សម្តេច ទៀ បាញ់៖ ស្មារតីថ្ងៃជ័យជម្នះ ៧មករា ជានិមិត្តរូបនៃសាមគ្គីជាតិ

សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ អនុប្រធានគណបក្សប្រជាជបកម្ពុជា និងជាតំណាងរាស្ត្រមណ្ឌលខេត្តសៀមរាប បានលើកឡើងថា ស្មារតីថ្ងៃជ័យជម្នះ ៧មករា ជានិមិត្តរូបនៃសាមគ្គីជាតិ។ សម្តេច បានលើកឡើងបែបនេះ ក្នុងពិធីអបអរសាទរខួបអនុស្សាវរីយ៍លើកទី៤៥ នៃទិវាជ័យជម្នះ ៧មករា នៅបរិវេណសួនច្បារព្រះរាជដំណាក់ ខេត្តសៀមរាប នៅព្រឹកថ្ងៃទី១០ ខែមករា ឆ្នាំ២០២៤។

សម្តេច ទៀ បាញ់ បានឱ្យដឹងនូវជីវប្រវត្តិដ៏សែនឈឺចាប់នៅក្នុងរបបកម្ពុជាប្រជាធិបតេយ្យ ប្រល័យពូជសាសន៍ ដើម្បីរម្លឹកដល់ប្រជាពលរដ្ឋគ្រប់រូប ពិសេស អ្នកជំនាន់ក្រោយដែលជាអ្នកបន្តវេន បានយល់ដឹង និងកុំឱ្យរបបដ៏ព្រៃផ្សៃនេះ កើតមានជាលើកទី២ លើទឹកដីមាតុភូមិទៀត។ សម្តេច ក៏បានបានឧទ្ទិស សូមឱ្យស្មារតីថ្ងៃជ័យជម្នះ៧មករា ស្ថិតនៅក្នុងក្រអៅបេះដូងប្រជាពលរដ្ឋគ្រប់រូប និងជានិមិត្តរូបនៃសាមគ្គីជាតិ និងមហាគ្រួសារខ្មែរស្ថិតនៅជាអមតៈក្រោមម្លប់សុខសន្តិភាពជានិច្ចនិរន្ត៍។ 

ស្របពេលជាមួយគ្នានេះ សម្តេចពិជ័យសេនា ទៀ បាញ់ បានអានសុន្ទរកថារបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដោយមានខ្លឹមសារថា អត្ថន័យដ៏ជ្រាលជ្រៅនៃកម្លាំងមហាសាមគ្គីជាតិ ក្រោមការដឹកនាំរបស់សម្ដេចអគ្គមហាធម្មពោធិសាល ជា ស៊ីម សម្ដេចអគ្គមហាពញាចក្រី ហេង សំរិន និង សម្ដេចអគ្គមហាសេនា​បតីបតី​តេជោ ហ៊ុន សែន ប្រទេសកម្ពុជាទាំងមូល ត្រូវបានរំដោះឱ្យរួចចាកផុតពីរបបកម្ពុជាប្រជាធិបតេយ្យ ប្រល័យពូជសាសន៍ពួក ប៉ុល ពត ដ៏សាហាវយង់ឃ្នង និងបាននាំមកនូវសុខសន្តិភាព សិទ្ធិសេរីភាព សេចក្ដីថ្លៃថ្នូរ វឌ្ឍនភាពសង្គម នៅថ្ងៃទី៧ ខែមករា ឆ្នាំ១៩៧៩។ ដោយឡែក ខេត្តសៀមរាប ត្រូវបានរំដោះនៅថ្ងៃទី១០ ខែមករា ឆ្នាំ១៩៧៩ ដែលប្រជាជនកម្ពុជាទូទាំងប្រទេសចាត់ទុកជាថ្ងៃកំណើតលើកទី២ និងចងចាំជានិច្ចមិនអាចបំភ្លេចបានជារៀងដរាប។ 

ការចូលរួមប្រារព្ធពិធីដ៏មានសារៈសំខាន់នៅថ្ងៃនេះ គឺបានបញ្ជាក់ឱ្យឃើញថា ៤៥ឆ្នាំកន្លងផុតទៅ កម្ពុជាបានរំដោះខ្លួនចេញពីរបបកម្ពុជាប្រជាធិបតេយ្យខ្មែរក្រហម ហើយបានមកចូលរួមទាំងអស់គ្នា ដើម្បីរម្លឹកពីទុក្ខសោក និងការព្រាត់ប្រាស់ក្នុងរបបដ៏ខ្មៅយង់ឃ្នងនៅពេលកន្លងទៅ។ ជាពិសេស ការបានឃើញយ៉ាងច្បាស់នូវសមិទ្ធិផលដែលទទួលបានពីបាតដៃទទេ រហូតមកដល់បច្ចុប្បន្នដែលកើតចេញពីការតស៊ូ ការលះបង់របស់ថ្នាក់ដឹកនាំ និងបុព្វបុរសរបស់កម្ពុជា។ ក្នុងសារលិខិតនោះ ក៏បានគូសបញ្ជាក់ថា ខួបទិវាជ័យជម្នះ ៧មករា ឆ្នាំនេះ ប្រារព្ធឡើងក្នុងសភាពការដែលព្រះរាជាណាចក្រកម្ពុជា បានសម្រេចសមិទ្ធផលធំៗថ្មីទៀតលើគ្រប់វិស័យ បន្ទាប់ពីកម្ពុជាបានយកឈ្នះលើសមរភូមិ នៃវិបត្តិកូវីដ១៩ ដែលបានបើកប្រទេសឡើងវិញចាប់ពីចុងឆ្នាំ២០២១ និងបានកំពុងបន្តដំណើរទៅមុខប្រកបដោយភាពជឿជាក់លើមាគ៌ាសន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍ ។ 

បន្ថែមពីនេះ ក្នុងនាមជាអ្នកបន្តវេន ត្រូវមានទំនួលខុសត្រូវខ្ពស់ក្នុងការប្តេជ្ញាថែរក្សាសមិទ្ធផលដែលសម្រេចបានឱ្យគង់វង្សជាដរាប និងប្តេជ្ញារួមគ្នាការពារដាច់ខាត ថែរក្សាឱ្យបាននូវសន្តិភាព សន្តិសុខ និងស្ថិរភាពនយោបាយ រួមគ្នាពង្រឹងឯកភាពជាតិ សាមគ្គីភាពផ្ទៃក្នុងដ៏រឹងមាំ បង្កើនការរីកចម្រើនប្រកបដោយចីរភាព ដើម្បីធានាបាននូវអនាគតកម្ពុជា និងប្រជាជនកម្ពុជា ក៏ដូចជាអ្នកជំនាន់ក្រោយៗក្នុងការបន្តរស់នៅប្រកបដោយភាពសុខដុមរមនា ។

ឆ្លៀតឱកាសនោះដែរ គណៈប្រតិភូ ក៏បានអញ្ជើញចុះសួរសុខទុក្ខបងប្អូនប្រជាពលរដ្ឋ និងកងកម្លាំងដែលមានជំងឺ ដែលកំពុងសម្រាកព្យាបាលនៅតាមមន្ទីរពេទ្យ ដោយបាននាំយកអំណោយមួយចំនួនចែកជូននៅមន្ទីរពេទ្យបង្អែកខេត្ត និងមន្ទីរពេទ្យយោធភូមិភាគទី៤ ផងដែរ ៕                                                                                                

អត្ថបទ៖ គឿនវេត