រយៈពេល៦ឆ្នាំ ក្រសួងការងារចំណាយប្រាក់៤៦លានដុល្លារ ឧបត្ថម្ភជូនកម្មការិនីដែលមានផ្ទៃពោះ

រយៈពេល៦ឆ្នាំ ចាប់ពីឆ្នាំ២០១៨ មកដល់ឆ្នាំ២០២៤នេះ ក្រសួងការងារ និងបណ្ដុះបណ្ដាលវិជ្ជាជីវៈ ចំណាយសាច់ប្រាក់ជិត ១៩២ពាន់លានរៀល ឬ៤៦លានដុល្លារសហរដ្ឋអាមេរិក ឧបត្ថម្ភជូនកម្មការិនីរោងចក្រ ទាំងមុនពេលសម្រាល ពេលសម្រាល និងក្រោយពេលសម្រាលកូន។ នេះបើតាមការឱ្យដឹងរបស់លោក ហេង សួរ រដ្ឋមន្ត្រីក្រសួងការងារ ក្នុងពិធីសំណេះសំណាលជាមួយកម្មករនិយោជិត ស្ថិតនៅស្រុកមណ្ឌលសីមា ខេត្តកោះកុង នៅថ្ងៃទី៨ ខែមករា។

លោក ហេង សួរ បានសង្កត់ធ្ងន់ថា “គិតចាប់ពីថ្ងៃទី១ ខែមករា ឆ្នាំ២០១៨ មកដល់ថ្ងៃទី៧ ខែមករា ឆ្នាំ២០២៤ នេះ ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈបានបើកប្រាក់ឧបត្ថម្ភ ដល់កម្មការិនីទាំងមុនពេលសម្រាលកូន, ពេលសម្រាលកូន និងក្រោយពេលសម្រាលកូនបានចំនួន ៤៥៥ ៩៤៥នាក់ មានកូនចំនួន ៤៤៣ ០៧៤នាក់ ចំណាយ ថវិកាជិត ១៩២ពាន់លានរៀល(៤៦លានដុល្លារ)”។

លើសពីនេះ លោក ហេង សួរ បានអះអាងថា កម្មករកម្មការិនីបានឈប់សម្រាកលំហែមាតុភាពចំនួន ៩០ថ្ងៃ ទទួលបានប្រាក់ឈ្នួលរហូតដល់ ១២០% ខណៈតម្លៃប្រើប្រាស់ អគ្គិសនីត្រឹម ៤០០រៀល ទៅ ៦០០រៀល ក្នុង១គីឡូវ៉ាត់ម៉ោង ទាបជាងតម្លៃពីមុនដែលមានរហូតដល់ ២ ពាន់រៀល ក្នុង១គីឡូវ៉ាត់ម៉ោង ដែលបង់តាមរយៈម្ចាស់ផ្ទះជួល។

ក្រៅពីនេះ នៅក្នុងពិធីដដែល  លោក ហេង សួរ ក៏បានឱ្យដឹងទៀតថា ចំនួនបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.ក្រោយការប្រកាសដាក់ឱ្យអនុវត្តជាផ្លូវការរបស់ សម្តេចធិបតី កាលពីថ្ងៃទី១៤ ខែវិច្ឆិកា ឆ្នាំ២០២៣ មានសមាជិកដែលជាគោលដៅបានចុះឈ្មោះសរុបចំនួន ១១១ ៧២០នាក់ ក្នុងនោះបុគ្គលស្វ័យនិយោជន៍ចំនួន ១០០ ២១៤នាក់ និងអ្នកក្នុងបន្ទុកសមាជិក ប.ស.ស. ចំនួន ១១ ៥០៦នាក់។ ប្រការនេះ គឺធ្វើឱ្យពលរដ្ឋសន្សំប្រមាណពី១៥ទៅ២០ដុល្លារក្នុងមួយខែ៕