ព័ត៌មាន​អំពី​ប្រជាពលរដ្ឋ​ខ្មែរ​ដែល​រង​ផល​ប៉ះពាល់​ក្នុង​គ្រោះ​រញ្ជួយ​ដី​នេះ ស្ថានទូត​កម្ពុជា បាន​ប្រាប់​ពលរដ្ឋ ត្រូវ​ជូនដំណឹង​មក​ស្ថានទូត​ជាបន្ទាន់​តាមរយៈ​ហ្វេស​ប៊ុក​ស្ថានទូត Royal Embassy of Cambodia in Japan ឬ ទូរស័ព្ទ​លេខ ០៨០ ៤៦៨៩ ៩៣៧៤។

តាម​ទិន្នន័យ​គិត​ត្រឹម​ឆ្នាំ ២០២២ របស់​ក្រសួងយុត្តិធម៌​ជប៉ុន ពលរដ្ឋ​ខ្មែរ​រស់នៅ​ក្នុង​តំបន់​រងគ្រោះ​ខាង​លើ រួមមាន ៖ ចំនួន ៨២ នាក់ នៅ​ខេត្ត Ishikawa, ២៧៩ នាក់ នៅ​ខេត្ត Fukui, ២០៨ នាក់ នៅ​ខេត្ត Nagano, ៧៩១ នាក់ នៅ​ខេត្ត Gifu, ១៥២ នាក់ នៅ​ខេត្ត Toyama និង​ចំនួន ១១៧ នាក់ នៅ​ខេត្ត Niigata៕

អត្ថបទ ៖ សំអឿន