សម្ដេច ហ៊ុន ម៉ាណែត គូសបញ្ជាក់ថា ការកំណត់យកថ្ងៃទី ២៩ ធ្នូ ជាទិវាសន្តិភាព​ គឺសម្រាប់ពលរដ្ឋខ្មែរទាំងអស់​គ្នា

ការកំណត់យកថ្ងៃទី ២៩ ខែធ្នូ ជារៀងរាល់ឆ្នាំ ជាទិវាសន្តិភាព​ និងជាថ្ងៃឈប់សម្រាកនោះ គឺសម្រាប់ប្រជាពលរដ្ឋខ្មែរទាំងអស់គ្នា​ ដែលស្រលាញ់សន្តិភាព និងស្អប់សង្រ្គាម ហើយក្នុងនោះ ក៏មានត្រកូល ហ៊ុន មួយដែរ។ នេះជាការគូសបញ្ជាក់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ការគូសបញ្ជាក់នេះ បានធ្វើឡើងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការ «ស្ពានសម្តេចតេជោ ហ៊ុន សែន កោះយ៉» និងជួបសំណេះសំណាលជាមួយកម្មករ-និយោជិត ក្នុងស្រុកមណ្ឌលសីមា ខេត្តកោះកុង នាព្រឹកថ្ងៃទី ៨ ខែមករា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត មានប្រសាសន៍ថា កាលពីថ្ងៃទី ១ ខែមករា ឆ្នាំ ២០២៤កន្លងទៅនេះ រាជរដ្ឋាភិបាលកម្ពុជា បានចេញអនុក្រឹត្យមួយ ដោយកំណត់យកថ្ងៃទី ២៩ ខែធ្នូ ជារៀងរាល់ឆ្នាំ ជាទិវាសន្តិភាព​ និងជាថ្ងៃឈប់សម្រាក។

ឆ្លើយតបនឹងបុគ្គលមួយចំនួន ដែលរិះគន់ថា ការកំណត់យកថ្ងៃទី ២៩​ ខែធ្នូ ជាទិវាសន្តិភាព​​​សម្រាប់ត្រកូល ហ៊ុន នោះ សម្ដេចធិបតី ហ៊ុន ម៉ាណែត បានគូសបញ្ជាក់ថា ការកំណត់ទិវាសន្តិភាពនេះ គឺសម្រាប់ប្រជាពលរដ្ឋខ្មែរ ដែលស្រលាញ់សន្តិភាពទាំងអស់គ្នា។

សម្ដេចនាយករដ្ឋមន្ត្រី បានថ្លែងថា «មានអ្នកខ្លះចេញមករិះគន់ថា ថ្ងៃហ្នឹងដាក់ថ្ងៃបុណ្យជាតិ ថ្ងៃឈប់សម្រាកគឺដើម្បីត្រកូល ហ៊ុន ខ្ញុំសូមប្រាប់អញ្ចេះ ខ្ញុំអត់បដិសេធថា ត្រកូល ហ៊ុន ក៏ស្វាគមន៍សន្តិភាពដែរ អញ្ចឹងទិវាសន្តិភាពនេះ គឺសម្រាប់ប្រជាពលរដ្ឋខ្មែរទាំងអស់​ ដែលស្រលាញ់សន្តិភាព និងស្អប់សង្រ្គាម ក្នុងនោះក៏មានត្រកូល ហ៊ុន មួយដែរ»។

ប្រមុខរាជរដ្ឋាភិបាល បានគូសបញ្ជាក់ទៀតថា ការកំណត់យកថ្ងៃទី ២៩ ខែធ្នូ ជារៀងរាល់ឆ្នាំ ជាទិវាសន្តិភាពនោះ មិនមែនផ្ដាច់មុខសម្រាប់តែត្រកូល ហ៊ុន នោះទេ គឺសម្រាប់ប្រជាពលរដ្ឋខ្មែរទាំងអស់ ដែលស្រលាញ់សន្តិភាព និងបានផលពីសន្តិភាព​។

សម្ដេចធិបតី ហ៊ុន ម៉ាណែត​ បានបន្ថែមដូច្នេះថា «ចឹងទិវាសន្តិភាព ដើម្បីកម្ពុជា នៅកម្ពុជានេះ គឺជាផលសម្រាប់យើងទាំងអស់គ្នា របស់ប្រជាពលរដ្ឋយើង សម្រាប់បច្ចុប្បន្ន និងទៅអនាគត សម្រាប់កូនចៅយើងគ្រប់គ្នា»៕