ព័ត៌មានជាតិ

អ្នកជំនាញកសិកម្មព្រមានកុំឲ្យពលរដ្ឋដុតជញ្ជ្រាំងស្រូវក្រោយពេលប្រមូលផលរួច

បានផុស

១ year មុន

នៅ

ថ្ងៃពុធ ១០ មករា ២០២៤

ដោយ

កន្លងទៅពលរដ្ឋមួយចំនួនក្រោយប្រមូលផលស្រូវរួចពួកគាត់មួយចំនួនតែងអនុវត្តតៗគ្នានូវការដុតជញ្រ្ជាំងស្រូវ ខណៈដែលអ្នកជំនាញកសិកម្មមើលឃើញថាផ្តល់គុណវិបត្តិច្រើនជាងគុណសម្បត្តិហើយអាចនាំប៉ះពាល់ដល់បរិស្ថានថែមទៀត។

លោក ស វ៉េង ទីប្រឹក្សាបច្ចេកទេសនៃមជ្ឈមណ្ឌលស្រាវជ្រាវនិងអភិវឌ្ឍន៍កសិកម្មអភិរក្សនៅកម្ពុជានៃអគ្គនាយកដ្ឋានកសិកម្មបានគូសបញ្ជាក់ថា គោលបំណងនៃការដុតជញ្ជ្រាំងគឺទីមួយកសិករគិតថាងាយស្រួលក្នុងការរៀបចំដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីពីរពួកគាត់គិតថាកាត់បន្ថយជំងឺដូចជាប្រភេទក្រាឬប្រភេទជំងឺផ្សេងទៀតដែលប៉ះពាល់ដល់ដំណាំរបស់ពួកគាត់។ ប៉ុន្តែផ្ទុយមកវិញ អ្នកជំនាញកសិកម្មរូបនេះអះអាង ការដុតជញ្ជ្រាំងផ្តល់ផលលំបាកច្រើនណាស់។

លោកពន្យល់ថា ស្រូវដើម្បីផលិតបានជាដងដើមត្រូវការបឺតសារធាតុចិញ្ចឹមនៅក្នុងដី។ ប៉ុន្តែនៅពេលដែលកសិករដុតជញ្រ្ជាំងហាក់ដូចជាទៅបំផ្លាញជីនិងសារធាតុចិញ្ចឹមចោលអស់ផ្តល់ផលប៉ះពាល់ទាំងដីនិងបរិស្ថាន។

«ការដុតបំផ្លាញគល់ជញ្រ្ជាំង មិនមែនជាជម្រើសល្អនោះទេ ព្រោះវាធ្វើឲ្យបាត់បង់ជីជាតិដី ធ្វើឲ្យដីរឹង បាត់បង់សត្វមាន ប្រយោជន៍ក្នុងដីថែមទៀត។ សូម្បីតែសត្វនៅក្នុងដីមានប្រយោជន៍ជាអតិសុខុមប្រាណមួយចំនួនក៏ងាប់អត់អាចរស់នៅបានទេ ហើយធ្វើឲ្យដីក្តាំងសឹករេចរិល ហើយការប៉ះពាល់ដីកាន់តែច្រើននាំឲ្យទិន្នផលថយចុះ។ អីចឹងការដុតនេះសារធាតុចិញ្ចឹមក៏បាត់ ទៅជាបំពុលបរិស្ថានធ្វើឲ្យផលប៉ះពាល់ដល់បរិយាកាសជាពិសេសការបំភាយឧស្ម័នផ្ទះកញ្ចក់»។

លោកបានលើកពីករណីនៅប្រទេសថៃកាលពីប៉ុន្មានឆ្នាំមុន នៅពេលដែលកសិករសម្រុកដុតចម្ការអំពៅឃើញថានៅទីក្រុងបាងកករងផលប៉ះពាល់ដោយផ្សែងពុល៕