ហ្វូងសត្វប្រជៀវល្អាងភ្នំសំពៅ អ្នកស្រុក​ហៅ​កង​ទ័ព​​ប្រជៀវដ៏ក្លាហាន ទាញកំណើនទេសចរណ៍​កាន់​តែ​ច្រើន

ប៉ុន្មានខែចុងក្រោយចុងឆ្នាំ២០២៣ គេសង្កេតឃើញមានភ្ញៀវបរទេសសម្រុកមកទស្សនាហ្វូងសត្វប្រជៀវនៅភ្នំសំពៅ កាន់តែមានកំណើនគួរឲ្យកត់សម្គាល់ ដែលបានផ្តល់សេដ្ឋកិច្ចដល់ប្រជាពលរដ្ឋនៅតំបន់នោះកាន់តែប្រសើរឡើង តាម​រយះ​ការលក់ដូរម្ហូបអាហារនំចំណីរួមទាំងវត្ថុអនុស្សាវរីយ៍ផ្សេងៗផង។

អាជីវករជាអ្នកលក់ដូរនៅតាមជើងភ្នំជិតល្អាងប្រជៀវបានលើកឡើងដូចៗគ្នាថា ប្រហែលជា២-៣ ខែនេះ​ពួកគាត់​រកកម្រៃបានគ្រាន់បើ ដោយសារមានភ្ញៀវបរទេសមកកម្សាន្តច្រើនជាងមុនមិនទាន់គិតពីភ្ញៀវក្នុងស្រុកជាច្រើនទៀតផង។

កញ្ញា សុធារ៉ា ក្នុងចំណោមអាជីវករលក់ដូរជាច្រើនទៀតបានឲ្យដឹងថា រូបនាងបានលក់ម្ហូបអាហារនិងភេសជ្ជ:យូរឆ្នាំហើយ ប៉ុន្តែពុំសូវឃើញមានភ្ញៀវជាជនបរទេសច្រើនដូចពេលនេះទេហើយលក់ក៏មិនសូវដាច់។ តែប៉ុន្មានខែមុននេះ មានជនបរទេសច្រើនជាពិសេសកាលពីរដូវមានភ្លៀងច្រើន ពេលនោះនាងលក់ដាច់ខ្លាំង។

អ្នកភូមិដែលមានវ័យចាស់ៗបានលើកឡើងថា ទស្សនីយភាពហ្វូងសត្វប្រជៀវរាប់លានក្បាល ដែលហោះចេញពីល្អាងភ្នំ ត្រូវបានអ្នកស្រុកសម័យមុនតែងតែហៅហ្វូងប្រជៀវទាំងនោះថា ជាកងទ័ពប្រជៀវដ៏ក្លាហានពីព្រោះការហោះហើររបស់ហ្វូងសត្វប្រជៀវទាំងនោះ ប្រៀបបានទៅនឹងចរន្តទឹកហូរលើផ្ទៃអាកាសនៅចន្លោះម៉ោង ៥:៣០ នាទី ដល់ម៉ោង ៦:១៥ នាទីល្ងាច។ បច្ចុប្បន្នតំបន់នេះត្រូវបានមន្ទីរទេចរណ៍ដាក់បញ្ចូលជាប្រភេទវប្បធម៌ប្រវត្តិសាស្ត្រ ដែលមានទីតាំងស្ថិតក្នុង ភូមិសំណាញ់ ឃុំភ្នំសំពៅ ស្រុកបាណន់ មានចម្ងាយ ១៣ គីឡូម៉ែត្រពីទីរួមខេត្ត ដែលមានសក្តានុពលជាច្រើនមានដូចជា ទេសភាពភ្នំ ទីសក្ការៈបូជា ល្អាងធម្មជាតិ ល្អាងប្រជៀវ ចម្លាក់ពុទ្ធប្បវត្តិ ប្រវត្តិសាស្ត្រខ្មែរក្រហមជាដើម។

