សម្ដេចធិបតី ហ៊ុន ម៉ាណែត បោះសំនួរ ២ ឱ្យអ្នករិះគន់ថ្ងៃ ៧ មករា ឆ្លើយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅថ្ងៃទី ៨ ខែមករា ឆ្នាំ ២០២៤ ​បានដាក់ជាសំនួរឱ្យអ្នករិះគន់ថ្ងៃ ៧ មករា ឆ្លើយ បន្ទាប់ពីលើកឡើងថា ថ្ងៃ ៧ មករា ឆ្នាំ ១៩៧៩ ជាថ្ងៃដែលវៀតណាមចូលឈ្លានពានកម្ពុជា ជាថ្ងៃចងកំហឹងដែលធ្វើឱ្យកម្ពុជាបាត់បង់អធិបតេយ្យភាព។

ដើម្បីវាយតម្លៃទិដ្ឋភាពប្រវត្តិសាស្ត្រថា តើថ្ងៃនោះជាថ្ងៃចងកំហឹង ឬថ្ងៃអបអរសាទរ សម្ដេចចោទជាសំនួរ​ឱ្យបកស្រាយការពិត។

សម្ដេច ហ៊ុន ម៉ាណែត ចោទសួរថា៖ «ទី១ ចន្លោះពីថ្ងៃ ១៧ មេសា ឆ្នាំ ៧៥ រហូតដល់ ៧ មករា ១៩៧៩ តើខ្មែរក្រហមសម្លាប់មនុស្សនៅក្នុងប្រទេសកម្ពុជាអត់? ប៉ុន្មានលាននាក់ដែលស្លាប់? បើចង់ច្បាស់ទៅសួរយាយតាយើងទៅ ព្រោះគាត់ជាសាក្សីរស់។ សូម្បីនរណាក៏អាចដឹង ប្រវត្តិសាស្ត្រនៅក្នុងសៀវភៅ ប្រវត្តិសាស្ត្រសៀវភៅក្រៅប្រទេស សុទ្ធតែទទួលស្គាល់ថា ខ្មែរក្រហម សម្លាប់មនុស្សនៅពេលនោះ មិនមែនសម្លាប់១ ឬ ២ ទេ សម្លាប់រាប់លាននាក់ ដែលយើងហៅថា របបប្រល័យពូជសាសន៍ជាតិឯង។ សំនួរទី ២ សួរថា តើការវ៉ៃចូលរបស់កងកម្លាំងរណសិស្សសាមគ្គីសង្គ្រោះជាតិកម្ពុជា​ ដែលដេញខ្មែរក្រហមចេញ បានបញ្ឈប់ការសម្លាប់មនុស្សទៀតអត់?»

សម្ដេចធិបតីបន្ថែមថា ខ្មែរក្រហមលែងបានសម្លាប់មនុស្សបន្តទៀត ការរំដោះ ១៩៧៩ គឺស្មើនឹងការសង្គ្រោះជីវិតប្រជាពលរដ្ឋនេះជាការពិត។

សម្ដេចធិបតីបញ្ជាក់ថា៖ «ចង់អ្នកឯងប្រើពាក្យអីពាក្យទៅ ប៉ុន្តែត្រូវទទួលស្គាល់ការពិត អត់ពិបាក​យល់ទេ គេកំពុងសម្លាប់​មនុស្ស ឥឡូវដេញអ្នកសម្លាប់ចេញពីទឹកដីឈប់ឱ្យសម្លាប់ បានន័យថា អ្នកគេមិនទាន់សម្លាប់នៅរស់រានមានជីវិត បញ្ឈប់ការសម្លាប់មនុស្ស»។

ការវ៉ៃលុកចូលរបស់រណសិស្សសាមគ្គីសង្គ្រោះជាតិកម្ពុជា គាំទ្រដោយកងទ័ពស្ម័គ្រចិត្តវៀតណាមនៅឆ្នាំ ១៩៧៩ គឺបានបញ្ចប់លទ្ធភាព ដែលខ្មែរក្រហមកាប់សម្លាប់ប្រជាពលរដ្ឋនៅក្នុងប្រទេស និងបានជួយសង្គ្រោះជីវិតប្រជាពលរដ្ឋរាប់លានាក់ នេះជាការពិត។

សំនួរមួយទៀតសួរថា ចុះហេតុអ្វីបានជាពឹងវៀតណាម? សម្ដេចបញ្ជាក់ថា នៅចុងឆ្នាំ ១៩៧៨ យើងមានជម្រើស២ អ្នកដែលអាចជួយគឺអង្គការសហប្រជាជាតិ (UN) នៅខាងលិច និងវៀតណាមនៅខាងកើត។ សួរថា ហេតុអ្វីបានជា UN មិនបញ្ជូនទ័ពមករំដោះកម្ពុជាយើងពេលនោះអត់ជម្រើសទេ ពីណាក៏ដោយ ឱ្យតែមកយើងស្វាគមន៍ទាំងអស់ មនុស្សជិតលង់ទឹកហើយ អត់មានរើសទេ តែយើងតែយើងអត់ជម្រើស។

សម្ដេចធិបតី ហ៊ុន ម៉ាណែតបញ្ជាក់ថា នៅខាងលិច UN មិនបញ្ជូនទ័ពមកទេ ដោយសារច្បាប់អង្គការសហប្រជាជាតិ។ អង្គការសហប្រជាជាតិ មិនអាចបញ្ជូនទ័ពចូលទៅក្នុងប្រទេសណាមួយបើគ្មានសំណូមពរពីរដ្ឋាភិបាលប្រទេសនោះ បើសិនជា UN បញ្ជូនទ័ពចូលទៅដោយគ្មានការសំណូមពរពីរដ្ឋាភិបាល គឺខុសច្បាប់អង្គការសហប្រជាជាតិ។ យើងមានជម្រើសតែមួយគត់ខាងវៀតណាម ហើយបើវៀតណាមមិនមកយើងនៅតែបន្តស្លាប់ ខណៈកម្លាំងតស៊ូ មានត្រឹមជាង ១ ម៉ឺននាក់ តទល់ជាមួយកម្លាំងខ្មែរក្រហមរាប់សែននាក់។

បើតាមសម្ដេចនាយករដ្ឋមន្ត្រី ទិដ្ឋភាពថ្ងៃ ៧ មករា សម្ដេចស្នើឱ្យយុវជនទាំងអស់ បញ្ញវន្ត ទាំងក្នុងនៅក្រៅប្រទេស រួមទាំងអ្នករិះគន់ ៧ មករា សូមឆ្លើយសំនួរទាំងអស់នេះ យកទៅពិចារណា កុំយកនិន្នាការនយោបាយមកបកស្រាយប្រវត្តិសាស្ត្រ គឺយកប្រវត្តិសាស្ត្របកស្រាយមកបកស្រាយថា ហេតុអ្វីបានជាយើងដើរផ្លូវហ្នឹង?