សម្ដេចធិបតី៖ ៥តួអង្គ ជំរុញឱ្យ កំណែទម្រង់ការប្រឡងបាក់ឌុប ទទួលបានជោគជ័យ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកបង្ហាញ ៥ តួអង្គ ដែលបានចូលរួមយ៉ាងសកម្មក្នុងការធ្វើកំណែទម្រង់ការប្រឡងសញ្ញាបត្រទុតិយភូមិ ឬហៅថា បាក់ឌុប ទទួលបានលទ្ធផលប្រកបដោយប្រសិទ្ធភាព និងភាពជោគជ័យ។

ការបង្ហាញនេះ ធ្វើឡើងក្នុងឱកាសសម្ដេចធិបតី អញ្ជើញ​ជួបសំណេះសំណាលជាមួយសិស្សនិទ្ទេស A ក្នុងឆ្នាំសិក្សា២០២២-២០២៣ សរុប ១៦៩១ នាក់ រាប់ទាំងបេក្ខជនអប់រំបច្ចេកទេស ១៨ នាក់ ជំនួបសំណេះសំណាលនេះ ធ្វើឡើងនៅមជ្ឈមណ្ឌល​ពាណិជ្ជកម្មជ្រោយចង្វារ (OCIC) នៅព្រឹកថ្ងៃអង្គារ ទី៩ ខែមករា ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ទន្ទឹមនឹងការអបអរសាទរជាមួយ សិស្សនិទ្ទេស A ទាំង ១៦៩១ នាក់ ក្នុងនោះ យើងក៏អបអរផងដែរចំពោះតួអង្គដែលចូលរួមធ្វើឱ្យចេញលទ្ធផលនេះ ដែលតួអង្គសំខាន់ទី១ សិស្សានុសិស្សខ្លួនឯង ដែលខិតខំរៀនសូត្រ ហើយហ្មត់ចត់ និងជន្នះឧបសគ្គក្នុងការសិក្សា មិនថា ទីតាំងភូមិសាស្ត្រផ្ទះ និងសាលា បញ្ហាជីវភាពគ្រួសារ ទើបទទួលបានលទ្ធផលល្អនេះ។

តួអង្គទី២ គឺលោកគ្រូអ្នកគ្រូ ដោយសារការបណ្ដុះបណ្ដាលជាចម្បងធ្វើនៅសាលារៀន តាំងពីគ្រូថ្នាក់មេតេយ្យសិក្សា បឋមសិក្សា រហូតដល់មធ្យមសិក្សា ពិសេសលោកគ្រូអ្នកគ្រូថ្នាក់ទី១២ ដែលខិតខំបង្រៀន ដើម្បីសិស្សទទួលបានលទ្ធផលល្អក្នុងថ្ងៃប្រឡង។ សូមអបអរសាទរ និងសូមអរគុណដែលខំបង្រៀន និងចែករំលែកចំណេះដឹងដល់សិស្សានុសិស្ស។

តួអង្គទី៣ គឺ មាតាបិតា អាណាព្យាបាល ដែលបានខិតខំប្រឹងប្រែង លះបង់ និងជំរុញលើកទឹកចិត្ត ឬបង្កលក្ខណៈឱ្យក្មួយៗបានរៀនសូត្រ ដល់ថ្នាក់ទី១២ មិនថាសិស្សជាប់និទ្ទេស A B C… ឬអ្នកមិនជាប់ទេ

សម្ដេចធិបតី ហ៊ុន ម៉ាណែត ថ្លែងបញ្ជាក់បន្ថែមថា តួអង្គទី៤ គឺក្រសួងអប់រំ យុវជន និងកីឡា អាជ្ញាធររាជធានីខេត្ត មន្ទីរអប់រំ អាជ្ញាធរពាក់ព័ន្ធទាំងអស់ គណៈគ្រប់គ្រងសាលា អាជ្ញធរ កម្លាំងមានសមត្ថកិច្ចពាក់ព័ន្ធនៅក្នុងការជួយជំរុញការអប់រំ និងការប្រឡងឱ្យបានល្អ បានសុក្រឹត យុត្តិធម៌ ក៏មានការចូលរួមពី សហភាពសហព័ន្ធយុវជនកម្ពុជា អង្គភាពប្រឆាំងអំពើពុករលួយ ស្ថាប័ន និងអ្នកស្ម័គ្រចិត្តផ្សេងទៀត ដែលធ្វើឱ្យកិច្ចការប្រលងសុក្រឹត ធានាអ្នកជាប់ជាប់ដោយមោទនៈ ឯអ្នកធ្លាក់ ធ្លាក់ដោយអស់ចិត្ត។

តួអង្គទី៥ គឺមហាជន កិច្ចការទាំងអស់នេះ មិនអាចមាននិរន្តភាព និងចីរភាព ១៤ឆ្នាំ ដោយគ្មានការគាំទ្រពីមហាជននោះទេ បើសិនឆ្នាំទី១ លទ្ធផលចេញមកជាប់តិចតួច ហើយឪពុកម្ដាយ មហាជន មិនគាំទ្រ ហើយនាំគ្នាបាតុកម្មឱ្យដកកម្រិតស្ដង់ដាកែទម្រង់ប្រលងហ្នឹងចេញ គឺមិនបានលទ្ធផលដូចសព្វថ្ងៃនេះទេ។

គួរបញ្ជាក់ថា សិស្សទទួលបាននិទ្ទេស A ក្នុងការប្រលងក្រោមការធ្វើកំណែទម្រង់ដ៏តឹងរឹងនាឆ្នាំកន្លងមក មានចំនួន៖ នៅ​ឆ្នាំ​២០១៤ បេក្ខជន​ជាប់​និទ្ទេស A មាន​ចំនួន ១១នាក់​, ឆ្នាំ​២០១៥ បេក្ខជន​ជាប់​និទ្ទេស A មាន​ចួន ១០៨នាក់​, ឆ្នាំ​២០១៦ បេក្ខជន​ប្រឡង​ជាប់​និទ្ទេស A មាន​ចំនួន ៤០៥នាក់, ​ឆ្នាំ​២០១៧ បេក្ខជន​ប្រឡង​ជាប់​និទ្ទេស A មាន​ចំនួន ៤២៤​នាក់។, ឆ្នាំ២០១៨ បេក្ខជនប្រឡងជាប់និទ្ទេស​ A ២៩០នាក់, ឆ្នាំ២០១៩ បេក្ខជនប្រឡងជាប់និទ្ទេស A ចំនួន ៤៤៣នាក់, ឆ្នាំ២០២១ បេក្ខជនប្រលងជាប់និទ្ទេស A មានចំនួន ១ ៧៥៣នាក់, ឆ្នាំ២០២២ បេក្ខជនប្រលងជាប់និទ្ទេស A មានចំនួន ១ ០៤៩នាក់, ឆ្នាំ២០២៣ បេក្ខជនប្រលងជាប់និទ្ទេស A មានចំនួន ១ ៦៧៣នាក់៕