នាយកវិទ្យាស្ថានកំពង់ចាម ៖ វគ្គបណ្ដុះបណ្ដាលជំនាញ ជាឱកាសមាសសម្រាប់យុវជន ក្នុងទីផ្សារដ៏សម្បូរបែប

លោក ហាវ ធិន នាយក​វិទ្យាស្ថាន​ពហុបច្ចេកទេស​ខេត្ត​កំពង់ចាម បាន​ធ្វើ​បទសម្ភាសន៍​មួយ​អំពី កម្មវិធី​បណ្ដុះបណ្ដាល​ជំនាញ​វិជ្ជាជីវៈ និង​បច្ចេកទេស ដែល​ជ្រោមជ្រែង​ដោយ​ថ្នាក់​ដឹកនាំ​រាជរដ្ឋាភិបាល ក្នុង​គោលបំណង​ជួយ​សម្រួល​និស្សិត​មកពី​គ្រួសារ​ក្រីក្រ និង​គ្រួសារ​រង​ហានិភ័យ និង​ផ្តល់​ជំនាញ​ជាក់លាក់​មួយ​ដល់​យុវជន ដើម្បី​ជា​យាន​ចូល​ប្រលូក​ក្នុង​ទីផ្សារ​ការងារ។

លោក ហាវ ធិន បាន​លើក​ឡើង​ថា ការ​បណ្ដុះបណ្ដាល​ជំនាញ​វិជ្ជាជីវៈ និង​បច្ចេកទេស ទៅ​ដល់​យុវជន​ជា​យុទ្ធសាស្ត្រ​ដ៏​មាន​សក្ដានុពល​មួយ​របស់​រាជរដ្ឋាភិបាល នៃ​កម្ពុជា ដើម្បី​ជំរុញ​ឲ្យ​យុវជន​មាន​ជំនាញ​វិជ្ជាជីវៈ​ផ្ទាល់ខ្លួន​សម្រាប់​ជីវិត ក្នុង​ការ​ស្វែងរក​ការងារ​សមរម្យ លើកកម្ពស់​ជីវភាព​គ្រួសារ និង​សេដ្ឋកិច្ច​ប្រទេសជាតិ។

លោក ហាវ ធិន មាន​ប្រសាសន៍​ថា «យុវជន​មាន​ឱកាស​ល្អ​ណាស់ ក្នុង​ការ​ចាប់​យក​ជំនាញ​ជាក់​លាក់ ដែល​ជា​តម្រូវការ​ទីផ្សារ​ការងារ​ខ្ពស់»។ ស្រប​ទៅ​តាម​ស្ថានភាព​បច្ចុប្បន្ន​ក្នុង​លំហ​ទីផ្សារ​នៅ​កម្ពុជា មាន​កំណើន​ខ្លាំងក្លា និង​ប្រកួត​ប្រជែង​គ្នា។ ក្នុង​ទិដ្ឋភាព​នេះ លោក តម្រូវ​ឲ្យ​យុវជន​ទាំងអស់ ត្រូវ​មាន​ជំនាញ​មួយ​ក្នុង​ជីវិត ដែល​អាច​ជួយ​ជ្រោមជ្រែង​ជីវភាព​គ្រួសារ និង​សេដ្ឋកិច្ច​ប្រទេសជាតិ។ លោក​បន្ថែម​ថា «ក្នុង​មួយ​ជីវិត​យុវជន​ម្នាក់ ត្រូវ​មាន​ជំនាញ​មួយ ដើម្បី​ប្រកប​របរ​ចិញ្ចឹមជីវិត»។

យ៉ាងណាមិញ លោក បាន​អំពាវនាវ​ឲ្យ​យុវជន​ទាំងអស់ ចេះ​ចាប់​យក​ឱកាស​មាស ឱកាស​ប្រាក់ ដែល​រាជរដ្ឋាភិបាល​បាន​ដាក់​ជា​គោលនយោបាយ ដើម្បី​ធ្វើការ​បណ្ដុះបណ្ដាល​ជំនាញ​ទៅ​ដល់​យុវជន​មកពី​គ្រួសារ​ក្រីក្រ និង​គ្រួសារ​រង​ហានិភ័យ​ទូទាំង​ប្រទេស។

សូម​បញ្ជាក់​ដែរ​ថា ការ​បណ្ដុះបណ្ដាល​ជំនាញ​វិជ្ជាជីវៈ និង​បច្ចេកទេស​ទៅ​ដល់​យុវជន​មកពី​គ្រួសារ​ក្រីក្រ និង​គ្រួសារ​ងាយ​រង​ហានិភ័យ​ចំនួន ១,៥ លាន​នាក់ ប្រមុខ​រដ្ឋាភិបាល សម្តេច​មហា​បវរ​ធិបតី ហ៊ុន ម៉ាណែត បាន​ប្រកាស​ដាក់​ឲ្យ​អនុវត្ត​ជា​ផ្លូវការ កាលពី​ថ្ងៃ​ទី ១៤ ខែ​វិច្ឆិកា ឆ្នាំ ២០២៣។ កម្មវិធី​បណ្ដុះបណ្ដាល​នេះ ដើម្បី​ឲ្យ​យុវជន​មកពី​គ្រួសារ​ក្រីក្រ និង​ងាយ​រងគ្រោះ អាច​ឆាប់​មាន​ជំនាញ​វិជ្ជាជីវៈ និង​ឆាប់​មាន​ការងារ​ធ្វើ​សមរម្យ ជួយ​លើក​កម្ពស់​ជីវភាព​គ្រួសារ និង​ប្រកួតប្រជែង​ក្នុង​ទីផ្សារ​ការងារ៕