លោក ហម អរុណ អនុប្រធាននៃមន្ទីរទេសចរណ៍ខេត្តបាត់ដំបង​បានឲ្យដឹងថា ភ្នំនេះមានកំពស់ប្រមាណ ១០០ ម៉ែត្រ កាំជណ្តើរឡើងចំនួន ១០៣០ កាំ។ នៅលើកំពូលភ្នំមានវត្តមួយឈ្មោះថា វត្តគិរីរម្យ និងមានល្អាងរូងភ្នំជាច្រើនសរុបទាំងអស់ចំនួន ១២ រួមមាន៖១.ល្អាងផ្កាស្លា ២.ល្អាងគក់ទ្រូង ៣.ល្អាងខ្យល់ ៤.ល្អាងតែងខ្លួន ៥.ល្អាងល្ខោន ៦.ល្អាងជ្រៃ ៧.ល្អាងពេជ្រ ៨.ល្អាងខ្វែង ៩.ល្អាងប្រេង ១០.ល្អាងស្ថានីយឬល្អាងធំ ១១.ល្អាងក្បាលខ្មោច ១២.ល្អាងប្រចៀវ។ ប៉ុន្តែល្អាងដែលភ្ញៀវនិយមចូលទស្សនាមានតែល្អាងផ្កាស្លា និងល្អាងល្ខោន។

លោកបន្តទៀត​ថា ខេត្តបាត់ដំបងក្រៅពីតំបន់គោលដៅភ្នំសំពៅ ក៏មានគោលដៅទេសចរណ៍ជាច្រើននិងមានសន្តិសុខសុវត្ថិភាពល្អ ទើបពីមួយឆ្នាំទៅមួយឆ្នាំកំណើនភ្ញៀវទេសចរហក់ឡើងជាបន្តបន្ទាប់។ ចំនួនភ្ញៀវទេសចរអន្តរជាតិទៅទស្សនានៅរមណីយដ្ឋានភ្នំសំពៅមានជាមធ្យមប្រមាណជាង ១,៥០០ នាក់ក្នុងមួយខែ។ ចំពោះរដូវមានភ្លៀងច្រើនចន្លោះ​ខែ​មករា ដល់មីនា មានរហូតដល់ជាង ៣,០០០ នាក់ក្នុងមួយខែ។

ខេត្តបាត់ដំបង​មាន​រមនីយដ្ឋានទេសចរណ៍ និងគោលដៅទេសចរណ៍ក្នុងខេត្តបាត់ដំបងនាពេលបច្ចុប្បន្នរួមមាន ១-រមណីយដ្ឋាន ប្រាសាទបាណន់ ២-រមណីយដ្ឋាន ភ្នំសំពៅ ៣-រមណីយដ្ឋាន ប្រាសាទឯកភ្នំ ៤-រមណីយដ្ឋាន អាងកំពីងពួយ ៥-រមណីយដ្ឋាន ចំការស្វាយ ៦-រមណីយដ្ឋាន ស្ទឹងថ្មដាចំការធុរេន ៧-រមណីយដ្ឋាន ទឹកធ្លាក់ ៥៣ ភ្នំព្រឹក ៨- រមណីដ្ឋាននគរជុំភ្នំព្រឹក ៩-រមណីយដ្ឋាន ភ្នំកំពូល ១០-រមណីយដ្ឋាន ចំការធុរេនអូរតង ១១-រមណីយដ្ឋាន វាល​ចម្បាំង ខេមសាយ ១២-សហគមន៍អេកូទេសចរណ៍ទឹកធ្លាក់អូរជាំ ១៣-សហគមន៍អេកូទេសចរណ៍ព្រែកទាល់ ១៤-មណ្ឌលកម្សាន្តឡូរីជើងភ្នំបាណន់ ១៥-រមណីយដ្ឋាន ស្ទឹងក្រញូង ១៦-គោលដៅទេសចរណ៍ ស្ទឹងថ្វាក ១៧-រមណីយដ្ឋានចំការមៀន ១៨-រមណីយដ្ឋានអូរទទា ត្រជាក់ចិត្ត ១៩-គោលដៅទេសចរណ៍ វត្តភ្នំចំបាំង ២០-មណ្ឌលកម្សាន្ត សួនទឹកសុភមង្គល ២១-ផ្ទះផ្កា Begonia ២២- សួន ផ្កា ច្បារមាត់ស្ទឹង ២៣-សួនផ្កា ភ្នំសំពៅ ២៤-សួនផ្កាឈើទាល រួមនឹងតាមវត្តអារាមដែលជាគោលដៅទេសចរណ៍ទូទាំងខេត្តផងដែរ៕

អត្ថបទ៖ សៅ សារិទ្ធ