ព័ត៌មានជាតិ

១៩ វិស័យជំរុញឲ្យវិនិយោគ សម្រួលទាំងពន្ធដារពន្ធគយ បន្ថែមលើកទឹកចិត្តជាច្រើនទៀត

បានផុស

៩ ខែ មុន

នៅ

ថ្ងៃសុក្រ ១២ មករា ២០២៤

ដោយ

កម្ពុជាបានអនុម័តច្បាប់ស្តីពីវិនិយោគនៅថ្ងៃទី១៥ ខែតុលា ឆ្នាំ២០២១ ក្នុងគោលបំណងបង្កើតក្របខ័ណ្ឌគតិយុត្តដែលបើកចំហ មានតម្លាភាព ដើម្បីទាក់ទាញការវិនិយោគក្នុងស្រុក។

ច្បាប់ស្ដីពីវិនិយោគមានវិសាលភាពអនុវត្ត ចំពោះរាល់គម្រោងវិនិយោគដែលមានលក្ខណៈសម្បត្តិគ្រប់គ្រាន់ “គ. ល. គ.” គម្រោងពង្រីកនៃគម្រោងវិនិយោគមានលក្ខណៈសម្បត្តិគ្រប់គ្រាន់ ” គ. ព. គ. ល. គ.” និងគម្រោងវិនិយោគដែលទទួលបានត្រឹមតែការធានាលើការវិនិយោគ “គ. ធ.វ.” ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា ឬនៅអនុគណ:កម្មាធិការវិនិយោគរាជធានីខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់នេះផ្តល់ការលើកទឹកចិត្តដល់ការវិនិយោគលើវិស័យនិងសកម្មភាពសំខាន់ៗ តាមរយៈយន្តការនៃការលើកទឹកចិត្តផ្នែកពន្ធជាមូលដ្ឋាន ការលើកទឹកចិត្តបន្ថែម និងការលើកទឹកចិត្តពិសេស។

វិស័យនិងសកម្មភាពវិនិយោគចំនួន ១៩ ដែលទទួលបានការលើកទឹកចិត្តសម្រាប់ការវិនិយោគរួមមាន៖

១/ឧស្សាហកម្មដែលមានបច្ចេកវិទ្យាខ្ពស់ ប្រកបដោយនវានុវត្តន៍ និងការស្រាវជ្រាវ និងអភិវឌ្ឍន៏
២/ ឧស្សាហកម្ម ឬកម្មន្តសាលថ្មីៗ ផ្តល់តម្លៃបន្ថែមខ្ពស់ មាននវានុវត្តន៍ និងភាពប្រកួតប្រជែងខ្ពស់
៣/ ឧស្សាហកម្មបម្រើឱ្យខ្សែច្រវាក់ផលិតកម្មតំបន់និងសកលលោក
៤/ ឧស្សាហកម្មគាំទ្រពាក់ព័ន្ធនឹងវិស័យកសិកម្ម ទេសចរណ៍ កម្មន្តសាល ឧស្សាហកម្មបម្រើឱ្យខ្សែច្រវាក់ផលិតកម្មតំបន់និងសកលលោក និងឧស្សាហកម្មតភ្ជាប់បណ្ដាញផ្គត់ផ្គង់
៥/ ឧស្សាហកម្មគ្រឿងអគ្គិសនីនិងអេឡិចត្រូនិក
៦/ ឧស្សាហកម្មគ្រឿងបន្លាស់ បង្គុំ និងតម្លើង
៧/ ឧស្សាហកម្មមេកានិក និងគ្រឿងម៉ាស៊ីន
៨/ កសិកម្ម កសិឧស្សាហកម្ម ឧស្សាហកម្មកែច្នៃផលិតផលកសិកម្ម ឧស្សាហកម្មកែច្នៃ ចំណីអាហារដែលបម្រើទីផ្សារក្នុងស្រុក ឬការនាំចេញ
៩/ សហគ្រាសធុនតូចនិងមធ្យមក្នុងវិស័យអាទិភាព និងការអភិវឌ្ឍបណ្តំសហគ្រាសធុនតូច និងមធ្យម សួនឧស្សាហកម្ម និងសួនវិទ្យាសាស្ត្រ បច្ចេកវិទ្យា និងនវានុវត្តន៍
១០/ ឧស្សាហកម្មទេសចរណ៍និងសកម្មភាពពាក់ព័ន្ធទេសចរណ៍
១១/ ការអភិវឌ្ឍតំបន់សេដ្ឋកិច្ចពិសេស
១២/ ឧស្សាហកម្មឌីជីថល
១៣/ ការវិនិយោគក្នុងវិស័យអប់រំ ការបណ្តុះបណ្តាលវិជ្ជាជីវៈ និងការជំរុញផលិតភាព
១៤/ ការវិនិយោគក្នុងវិស័យសុខាភិបាល
១៥/ ការអភិវឌ្ឍហេដ្ឋារចនាសម្ព័ន្ធរូបវន្ត
១៦/ វិនិយោគក្នុងវិស័យឡូជីស្ទីក
១៧/ ការវិនិយោគក្នុងការគ្រប់គ្រង ការការពារបរិស្ថាន និងការអភិរក្សជីវៈចម្រុះ និងសេដ្ឋកិច្ចចក្រា
១៨/ ការវិនិយោគក្នុងវិស័យថាមពលបៃតង បច្ចេកវិទ្យាដែលរួមចំណែកដល់ការបន្សំ និង ការកាត់បន្ថយការប្រែប្រួលអាកាសធាតុ
១៩/ វិស័យនិងសកម្មភាពវិនិយោគផ្សេងទៀត ដែលមិនមានចែងក្នុងច្បាប់នេះ ក្នុងករណី ដែលរាជរដ្ឋាភិបាលយល់ឃើញថាមានសក្តានុពលដល់ការអភិវឌ្ឍសង្គម-សេដ្ឋកិច្ច។

