រដ្ឋសភាទទួលពាក្យបណ្ដឹងចំនួន ១០៦ រឿង ៨០% ករណីទំនាស់ដីធ្លី​

នៅក្នុងរយៈពេលជាង ៤ ខែ រដ្ឋសភាបានទទួលពាក្យបណ្ដឹង និងសំណើសុំអន្តរាគមន៍ពីប្រជាពលរដ្ឋ​សរុបចំនួន ១០៦ រឿង ​ហើយបានបញ្ជូនទៅក្រសួងស្ថាប័នមានសមត្ថកិច្ចធ្វើការដោះស្រាយ​ចំនួន ៤៤ រឿង កំពុងពិនិត្យសិក្សាចំនួន ៦១ រឿង និងទទួល​លិខិតឆ្លើយ​តបអំពីលទ្ធផល​ដោះ​ស្រាយ​របស់ក្រសួងស្ថាប័នមានសមត្ថកិច្ចចំនួន ១៤ រឿង។

លោក ឡេង ប៉េងឡុង អគ្គលេខាធិការរដ្ឋសភា បានលើកឡើងនៅក្នុងសន្និសីទសារព័ត៌មាន ស្ដីពីលទ្ធផល នៃការអនុវត្តការងាររបស់រដ្ឋសភានីតិកាលទី៧ នៅព្រឹកថ្ងៃទី ០៤ ខែមករា ឆ្នាំ ២០២៤នេះថា នៅរដ្ឋសភាមានគណៈកម្មការសិទ្ធិមនុស្សទទួលពាក្យបណ្ដឹង ដែលគណៈ​កម្មការ​​នេះ ទទួលបន្ទុកដោះស្រាយពាក្យបណ្ដឹង ​របស់ប្រជាពលរដ្ឋដែល​មានទំនាស់ និងបញ្ហាផ្សេងៗ។

លោក ឡេង ប៉េងឡុង បញ្ជាក់ថា បណ្ដឹងទាំង ១០៦ មាន ៨០ ភាគរយជាទំនាស់ដីធ្លី និងមួយចំនួនទៀត ពាក់ព័ន្ធនឹងការមិនសុខចិត្តទៅនឹងការសម្រេចរបស់តុលាការ និងការសំណូមពរផ្សេងៗទៀត។ លោកបញ្ជាក់ថា ករណីនេះ រដ្ឋសភាបានដោះស្រាយ ៤៤ ករណីរួចរាល់ហើយ។

សូមជម្រាបថា ​នៅ​ក្នុង​រយៈពេល​សម័យប្រជុំ​រដ្ឋសភា​លើក​ទី​១ នីតិកាល​ទី​៧ រដ្ឋសភា​សម្រេច​បាន​លទ្ធផល​ការងារ​រួមមាន៖ សម្រេច​អំពី​សុពលភាព​នៃ​អាណត្តិ​របស់​បេក្ខជន​ជាប់​ឆ្នោត​តំណាងរាស្ត្រ នីតិកាល​ទី​៧ នៃ​រដ្ឋសភា ចំនួន ១២៥​រូប។ អនុម័ត​បទបញ្ជាផ្ទៃក្នុង​នៃ​រដ្ឋសភា​នៃ​ព្រះរាជាណាចក្រ​កម្ពុជា​នីតិកាល​ទី​៧។

បោះ​ឆ្នោត​ជា​កញ្ចប់ ដើម្បី​ជ្រើសតាំង​ប្រធាន អនុប្រធាន​រដ្ឋសភា ប្រធាន អនុប្រធាន​គណៈកម្មការ​ជំនាញ​ទាំងអស់​នៃ​រដ្ឋសភា និង​ផ្តល់​សេចក្តី​ទុកចិត្ត​ចំពោះ​រាជរដ្ឋាភិបាល។

សម្រេចលុបសុពលភាព នៃអាណត្តិរបស់បេក្ខជនជាប់ឆ្នោតតំណាងរាស្ត្រ នីតិកាលទី៧ នៃរដ្ឋសភាចំនួន ២៩ រូប ជំនួសតំណាងរាស្ត្រដែលបានសុំលាលែង។

បោះឆ្នោតជ្រើសតាំង លោក យក់ ង៉ុយ ជាសមជិកក្រុមប្រឹក្សាធម្មនុញ្ញ ជំនួស លោក សំ ព្រហ្មនា សមាជិកក្រុមប្រឹក្សាធម្មនុញ្ញដែលបានទទួលមរណភាព។ បោះឆ្នោតជ្រើសតាំងសមាជិកគណៈកម្មការនានានៃរដ្ឋសភា នីតិកាលទី៧។ អនុម័តសេចក្ដីព្រៀងច្បាប់សរុបចំនួន ៦ ជាដើម៕

អត្ថបទ៖ ឡេង ដេត