សម្ដេចធិបតី ហ៊ុន ម៉ាណែត គូសបញ្ជាក់ថា ការធ្វើកំណែទម្រង់មិនមែនជាការធ្វើបដិវត្តន៍ទេ​

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ការធ្វើកំណែទម្រង់មិនមែនជាការធ្វើបដិវត្តន៍នោះទេ ហើយគោលនយោបាយរាជរដ្ឋាភិបាល អាណត្តិទី ៧នេះ គឺផ្អែកលើមូលដ្ឋាននៃគោលនយោបាយ ដែលបានដាក់ចេញកាលពីអាណត្តិមុនៗ។

ការគូសបញ្ជាក់នេះ ធ្វើឡើងក្នុងពិធីសំណេះសំណាលជាមួយសិស្សនិទ្ទេស A ចំនួន ១,៦៩១នាក់ ដែលបានប្រឡងសញ្ញាបត្រមធ្យមសិក្សាទុតិយភូមិ និងសិស្សចំនួន ១៨នាក់ ជាសិស្សដែលប្រឡងសញ្ញាបត្របច្ចេកទេសនិងវិជ្ជាជីវៈកម្រិត ៣ នាព្រឹកថ្ងៃទី ៩ ខែមករា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ការធ្វើកំណែទម្រង់មិនមែនជាការធ្វើបដិវត្តន៍នោះទេ ដោយមិនមែន លុបចោលនូវគោលនយោបាយពីមុនៗ នោះឡើយ។

សម្ដេចនាយករដ្ឋមន្ត្រី បានថ្លែងថា «យើងមិនមែនធ្វើបដិវត្តន៍នោះទេ ខ្ញុំសូមបញ្ជាក់ ការកំណែទម្រង់មិនមែនជាការធ្វើបដិវត្តន៍ទេ…មិនមែនផ្ដាច់ចោលនូវគោលនយោបាយពីមុន​ លុបចោលទាំងអស់ ហើយអនុវត្តកត្តាដូចជំនាន់ខ្មែរក្រហម ចូលមកលុបចោលនូវកម្មសិទ្ធិឯកជន ដាក់អីផ្សេងៗ យើងអត់ទេ»។

ប្រមុខរាជរដ្ឋាភិបាល បានបញ្ជាក់ទៀតថា គោលនយោបាយរបស់រាជរដ្ឋាភិបាល នីតិកាលទី ៧ គឺបន្តពីគោលនយោ បាយ ដែលបានដាក់ចេញដោយរាជរដ្ឋាភិបាល អាណត្តិមុនៗ ជាពិសេសយុទ្ធសាស្រ្ដបញ្ចកោណ គឺផ្អែកលើមូលដ្ឋាននៃយុទ្ធសាស្រ្ដចតុកោណ៕