ព័ត៌មានជាតិ

កសិករនៅខេត្តជង្រុកស្រូវអះអាងថា ពីមុនធ្វើស្រែប្រើតែជីអាចម៍គោសល់មាសពាក់ជ្រែកខ្លួន

បានផុស

១ year មុន

នៅ

ថ្ងៃសុក្រ ៥ មករា ២០២៤

ដោយ

លោក កង សារឿន ពលរដ្ឋរស់នៅភូមិព្រៃតូច ឃុំព្រៃតូច ស្រុកមោងឫស្សី ខេត្តបាត់ដំបងបានអះអាងថា ពីមុនការធ្វើស្រែបានទិន្នផលតិច តែពលរដ្ឋនៅសល់និងមានលទ្ធភាពរហូតអាចទិញមាសពាក់ជ្រែកខ្លួន។ បច្ចុប្បន្នទោះបីការធ្វើស្រែបានទិន្នផលខ្ពស់ តែចំណាយក៏អស់ច្រើនជាពិសេសលើការប្រើប្រាស់ថ្នាំគីមីកសិកម្មបើផាត់ទូទាត់ចុះឡើងមិនចង់សល់នៅជំពាក់ចិនថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កង សារឿន បានប្រៀបធៀបការធ្វើស្រែពីមុនប្រើតែជីអាចម៍គោ អាចម៍សត្វដែលជាជីធម្មជាតិខុសពីឥលូវប្រើជីថ្នាំកសិកម្មដែលត្រូវចំណាយស្ទើរមិនរួចខ្លួន។

កសិករភាគច្រើនប្រើប្រាស់ជីគីមីរហូតដល់អ្នកខ្លះត្រូវលក់ស្រែទូទាត់បំណុល។ នេះបើតាមលោក កង សារឿន។

បើចង់វិលទៅប្រើជីធម្មជាតិដូចជីអាចម៍គោ អាចម៍សត្វអីដូចពីមុន កសិកររូបនេះប្រាប់ថាទៅមិនរួច។ លោកលើកហេតុផលដូច្នេះថា «កាលណាស្រែជាប់គ្នាគេប្រើថ្នាំគីមីច្រើនកើតរោគ។ អីចឹងដង្កូវរត់ពីស្រែគេមកស្រែយើង ដូច្នេះយើងក៏ត្រូវបាញ់ថ្នាំតាមគេដែរ ចឹងត្រូវចំណាយអស់ច្រើន»។

ទាក់ទងតម្លៃស្រូវ កសិកររូបនេះប្រាប់ថាពេលនេះអាចទទួលយកបាន តែអនាគតក៏ត្រូវអាស្រ័យលើក្រសួងពាក់ព័ន្ធជួយឲ្យតម្លៃស្រូវបានល្អ ដើម្បីឲ្យជីវភាពកសិករមានភាពល្អប្រសើរ៕