ព័ត៌មានជាតិ

ក្រៅពីបង្កងធម្មជាតិ ខេត្តតាកែវមានកសិដ្ឋានចិញ្ចឹមបង្កងតូច-ធំ ១០ កន្លែង ផ្គត់ផ្គង់ទីផ្សារ

បានផុស

១២ ខែ មុន

នៅ

ថ្ងៃអង្គារ ១៦ មករា ២០២៤

ដោយ

បង្កងខេត្តតាកែវ ត្រូវបានចុះបញ្ជីសម្គាល់ភូមិសាស្ត្រដោយក្រសួងពាណិជ្ជកម្មកាលពីថ្ងៃទី២៦ ខែមេសា ឆ្នាំ២០២៣។ ក្រៅពីបង្កងធម្មជាតិមានតាមរដូវ បច្ចុប្បន្នទូទាំងខេត្តមានកសិដ្ឋានចិញ្ចឹមបង្កងតូច-ធំ សរុបជិត ១០ កសិដ្ឋាន។ នេះបើតាមការបញ្ចាក់របស់លោក ស៉ាប់ សារុន ប្រធានសមាគមអ្នកចិញ្ចឹមបង្កងខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៉ាប់ សារុន ប្រធានសមាគមអ្នកចិញ្ចឹមបង្កងខេត្តតាកែវបានឲ្យ «កម្ពុជាថ្មី» ដឹងថា នៅក្នុងខេត្តតាកែវផ្ទាល់បើរាប់បញ្ចូលទាំងកសិដ្ឋានតូច-ធំ បច្ចុប្បន្ននមានជិត ១០ កសិដ្ឋាន តាមស្រុកមួយចំនួនដូចជា ស្រុកអង្គរបុរី ស្រុកបុរីជលសារ ស្រុកកោះអណ្ដែត និងនៅក្នុងទីរួមខេត្តតាកែវផ្ទាល់។ ចំពោះកសិដ្ឋានទាំងអស់ទំហំមមានចាប់ពី ៤-៨ ហិតា ឬខ្លះទៀត ១០-៣០ហិតា។

លោក ស៉ាប់ សារុន គូសបញ្ជាក់ថា កសិដ្ឋានធំៗនៅក្នុងខេត្ត និងតាមស្រុកខ្លះដាក់កូនបង្កងឈានដល់ ៣០-៤០ ម៉ឺនកូន ដោយបច្ចុប្បន្ននេះមិនទាន់ធំធាត់នៅឡើយទេ។

ទាក់ទងការចិញ្ចឹមបង្កងនេះ បើតាមអះអាងពីប្រធានសមគម រាល់សហគមន៍ទាំងអស់សុទ្ធសឹងតែទទួលបានសិក្សាច្បាស់លាស់ពីបច្ចេកទេសនៃការចិញ្ចឹមបង្កង ស្របទៅតាមលក្ខណៈបច្ចេកទេសស្តង់ដារធម្មជាតិ។

បើតាមប្រធានសមាគមបង្កងខេត្តតាកែវ ពាក់ព័ន្ធបង្កងធម្មជាតិរបស់ខេត្តតាកែវ នៅក្នុងរយៈពេល ៣ ខែ កើនឡើងជាងឆ្នាំមុនដោយទទួលបានផលចន្លោះពី ១ តោន ដល់ ២តោន និងបានតម្លៃខ្ពស់ឈានដល់ ៤០-៥០ ដុល្លារក្នុងមួយគីឡូក្រាម៕