ព័ត៌មានជាតិ

លោក សាន ពៅ៖ ដើមត្នោតសម្រាំងយកអាយុចាប់ពី ១០០ ឆ្នាំឡើងទើបកែច្នៃផលិតផលមានគុណភាព

បានផុស

១ year មុន

នៅ

ថ្ងៃពុធ ១០ មករា ២០២៤

ដោយ

លោក សាន ពៅ ម្ចាស់ «សិប្បកម្ម សាន ពៅ» ស្ថិតនៅភូមិឈូក ឃុំបឹងបត់កណ្ដោល ស្រុកបាកាន ខេត្តពោធិ៍សាត់ បានអះអាងថា របរប្រើប្រាស់គ្រឿងសង្ហារិម និងវត្ថុអនុស្សាវរីយ៍កែច្នៃចេញពីដើមត្នោតខ្មែរ នៅក្នុងសិប្បកម្មរបស់លោកផ្ទាល់ គឺសម្រិតសម្រាំងយកតែដើមត្នោតណាដែលមានអាយុកាលចាប់ពី ១០០ ឆ្នាំឡើងទៅប៉ុណ្ណោះទើបមានគុណភាពល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន ពៅ បានប្រាប់ «កម្ពុជាថ្មី» ថា សិប្បកម្មកែច្នៃផលិតផលពីដើមត្នោតខ្មែររបស់លោកបានចាប់ផ្ដើមដំណើរការតាំងពីឆ្នាំ ២០០៤ ដែលរបស់របរដែលកែច្នៃចេញពីសិប្បកម្មរបស់លោកទទួលបានទំនុកចិត្តពីភ្ញៀវមានគុណភាពល្អ ។

លោកអះអាងថា ដើមត្នោតទាំងអស់អាចយកមកកែច្នៃបានត្រូវសម្រិតសម្រាំងយកតែដើមត្នោតណាដែលមានគុណភាព និងមានខ្លឹមល្អប៉ុណ្ណោះទើបអាចយកមកកែច្នៃបាន។ ជាក់ស្ដែង រាល់វត្ថុទាំងអស់ដែលកែច្នៃចេញពីសិប្បកម្មលោក គឺយកតែដើមត្នោតណាដែលអាយុកាលចាប់ពី ១០០ ឆ្នាំឡើងប៉ុណ្ណោះ។ ចំពោះដើមត្នោតក្រោម ១០០ឆ្នាំ គឺមិនមានខ្លឹម និងមិនអាចយកមកកែច្នៃបានឡើយ បោះទោះជាយកមកកែច្នៃបានក៏មិនអាចធានាគុណភាពដែរ។

«មែនទែនទៅដើមត្នោតទោះអាយុមិនដល់ ១០០ ឆ្នាំក៏អាចកែច្នៃចេញដែរ ប៉ុន្តែមិនអាចធានាពីគុណភាពទេ ហើយចំពោះដើមត្នោតដែលមានអាយុកាន់តែវែង គឺកាន់តែល្អ ហើយយើងក៏ត្រូវការដើមត្នោតដែលមានអាយុចាប់ពី ១០០ ឆ្នាំឡើងទៅប៉ុណ្ណោះដើម្បីយកមកកែច្នៃចេញជារបស់របរផ្សេងៗ ជាពិសេសសម្រាប់មកធ្វើជាគ្រឿងសង្ហារិម តុ ទូ យើងយកតែដើមត្នោតខ្លឹមប៉ុណ្ណោះ»។

បន្ថែមពីនេះ លោក សាន ពៅ បានអះអាងថា «អ្នកដែលទទួលទិញគ្រឿងសង្ហារិមសុទ្ធសឹងតែជាភ្ញៀវដែលមានឋានៈ និងហ៊ានចំណាយលុយច្រើន ដូច្នេះប្រសិនបើយកដើមត្នោតខ្ចី ដែលមិនខ្លឹមល្អ ធ្វើទៅគុណភាពក៏មិនកើតដែរ នេះដូចជាបំផ្លាញទំនុកចិត្តភ្ញៀវ។ ទៀតសោត រាល់គ្រឿងសង្ហារិមដែលចេញពីសិប្បកម្ម លោកក៏ហានធានានូវគុណភាពល្អលេខមួយផងដែរ ព្រោះដើមត្នោតលោកជាអ្នករើសសម្រាំងមកធ្វើដោយខ្លួនឯង»។

ស្របពេលជាមួយគ្នា បើទោះបីជាត្រូវការវត្ថុធាតុដើមដែលមានអាយុកាលវែងនិងគុណភាពល្អក៏ពិត ប៉ុន្តែ លោក សាន ពៅ បានឲ្យដឹងថា ការនាំចូលវត្ថុធាតុដើមមិនបានបង្កជាផលពិបាកឡើយ ព្រោះតែដើមត្នោតទាំងអស់នោះសុទ្ធសឹងតែពលរដ្ឋកាប់ចោលហើយមានច្រើននៅក្នុងស្រុក។

ម្ចាស់សិប្បកម្មរូបនេះ ក៏បានសំណូមពរដល់ពលរដ្ឋទាំងអស់មេត្តាជួយគាំទ្រផលិតផលខ្មែរ ផលិតដោយស្នាដៃរបស់ខ្មែរ ដើម្បីជួយលើកស្ទួយផលិតកម្មក្នុងស្រុក កាត់បន្ថយការនាំចូលពីក្រៅប្រទេស និងដើម្បីលើកស្ទួយវប្បធម៌ខ្មែរពិសេសដើមត្នោតកុំឲ្យបាត់បង់ផងដែរ៕