នៅភ្នំពេញ ឆ្នាំ ២០២៣ គ្រោះថ្នាក់ចរាចរណ៍កើតឡើងជាង ៩០០ករណី បណ្ដាលឲ្យស្លាប់ ៣០៣នាក់, កើនឡើង ៣០នាក់

ក្នុងឆ្នាំ ២០២៣កន្លងទៅនេះ ករណីគ្រោះថ្នាក់ចរាចរណ៍កើតឡើង នៅរាជធានីភ្នំពេញ មានចំនួនជាង ៩០០ករណី បណ្ដាលឲ្យមនុស្សស្លាប់ ៣០៣នាក់ ហើយកើតឡើងភាគច្រើន​ នៅពេលយប់។ បើប្រៀបធៀបនឹងឆ្នាំ ២០២២​​​ ករណីគ្រោះថ្នាក់ចរាចរណ៍នៅឆ្នាំ ២០២៣ មានការកើនឡើងចំនួន ១៨ករណី និងមនុស្សស្លាប់កើនឡើងចំនួន ៣០នាក់។ នេះបើតាមឲ្យដឹងពីនាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ។

លោកវរសេនីយ៍ឯក ដេ ម៉ៅ នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ មានប្រសាសន៍ប្រាប់កម្ពុជាថ្មី នៅថ្ងៃទី ៤ ខែមករា ឆ្នាំ ២០២៤ថា ពេញមួយឆ្នាំ ២០២៣ ពោលគឺចាប់ពីខែមករា ដល់ខែធ្នូ មានករណីគ្រោះថ្នាក់ចរាចរណ៍កើតឡើង នៅរាជធានីភ្នំពេញ ចំនួន ៩៤៦ករណី។ ក្នុងនោះ ករណីកើតឡើងនៅពេល យប់ មានចំនួនច្រើនជាងពេលថ្ងៃ រហូតដល់ ៦៦៥ករណី។

លោកឲ្យដឹងបែបនេះថា «ក្នុង ៩៤៦ករណីនេះ គឺសន្ទុះកើតឡើងនៅពេលយប់ មានចំនួនច្រើនជាងនៅពេលថ្ងៃ នៅពេលមានចំនួន ៦៦៥ករណី ចឹងយើងឃើញថា នៅពេលថ្ងៃអត់សូវឃើញកើត គឺនៅពេលថ្ងៃមានតែ ២៨១ករណីទេ»។

ក្នុងករណីគ្រោះចរាចរណ៍ពេញមួយឆ្នាំ ២០២៣ ចំនួន ៩៤៦ករណីនោះ បានបណ្ដាលឲ្យមានមនុស្សស្លាប់ចំនួន ៣០៣ នាក់ ហើយរងរបួសធ្ងន់ចំនួន ៩០៧នាក់ និងរងរបួសស្រាលចំនួន ២៨៤នាក់។

បើប្រៀបនឹងរយៈពេលដូចគ្នាក្នុងឆ្នាំ ២០២២ ករណីគ្រោះថ្នាក់ចរាចរណ៍ឆ្នាំ ២០២៣ មានការកើនឡើង ដោយពេញមួយឆ្នាំ ២០២២ ករណីគ្រោះចរាចរណ៍កើតឡើងចំនួន ៩២៨ករណី បណ្ដាលឲ្យមនុស្សស្លាប់ចំនួន ២៧៣នាក់ ហើយរងរបួសធ្ងន់ចំនួន ៩៩៣នាក់ និងរងរបួសស្រាលចំនួន ២៦៣នាក់។

លោកវរសេនីយ៍ឯក ដេ ម៉ៅ បានបញ្ជាក់ទៀតថា ករណីគ្រោះចរាចរណ៍នៅឆ្នាំ ២០២២ និង ២០២៣ កើតឡើងភាគច្រើន គឺនៅពេលយប់។ មូលហេតុដែលបណ្ដាលឲ្យមានករណីគ្រោះថ្នាក់ចរាចរណ៍ខាងលើនេះ គឺបណ្ដាលមកពីការបើកបរល្បឿនលឿន, បើកបរមិនប្រកាន់ស្ដាំ និងវ៉ាជែង ព្រមទាំងការបើកបរស្ថិតក្នុងស្ថានភាពស្រវឹង ជាដើម៕