រដ្ឋមន្ត្រីយុត្តិធម៌ ស្នើឲ្យភាគីពាក់ព័ន្ធក្នុងរឿងក្ដី ត្រូវបង្ហាញភាពស្មោះត្រង់ ខណៈរឿងក្ដីមួយ​មានភាគីយ៉ាងតិច ២

រដ្ឋមន្ត្រីក្រសួងយុត្តិធម៌ ស្នើឲ្យភាគីពាក់ព័ន្ធក្នុងរឿងក្ដីណាមួយ ត្រូវបង្ហាញភាពស្មោះត្រង់ទាំងអស់គ្នា ហើយពាក្យថា យុត្តិធម៌ គឺត្រូវរកឲ្យឃើញការពិត ពោលគឺត្រូវថ្លឹងថ្លែងទាំងអស់។

ការស្នើនេះ ធ្វើឡើងក្នុងសន្និសីទសារព័ត៌មាន ដើម្បីប្រកាសដាក់ចេញនូវយុទ្ធនាការសំខាន់ចំនួន ២ ដើម្បីពង្រឹង និងលើកកម្ពស់សេវាយុត្តិធម៌ និងគុណភាពនៃយុត្តិធម៌នៅកម្ពុជា កាលពីល្ងាចថ្ងៃទី ៩ ខែមករា ឆ្នាំ ២០២៤។

លោក កើត រិទ្ធ មានប្រសាសន៍ថា ក្នុងរឿងក្ដីមួយ មិនមែនមានភាគីតែមួយនោះទេ ដោយមានភាគីយ៉ាងតិច ២ ហើយរឿងក្ដីខ្លះ អាចមានដល់ ៣ ឬ ៤ភាគីឯណោះ។ ដូច្នេះ មិនប្រាកដថា យកព័ត៌មានពីភាគីតែម្ខាង ហើយអះអាងថា ភាគីម្ខាងនោះត្រឹមត្រូវទេ ដោយត្រូវយកព័ត៌មានពីភាគីម្ខាងទៀត។

លោកលើកឡើងថា មិនប្រាកដថា ភាគីម្ខាងទៀតនៃរឿងក្ដី គាត់ចេះលេងបណ្ដាញសង្គមឬក៏អត់នោះទេ ជួនកាលគាត់មិនចេះលេង។ ដូច្នេះហើយ ប៉ុន្តែពាក្យថា យុត្តិធម៌មួយ គឺត្រូវរកឲ្យឃើញការពិត ការពិត គឺត្រូវថ្លឹងថ្លែងទាំងអស់ គ្រប់កន្លែងទាំងអស់។  

លោក កើត រិទ្ធ បានបន្ថែមថា​ «យើងខ្ញុំនៅទីនេះ គឺមានបទពិសោធន៍នេះច្រើន ដាក់ពាក្យបណ្ដឹងមក ជួនកាលយើងពិនិត្យមើល គ្រាន់តែអានហើយភ្លាម ហូរ! អយុត្តិធម៌ម៉េចណ៎ យើង អ្នកណា ក៏ដឹងថា រឿងហ្នឹងវាមើលទៅអយុត្តិធម៌ណាស់ សុំរបាយការណ៍ពីតុលាការយកមកមើល ភ្ជាប់ជាមួយឯកសារសំណុំរឿង ជាពិសេសភាគីម្ខាងទៀត យកមកមើលហ្អាករឿងនេះអញ្ចេះសោះ វាទៅជា Version មួយផ្សេងទៀត»។

លោកឧបនាយករដ្ឋមន្ត្រី គូសបញ្ជាក់ថា ដើម្បីចង់លើកកម្ពស់យុត្តិធម៌ ត្រូវមានវិធីសាស្រ្ដធានាបានការស្វែងរកឲ្យឃើញនូវការពិត​ ដោយមិនមែនយុត្តិធម៌ចេញពីភាគីម្ខាងនោះទេ។

លោកថា «យើងចង់លើកម្ពស់យុត្តិធម៌ យើងត្រូវមានវិធីសាស្រ្ដរបស់យើង​ ដែលធានាឲ្យបានការស្វែងរកឲ្យឃើញនូវការពិត មិនមែនយុត្តិធម៌ ចេញពីត្រឹមតែមាត់របស់បុគ្គលណាមួយទេ ប៉ុន្តែត្រូវរកការ​ពិតជាគោល​ៗ ហើយយើងមានវិធីរបស់យើង ដើម្បីធ្វើ»៕