ក្រសួងព័ត៌មានហាមមិនឱ្យយកស្រ្តី ទៅផ្សាយពាណិជ្ជកម្មស្រា ដែលជាហេតុនាំឱ្យប៉ះពាល់សេចក្ដីថ្លៃថ្នូរនារីខ្មែរ

ក្រសួងព័ត៌មា​ន បានហាមដល់បណ្ដាម្ចាស់ប្រព័ន្ធផ្សព្វផ្សាយ ក្រុមហ៊ុនផលិត នាំចូល ចែកចាយ និង ក្រុមហ៊ុនផ្តល់សេវាកម្មផ្សាយពាណិជ្ជកម្មផលិតផលគ្រឿងស្រវឹងទាំងអស់ដាច់ខាត មិនឱ្យយកស្ត្រី​ និងអនីតិជនអាយុក្រោម១៨ ទៅផ្សព្វផ្សាយគ្រឿងស្រវឹងឡើយ។ ការណ៍ដែលក្រសួងព័ត៌មានហាមបែបនេះ ព្រោះការណ៍ដែលយកតួអង្គស្រ្តី និងអនីតិជនទៅផ្សព្វផ្សាយបែបនេះ គឺប៉ះពាល់សិទ្ធ និងសេចក្ដីថ្លៃថ្នូររបស់ស្ត្រីខ្មែរ។ នេះបើតាមសេចក្ដីជូនដំណឹងរបស់ក្រសួងព័ត៌មាន។

ក្រសួងព័ត៌មាន ក៏បានហាមមិនឱ្យផ្សាយពាណិជ្ជកម្មគ្រឿងស្រវឹងផ្តល់រង្វាន់ ដោយប្រើសកម្មភាពជំរុញ លើកទឹកចិត្ត ឬ អូសទាញប្រជាពលរដ្ឋឱ្យឈ្លក់វង្វេងសេពគ្រឿងស្រវឹង ដើម្បីផ្សងសំណាងយករង្វាន់ និងពាក្យ ស្លោកដែលមានចរិតលើកទឹកចិត្តហួសហេតុពេក។

ក្រសួងក៏បានណែនាំដល់ ការផ្សាយពាណិជ្ជកម្មគ្រឿងស្រវឹងតាមកញ្ចក់ទូរទស្សន៍គ្រប់ប្រភេទ សារព័ត៌មានតាម ប្រព័ន្ធអនឡាញ អាហ្វីស ប៉ាណូ LED Screen ផ្ទាំងផ្សាយពាណិជ្ជកម្មនានា ត្រូវដាក់សារព្រមាន  «ពិសាគ្រឿងស្រវឹងសូមកុំបើកបរ» ឬ «ពិសាដោយការទទួលខុសត្រូវ»។

ចំពោះស្ពតពាណិជ្ជកម្មដែលមានលក្ខណៈដូចរៀបរាប់ខាងលើ ក្រសួងព័ត៌មានបានទុករយៈពេល សមស្រប ដើម្បីម្ចាស់ប្រព័ន្ធផ្សព្វផ្សាយរៀបចំផ្លាស់ប្ដូរ និងកែសម្រួលស្អាតផ្សាយពាណិជ្ជកម្មគ្រឿងស្រវឹងថ្មី សម្រាប់ផ្សព្វផ្សាយដែលមិនប៉ះពាល់ដល់សីលធម៌សង្គម។

ក្នុងករណីម្ចាស់ប្រព័ន្ធផ្សព្វផ្សាយ ឬក្រុមហ៊ុនផលិត នាំចូល ចែកចាយ ឬក្រុមហ៊ុនផ្តល់សេវា កម្មផ្សាយពាណិជ្ជកម្មគ្រឿងស្រវឹងណាមួយមិនអនុវត្តតាមលិខិតជូនដំណឹងនេះ ក្រសួងព័ត៌មាន នឹងបញ្ឈប់ការផ្សាយស្តតពាណិជ្ជកម្មនោះ។ ចំពោះម្ចាស់ប្រព័ន្ធផ្សព្វផ្សាយណាដែលល្មើស ក្រសួងព័ត៌មាន នឹងអនុវត្តតាមកិច្ចសន្យាដែលតម្កល់ទុកនៅក្រសួងព័ត៌មាន។

សេចក្ដីជូនដំណឹងដដែលបានអះអាង ក្រសួងព័ត៌មានបានសម្គាល់ឃើញថា មានផលប៉ះពាល់ដល់សង្គមមួយផ្នែកគឺកើតចេញពីការទទួលទានគ្រឿងស្រវឹងដោយខ្វះ ការទទួលខុសត្រូវដូចជា គ្រោះថ្នាក់ចរាចរណ៏ អំពើហិង្សាក្នុងគ្រួសារ សង្គម និងប៉ះពាល់សុខភាព ជាដើម។ អាស្រ័យហេតុនេះ ទើបក្រសួងដាក់ចេញវិធានការ ដើម្បីបង្ការ ទប់ស្កាត់ និងលុបបំបាត់នូវរាល់ភាពអសកម្មទាំងនេះ៕

ដោយ៖ ង៉ិល ណារ៉ាត់