ព័ត៌មានជាតិ

រដ្ឋចំណាយថវិកាជាង ៥១ពាន់លានរៀល ឧបត្ថម្ភដល់កម្មការិនីសម្រាលកូន នៅឆ្នាំ២០២៣

បានផុស

១២ ខែ មុន

នៅ

ថ្ងៃពុធ ៣ មករា ២០២៤

ដោយ

នៅក្នុងឆ្នាំ២០២៣ រាជរដ្ឋាភិបាលបានបើកប្រាក់ឧបត្ថម្ភចំនួនជាង ៥១ពាន់លានរៀលជូនដល់កម្មការិនីប្រមាណជាង១០ម៉ឺននាក់ ទាំងដំណាក់កាលមុន ក្រោយពេលសម្រាល និងចាក់វ៉ាក់សាំងកូន ដើម្បីជួយសម្រាលបន្ទុកជីវភាពរស់នៅរបស់បងប្អូនកម្មករនិយោជិតឱ្យកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបើកផ្តល់ប្រាក់ឧបត្ថម្ភរបស់រាជរដ្ឋាភិបាលជូនដល់កម្មការិនីសម្រាលកូននេះធ្វើឡើងតាមរយៈប.ស.ស។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈបានមានប្រសាសន៍នៅព្រឹកថ្ងៃទី០៣ មករានេះថា នៅក្នុងឆ្នាំ ២០២៣ ប.ស.ស. បានបើកផ្តល់ប្រាក់ឧបត្ថម្ភរាជរដ្ឋាភិបាលចំនួន ៥១ពាន់ ៦៦២លានរៀល ដល់កម្មការិនីសរុបចំនួន ១០៥១៩២ នាក់ ដែលមានកូនចំនួន ៩២ ១៣៨នាក់ ទាំងដំណាក់កាលមុន ក្រោយពេលសម្រាល និងចាក់វ៉ាក់សាំងកូន។

លោកបានបញ្ជាក់ថា ក្នុងនោះចំនួនស្រ្តីសម្រាលមានចំនួន៦២៧៧០នាក់ កូនសរុប៦៣២៣៤នាក់ ស្រ្តីសម្រាលកូនភ្លោះពីរចំនួន ៤៣៣នាក់ ភ្លោះបី ៤នាក់ និងភ្លោះបួន ចំនួន១នាក់។

គួរបញ្ជាក់ថា កម្មវិធីឧបត្ថម្ភសាច់ប្រាក់ជូនកម្មករនិយោជិតស្ត្រីមានផ្ទៃពោះ និងកុមារក្រោមអាយុ ២ ឆ្នាំនេះ ក្នុងនោះ មុនពេលសម្រាលកូនកម្មករនិយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភ ដោយកូន ១ ទទួលបានថវិកា ៨០ ម៉ឺនរៀល កូនភ្លោះពីរទទួលបាន ១ លាន ២ សែនរៀល កូនភ្លោះបីទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពីសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

ក្រោយពេលសម្រាលកូនកម្មករនិយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ១០ លើក ដោយ ១ លើកទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាព ក្រោយពេលសម្រាលកូន និង ៧ លើកទៀត នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ៕

អត្ថបទ ៖ សំអឿន

