អ្នកជំនាញ បង្ហើបពីដំណើរការវិវត្តន៍ថ្មី​នៃវិស័យចលនទ្រព្យក្នុងឆ្នាំ ២០២៤

អ្នកជំនាញ មានសុទិដ្ឋិនិយមថា វិស័យអចលនទ្រព្យ នៅក្នុងឆ្នាំ ២០២៤នេះ អាចនឹងមានកំណើនលើសពីឆ្នាំ ២០២៣ តិចតួច ហើយក៏ជាឱកាសដ៏ល្អសម្រាប់អ្នកទិញទុកចំណេញរយៈពេលវែង និងអ្នកមានលុយសុទ្ធក្នុងដៃ ឬអ្នកមានរំហូរ​សាច់ប្រាក់ពីអាជីវកម្មរឹងមាំ។

លោក ហាក់ គឹមថុង ប្រធានក្រុមហ៊ុន Viniyuk Brokerage Solution បានលើកឡើងថា ឆ្នាំនេះ នៅតែ​មិនមែនជាឆ្នាំដែលទិញអចលនទ្រព្យបានចំណេញភ្លាមៗ ដូចមុនជំនាន់កូវីដនោះទេ  ពោលគឺទាមទារ​ឱ្យអ្នក​វិនិយោគត្រូវមានស្ថានភាពហិរញ្ញវត្ថុល្អ និងអាចទិញទុករយៈពេលយូរ ដើម្បីទទួលបានផលចំណេញ។ លោកបានបន្តដូច្នេះថា« ប្រជាជនយើងគួរតែស៊ាំនឹងស្ថានភាពនេះ ព្រោះការវិនិយោគអចលនវត្ថុដែលសុវត្ថិភាព គឺជាការវិនិយោគដែលផ្អែកលើកំណើនសេដ្ឋកិច្ចរឹងមាំ និងទន្ទឹងចាំយកផលក្នុងរយៈពេលយូរ (៣ ទៅ​ ៥ឆ្នាំ) ជាជាងទីផ្សារដែលគេក្រឡុកតម្លៃ»។

លោក ហាក់ គឹមថុង បានបន្ថែមទៀតថា ទីផ្សារទិញលក់ដីមានសន្ទុះល្អជាងទិញលក់ផ្ទះ។ ទោះយ៉ាងណាលោកថា ទីផ្សារផ្ទះសម្រាប់រស់នៅ នៅតែមាន តែមិនមែនទិញដើម្បីទុកចំណេញនោះទេ។ លោកពន្យល់ថា អ្នកទិញគឺភាគ​ច្រើនទិញដើម្បីបំពេញតម្រូវការរស់នៅ និងភាពចាំបាច់ប្រើប្រាស់ ហើយអតិថិជននឹងគិតល្អិតល្អន់​មុននឹងសម្រេច​ចិត្តទិញ ពោលគឺគិតលើគុណភាព គិតលើបរិយាកាសរស់នៅ​ និងផាសុកភាព។ ម្ចាស់គម្រោងបុរី​ដែលអាចផ្តល់​ទំនុកចិត្ត គុណភាពសំណង់ និងការរស់នៅ គឺមានអាទិភាពខ្ពស់។

បើតាមលោក គឹមថុង ទីផ្សារនឹងល្អប្រសើរជាងបច្ចុប្បន្ន ប្រសិនបើរាជរដ្ឋាភិបាលលូកដៃចូលជួយគាំទ្រ ជាពិសេស​ជួយជំរុញវិស័យធនាគារ និងបង្កើតគោលនយោបាយការពារអតិថិជនបន្ថែម។ លោកបានសង្កត់ធ្ងន់ថា ការបញ្ចុះ​អាត្រាការប្រាក់របស់ធនាគារកណ្តាលអាមេរិច អាចនឹងជះឥទ្ធិពលវិជ្ជមានលើទីផ្សារហិរញ្ញវត្ថុ និងវិនិយោគ ដែលនឹង​ជួយទីផ្សារអចលនវត្ថុផងដែរ គ្រាន់តែត្រូវរង់ចាំយ៉ាងហោចណាស់ដល់ពាក់កណ្តាលឆ្នាំ ២០២៤។ ទន្ទឹមនឹងនេះ ភូមិសាស្ត្រនយោបាយ និងវិបត្តិសង្គ្រាមដែលអាចកើតឡើងជាយថាហេតុក៏អាចជះឥទ្ធិពលអវិជ្ជមានលើទីផ្សារផងដែរ។

លោកឧកញ៉ា សំ សុខនឿន ប្រធានសមាគមអចលនទ្រព្យសកល បានលើកឡើងដែរថា បើទោះជាពេលនេះ ស្ថានភាពវិស័យអចលនទ្រព្យមានដំណើការមិនទាន់ប្រសើរយ៉ាងណាក្តី តែមានអ្នកវិនិយោគជាច្រើន បាននិង​កំពុងបន្តទិញ​អចលនទ្រព្យ នោះក៏ព្រោះតែគេធ្លាប់បានចំណេញយ៉ាងច្រើនពីអចលនទ្រព្យនេះ។

