កម្ពុជា មានក្រុមហ៊ុនចំនួន ៥ ចិញ្ចឹម និងបង្កាត់ពូជ​សត្វស្វាក្តាមសម្រាប់យកកូន​នាំចេញ

ក្រុមហ៊ុនចំនួន ៥ នៅកម្ពុជា មានកសិដ្ឋានស្រាវជ្រាវ ចិញ្ចឹម និងបង្កាត់ពូជសត្វស្វាក្តាមយកកូននាំចេញចំនួន ៦ទីតាំង ស្ថិតនៅរាជធានីភ្នំពេញ ខេត្តកំពង់ធំ កំពង់ចាម កំពង់ស្ពឺ ពោធិ៍សាត់ និងខេត្តកំពង់ឆ្នាំង ដោយមានស្វាក្តាមសរុប ចំនួន ១៣១ ២៥៦ក្បាល ក្នុងនោះ កូនកើតក្នុងឆ្នាំ២០២៣ មានចំនួន ២៧ ៣២២ក្បាល។ នេះបើយោងតាម​របាយការណ៍​ប្រចាំឆ្នាំ ២០២៣ របស់ក្រសួងកសិកម្ម រុក្ខាប្រមាញ់ និងនេសាទ។ នៅក្នុងរបាយការណ៍នេះ មិនបាន​បញ្ជាក់ពីឈ្មោះ​ក្រុមហ៊ុនទាំង៥នោះទេ។

របាយការណ៍បានបង្ហាញទៀតថា ការចិញ្ចឹមថែរក្សាសត្វព្រៃសរុបចំនួន ២ ៧៩២ក្បាល ការសង្គ្រោះសត្វថ្មីចំនួន ១ ១៤៤ក្បាល បានព្យាបាលសត្វព្រៃចំនួន ៣៥៥ក្បាល និងបានស្ដារលទ្ធភាពជីវសាស្ត្រ សត្វព្រៃ និងលែងទៅ​ព្រៃធម្មជាតិវិញបានចំនួន ៧០៧ក្បាល។

យោងសេចក្ដីប្រកាសព័ត៌មានរបស់ក្រសួងកសិកម្ម កាលពីឆ្នាំ ២០២២បានបញ្ជាក់ថា នៅកម្ពុជា សត្វស្វាក្តាម​ជាប្រភេទសត្វសម្បូរ និងមានវត្តមាននៅទូទាំងប្រទេស ទាំងក្នុងព្រៃធម្មជាតិ ទាំងក្នុងតំបន់ជាយក្រុង និងទីក្រុង។ លើសពីនេះទៀត សត្វស្វាក្តាម ត្រូវបានចិញ្ចឹមនៅកម្ពុជា តាំងពីឆ្នាំ ២០០៥​មកម្ល៉េះ ហើយត្រូវបាននាំចេញ​សម្រាប់គោលដៅវេជ្ជសាស្ត្រ ជាពិសេសសម្រាប់ដំណាក់កាលការធ្វើពិសោធន៍ ដើម្បីផលិត​ឱសថ វ៉ាក់សាំង ឬគ្រឿងសំអាង។

ក្រសួងកសិកម្ម បានបញ្ជាក់ទៀតថា កសិដ្ឋានដែលចិញ្ចឹមសត្វស្វាក្តាមទាំងនេះទៀតសោត ទម្រាំទទួលបាន​ការទទួលស្គាល់តាមផ្លូវច្បាប់ គឺសុទ្ធតែតម្រូវឱ្យគោរពតាមបទដ្ឋានអនាម័យ និងវិធីសាស្ត្រចិញ្ចឹម ត្រឹមត្រូវ ដើម្បីរក្សា​ឱ្យបាននូវហ្សេនេទិករបស់វា មិនឱ្យផុតពូជនោះឡើយ។ សមត្ថកិច្ចគ្រប់គ្រងសាយតេសកម្ពុជា បានអនុញ្ញាត​ឱ្យនាំចេញសត្វស្វាក្តាម ដោយផ្អែកលើច្បាប់ និងបទប្បញ្ញត្តិជាតិ និងអន្តរជាតិ។