ប្រមុខរដ្ឋាភិបាល លើកទឹកចិត្ត ឱ្យកៀរគរបញ្ញវន្តកម្ពុជា ពិសេស បណ្ឌិត ចូលបង្រៀន

ប្រមុខរដ្ឋាភិបាល នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានលើកទឹកចិត្ត ក្រសួងអប់រំ យុវជន និងកីឡា និងគ្រប់គ្រឹះស្ថានឧត្ដមសិក្សា បន្តកៀរគរបញ្ញវន្តកម្ពុជា ដែលមានសញ្ញាបត្រកម្រិតឧត្ដម ជាពិសេសមានសញ្ញាបត្រថ្នាក់បណ្ឌិត និងមានបទពិសោធន៍ជាក់ស្ដែងមកបង្រៀនតាមបណ្ដាគ្រឹះស្ថានឧត្ដមសិក្សា និងគ្រឹះស្ថានបណ្ដុះបណ្ដាល។

ការបង្ហាញនេះ ធ្វើឡើងក្នុងឱកាសសម្ដេចធិបតី អញ្ជើញ​ជួបសំណេះសំណាលជាមួយសិស្សនិទ្ទេស A ក្នុងឆ្នាំសិក្សា២០២២-២០២៣ សរុប ១៦៩១ នាក់ រាប់ទាំងបេក្ខជនអប់រំបច្ចេកទេស ១៨ នាក់ ជំនួបសំណេះសំណាលនេះ ធ្វើឡើងនៅមជ្ឈមណ្ឌល​ពាណិជ្ជកម្មជ្រោយចង្វារ (OCIC) នៅព្រឹកថ្ងៃអង្គារ ទី៩ ខែមករា ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា៖ “ខ្ញុំសុំលើកទឹកចិត្ត ក្រសួងអប់រំ យុវជន និងកីឡា និងគ្រប់គ្រឹះស្ថានឧត្ដមសិក្សា បន្តកៀរគរបញ្ញវន្តកម្ពុជា ដែលមានសញ្ញាបត្រកម្រិតឧត្ដម ជាពិសេសមានសញ្ញាបត្រថ្នាក់បណ្ឌិត និងមានបទពិសោធន៍ជាក់ស្ដែងមកបង្រៀនតាមបណ្ដាគ្រឹះស្ថានឧត្ដមសិក្សា និងគ្រឹះស្ថានបណ្ដុះបណ្ដាលដើម្បីចូលរួមចំណែកដល់ការអភិវឌ្ឍវិស័យអប់រំនៅកម្ពុជាឱ្យកាន់តែប្រសើរ និងដើម្បីរួមចំណែកដល់ការធ្វើបដិវត្តកម្មសេដ្ឋកិច្ចកម្ពុជា ពីសេដ្ឋកិច្ចអតិពលកម្ម ទៅជាសេដ្ឋកិច្ចអតិមូលធន ផ្អែកលើជំនាញ បច្ចេកវិទ្យា និង នុវានុវត្តន៍ ព្រមទាំងជួយជំរុញការអនុត្តនយោបាយជាតិធំៗឱ្យសម្រេចបានដោយជោគជ័យ”។

ជាមួយគ្នានេះ សម្ដេចធិបតី ហ៊ុន ម៉ាណែត បានណែនាំឱ្យ ក្រសួងអប់រំ យុវជន និងកីឡា ពិនិត្យលទ្ធភាពបង្កើតកម្មវិធី និងសេវាប្រឹក្សាយោបល់ដល់សិស្សានុសិស្ស និងនិស្សិតក្នុងការតម្រង់ទិស ការជ្រើសរើស អាជីព និងមុខជំនាញឯកទេសនៅតាមវិទ្យាល័យ និងគ្រឹះស្ថានឧត្ដមសិក្សា ដើម្បីជួយតម្រង់ទិសការសិក្សារបស់សិស្សានុសិស្ស សំដៅបង្រួមឱ្យបានជាអប្បរមានូវគម្លាតរវាងការផ្គត់ផ្គង់ជំនាញ និងតម្រូវការជំនាញនៅក្នុងទីផ្សារការងារនៅកម្ពុជា។ បន្ថែមលើនេះ ផ្ដល់ការតម្រង់ទិសសិក្សាឱ្យសិស្សពូកែ បានបន្តការសិក្សានៅកម្រិតបន្តបន្ទាប់ ដើម្បីអភិវឌ្ឍធនធានមនុស្សដ៏សំខាន់របស់យើងលើមុខជំនាញអាទិភាពដូចជា វិទ្យាសាស្ត្រ បច្ចេកវិទ្យា វិស្វកម្ម ជាដើម។

គួរបញ្ជាក់ថា ការអប់រំ និងការបង្កើតធនធានមនុស្ស គឺជានយោបាយអាទិភាពរបស់រាជរដ្ឋាភិបាលកើតចេញពី គណ​បក្សប្រជា​ជន​កម្ពុជា។​ សម្តេចធិបតី ហ៊ុន ម៉ាណែត នៅតែបន្តនយោបាយរបស់ សម្តេចតេជោ យកចិត្តទុកដាក់ខ្ពស់លើការអប់រំ និងការបណ្តុះបណ្តាលធនធានមនុស្ស។ ជំនួបសំណេះសំណាលរបស់ សម្តេចធិបតី ជាការលើកទឹកចិត្ត​ដ៏​ធំធេងដល់សិស្សដែលបានប្រឹងប្រែងសិក្សារៀនសូត្រ។ មិនតែប៉ុណ្ណោះ ក៏ជាចលករលើកទឹកចិត្តឱ្យសិស្សានុសិស្សជំនាន់ក្រោយបន្តទៀតប្រឹងប្រែងរៀនសូត្រ ដើម្បីទទួលបានឱកាសដ៏កម្រក្នុងការជួបសំណេះសំណាលជាមួយប្រមុខរាជរដ្ឋាភិបាល៕