លោកឧកញ៉ា មានទស្សនៈយល់ឃើញថា អ្នកវិនិយោគអចលនទ្រព្យនៅពេលនេះ នឹងទទួលបានផល​ចំណេញ​ជាទីគាប់ចិត្តនៅពេលមិនលើសពីរយៈពេល៧ឆ្នាំក្រោយនោះទេ។

បើទោះជាក្នុងវិបត្តិកូវីដ-១៩ លោកបានខាតបង់ប្រាក់ប្រមាណ ១,១លានដុល្លារក្តី ក៏លោកឧកញ៉ា សំ សុខនឿន នៅតែ​បន្តវិនិយោគទិញដីធ្លីនៅតំបន់ជាយក្រុងយ៉ាងច្រើន ដើម្បីទុកចំណេញនៅពេលក្រោយ។

ជាមួយគ្នានេះ លោកឧកញ៉ា ឃាង ពុទ្ធី ប្រធានក្រុមប្រឹក្សា​ភិបាល​សមាគម​អ្នកជំនាញ​អចលនទ្រព្យ​កម្ពុជា មើល​ឃើញថា វិស័យអចលនទ្រព្យក្នុងឆ្នាំនេះ មានភាពប្រសើរតិចតួចប៉ុណ្ណោះ។ ស្ថានភាពអចលនទ្រព្យបច្ចុប្បន្ន ត្រូវរង់ចាំពេលវេលា ជាពិសេសផ្នែកផ្ទះល្វែង វិឡា ខុនដូ អគារពាណិជ្ជកម្ម អគារការិយាល័យ ផ្សារទំនើប គឺត្រូវការពេល ១ឆ្នាំ ២ឆ្នាំ ឬ៣ឆ្នាំ ដើម្បីស្រូបទាញទីផ្សារយកទៅប្រើប្រាស់ ពោលគឺអាស្រ័យលើស្ថានភាពជាក់ស្តែងនៃសេដ្ឋកិច្ចកម្ពុជា និងសមត្ថភាពអ្នកពាក់ព័ន្ធ រួមមាន ពលរដ្ឋ អាជីវករ សហគ្រិន និងពាណិជ្ជកម្មធុនតូច មធ្យម ជាដើម។ ទោះយ៉ាងណាលោកថា នៅមានការខ្វះខាតទិន្នន័យក្នុងការព្យាករណ៍វិស័យអចលនទ្រព្យឱ្យបានច្បាស់លាស់ នាពេលនេះ។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា មើលឃើញអំពីបញ្ហាប្រឈមដែលបានកើត​ឡើងនៅក្នុងវិស័យអចលនទ្រព្យ មានដូចជា ​ក្រុមហ៊ុនអភិវឌ្ឍន៍មួយចំនួន មិនមានច្បាប់អនុញ្ញាតត្រឹមត្រូវ ដែលបង្ក​ឱ្យមាន​ហានិភ័យដល់ប្រជាពលរដ្ឋអ្នកទិញ។ ការផ្គត់ផ្គង់លើសតម្រូវការ ការអភិវឌ្ឍគម្រោងច្រើនជាងតម្រូវការអ្នកទិញ (ទិញទុកលក់យកចំណេញ)ក៏ជាបញ្ហាផងដែរ។ លើសពីនេះទៀត លោកមើលឃើញថា ការអភិវឌ្ឍដីឡូតិ៍ កែប្រែពីដីក​សិកម្ម ទៅដីលំនៅឋាន ដែលមិនមានការត្រួតពិនិត្យច្បាស់លាស់ នាំឱ្យអ្នកទិញពិបាក​នឹងរកផលចំណេញមកវិញ។ ជាមួយគ្នានេះ វិបត្តិរំហូរសាច់ប្រាក់បរទេសបានធ្វើឱ្យចរន្តនៃការទិញលក់មានការថមថយ។

សម្រាប់ជាដំណោះស្រាយស្តារវិស័យអចលនទ្រព្យ លោកបណ្ឌិត គី សេរីវឌ្ឍន៍ បានលើកឡើងថា រាជរដ្ឋាភិបាល ត្រូវបង្កើតគោលនយោបាយដីធ្លី និងនគរូបនីយកម្មមួយ ឱ្យបានច្បាស់លាស់ ដែលនឹងក្លាយជាបន្ទាត់ ក្នុងការអនុវត្តរួម​របស់គ្រប់ក្រសួងស្ថាប័នអាជ្ញាធរ ងាយនឹងធ្វើការងារជាប្រព័ន្ធ។ ជាមួយគ្នានេះ រាជរដ្ឋាភិបាលត្រូវអន្តរាគមន៍​ប្រមូល​នូវព័ត៌មានទាំងអស់ ដែលប្រជាពលរដ្ឋជួបវិបត្តិ ដើម្បីរកដំណោះស្រាយមួយសមរម្យ សម្រាប់អ្នកអភិវឌ្ឍន៍ និងអ្នក​ទិញ ធ្វើយ៉ាងណាកុំឱ្យមានវិបត្តិសង្គមកើតឡើងតទៅទៀត៕