ឧបនាយករដ្ឋមន្រ្តី និង​រដ្ឋមន្រ្តីពីរ​រូប​​​ ប្រកាស​​នឹង​ចុះ​​ទៅ​ពិនិត្យ​តម្លៃប្រើប្រាស់ផ្លូវចេញចូលព្រលាន​យន្តហោះ​សៀមរាប

នៅ​ព្រឹកថ្ងៃទី០៤ ខែមករា ឆ្នាំ២០២៤ លោក ស៊ុន ចាន់ថុល​ ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បាន​ដឹកនាំ​កិច្ចប្រជុំក្រុមការងារចំពោះកិច្ច ពិភាក្សាអំពីតម្លៃសេវាប្រើប្រាស់ផ្លូវចេញចូលអាកាសយានដ្ឋានអន្តរជាតិសៀមរាប-អង្គរ នៅទីស្តីការនៃក្រុមប្រឹក្សាអភិវឌ្ឍន៍កម្ពុជា។

កិច្ចប្រជុំ​ដែលដឹកនាំ​ដោយលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ក៏​មានការ​ចូលរួម​ពី​រដ្ឋមន្រ្តី​ពីរ​រូប​គឺ​លោក​ ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន រួម​ទាំង​រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល។

កិច្ចប្រជុំត្រូវបានរៀបចំឡើង បន្ទាប់ពីទទួលបានការចង្អុលបង្ហាញដោយផ្ទាល់ពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបង្កើតឱ្យមានក្រុមការងារចំពោះកិច្ចដោះស្រាយ​លើតម្លៃសេវាប្រើប្រាស់ផ្លូវចេញចូលអាកាសយានដ្ឋានអន្តរជាតិសៀមរាប-អង្គរ។

អង្គប្រជុំក្រោមកិច្ចដឹកនាំឧបនាយករដ្ឋមន្ត្រី ស៊ុន ចាន់ថុល បាន​សម្រេចនឹង​រៀបចំបេសកកម្មចុះពិនិត្យស្ថានភាពអាកាសយានដ្ឋានអន្តរជាតិសៀមរាប-អង្គរ នាពេលឆាប់ៗខាងមុខ។

បន្ទាប់ពីការចុះពិនិត្យស្ថានភាពអាកាសយានដ្ឋានរួចរាល់ ក្រុមការងារចំពោះកិច្ចគ្រោងនឹងជួបជជែកពិភាក្សាជាមួយក្រុមហ៊ុន Angkor International Airport Investment (Cambodia) Co., Ltd. (AIAI) សំដៅរួមគ្នាស្វែង​រកដំដោះស្រាយសមស្របជូនដល់បងប្អូនប្រជាពលរដ្ឋ៕