មន្ទីរព័ត៌មានខេត្តកំពង់ឆ្នាំង ប្រកាសឱ្យអ្នកសារព័ត៌មានទូទាំងខេត្តរួសរាន់ចុះឈ្មោះឱ្យបានគ្រប់អង្គភាព

មន្ទីរព័ត៌មានខេត្តកំពង់ឆ្នាំង បានចេញលិខិតស្នើដល់អ្នកសារព័ត៌មានគ្រប់អង្គភាព ភ្នាក់ងារសារព័ត៌មានទាំងអស់ខេត្តកំពង់ឆ្នាំង ប្រញាប់ចុះឈ្មោះក្នុងបញ្ជីគ្រប់ៗគ្នា ដើម្បីងាយស្រួលធ្វើបច្ចុប្បន្នភាព បញ្ជូនទៅក្រសួងព័ត៌មាន។ នេះបើតាមលិខិតរបស់មន្ទីរព័ត៌មានខេត្តកំពង់ឆ្នាំង ចុះថ្ងៃទី០២ ខែមករា ឆ្នាំ២០២៤ នេះ។

តាមលខិតខាងលើដែលបានដាក់ចេញនេះ អ្នកសារព័ត៌មានទាំងអស់ដែលនៅខេត្តកំពង់ឆ្នាំង ត្រូវចុះឈ្មោះឱ្យបានគ្រប់គ្នា អាជីវកម្ម និងភ្នាក់ងារ របស់អង្គភាពសារព័ត៌មាន នៅការិយាល័យព័ត៌មាន និងសោតទស្សន៍ នៃមន្ទីរព័ត៌មានខេត្តកំពង់ឆ្នាំង ដើម្បីឱ្យមន្ទីរមូលដ្ឋានធ្វើបច្ចុប្បន្នភាព និងស្រង់ស្ថិតិពីចំនួនភ្នាក់ងារសារព័ត៌មានប្រចាំខេត្តកំពង់ឆ្នាំងឱ្យបានច្បាស់លាស់ក្នុងការធ្វើរបាយការណ៍ទៅកាន់ក្រសួងព័ត៌មាន។

អ្នកសារព័ត៌មាននៅខេត្តកមពង់ឆ្នាំង ត្រូវភ្ជាប់ ឬ Scan ឯកសារភ្ជាប់មកជាមួយនូវ៖
១. លិខិតឧទ្ទេសនាម ពីអគ្គនាយកទូរទស្សន៍ ចាងហ្វាង កាសែត គេហទំព័រ TV Online និងទស្សនាវដ្តី ។ល។
២. បណ្ណសម្គាល់ខ្លួន ឬ កាតសម្គាល់ខ្លួនដែលចេញដោយអង្គភាពសារព័ត៌មាន។
៣. ឯកសារផ្សេងៗ ប្រសិនបើមាន៕