ការលើកទឹកចិត្តជាមូលដា្ឋន

សកម្មភាពវិនិយោគដែលបានចុះបញ្ជីជាគម្រោងវិនិយោគដែលមានលក្ខណៈសម្បត្តិគ្រប់គ្រាន់ “គ. ល. គ.” មានសិទ្ធិជ្រើសរើសកញ្ចប់លើកទឹកចិត្តមូលដ្ឋាន ០២ ជម្រើសដូចខាងក្រោម៖

ជម្រើសទី១ – ការលើកលែងពន្ធលើប្រាក់ចំណូល

ការលើកលែងពន្ធលើប្រាក់ចំណូលសម្រាប់រយៈពេលពី ៣ ទៅ ៩ ឆ្នាំ ទៅតាមវិស័យនិងសកម្មភាពវិនិយោគគិតចាប់ពីពេលទទួលបានប្រាក់ចំណូលលើកដំបូង។ វិស័យនិងសកម្មភាពវិនិយោគ ព្រមទាំងរយៈពេលលើកលែងពន្ធលើប្រាក់ចំណូល នឹងត្រូវកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រង និង/ឬអនុក្រឹត្យ។

បន្ទាប់ពីផុតរយៈពេលលើកលែងពន្ធលើប្រាក់ចំណូល គម្រោងវិនិយោគដែលមានលក្ខណៈសម្បត្តិគ្រប់គ្រាន់មានសិទ្ធិទទួលបានការលើកទឹកចិត្តឱ្យបង់ពន្ធលើប្រាក់ចំណូលតាមអត្រាកំណើនតាមពេល ធៀបទៅនឹងប្រាក់ពន្ធត្រូវបង់សរុបដូចតទៅ៖ ២៥% សម្រាប់ ២ ឆ្នាំដំបូង, ៥០% សម្រាប់ ២ ឆ្នាំបន្ទាប់, និង ៧៥% សម្រាប់ ២ ឆ្នាំចុងក្រោយ។

លើសពីនេះទៀតជម្រើសនេះរួមបញ្ចូល៖

-ការលើកលែងប្រាក់រំដោះពន្ធលើប្រាក់ចំណូល ក្នុងអំឡុងពេលលើកលែងពន្ធលើប្រាក់ចំណូល
-ការលើកលែងពន្ធអប្បបរមា ដោយត្រូវមានរបាយការណ៍សវនកម្មឯករាជ្យ
-ការលើកលែងអាករនាំចេញ លើកលែងតែមានចែងដោយឡែកនៅក្នុងច្បាប់និងលិខិត បទដ្ឋានគតិយុត្តផ្សេងទៀត

ជម្រើសទី២- ការរំលស់ពិសេស

-សិទ្ធិកាត់កងចំណាយមូលធន តាមរយៈការរំលស់ពិសេសដែលមានចែងក្នុងបទប្បញ្ញត្តិស្តីពីពន្ធដារជាធរមាន
-សិទ្ធិកាត់កងរហូតដល់ ២០០% លើចំណាយជាក់លាក់ផ្សេងទៀតសម្រាប់រយៈពេលរហូតដល់ ៩ ឆ្នាំ។ វិស័យ និង សកម្មភាពវិនិយោគ និងចំណាយជាក់លាក់ ព្រមទាំងរយៈពេលកាត់កងចំណាយ ត្រូវកំណត់ក្នុងច្បាប់ស្តីពីហិរញ្ញវត្ថុ សម្រាប់ការគ្រប់គ្រង និង/ឬអនុក្រឹត្យ
-ការលើកលែងប្រាក់រំដោះពន្ធលើប្រាក់ចំណូលក្នុងរយះពេលជាក់លាក់ណាមួយ ទៅតាមវិស័យនិងសកម្មភាពវិនិយោគ ដែលត្រូវកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងនិង/ឬអនុក្រឹត្យ
-ការលើកលែងពន្ធអប្បបរមា ដោយត្រូវមានរបាយការណ៍សវនកម្មឯករាជ្យ
-ការលើកលែងអាករនាំចេញ លើកលែងតែមានចែងដោយឡែកនៅក្នុងច្បាប់ និងលិខិតបទដ្ឋានគតិយុត្តផ្សេងទៀត។

បន្ថែមពីលើការលើកទឹកចិត្តក្នុងជម្រើសទី១ ឬជម្រើសទី២៖

ក. គម្រោងវិនិយោគដែលមានលក្ខណៈសម្បត្តិគ្រប់គ្រាន់ដែលបម្រើឱ្យការនាំចេញនិងជាប្រភេទឧស្សាហកម្មគាំទ្រដល់គម្រោងវិនិយោគបម្រើឱ្យការនាំចេញ មានសិទ្ធិនាំចូលនូវសម្ភារៈសាងសង់ បរិក្ខារសំណង់ សម្ភារៈបរិក្ខារ ផលិតកម្ម និងធាតុចូលផលិតកម្មដោយពន្ធគយ អាករពិសេស អាករលើតម្លៃបន្ថែម ជាបន្ទុករបស់រដ្ឋ។

ខ. គម្រោងវិនិយោគដែលមានលក្ខណៈសម្បត្តិគ្រប់គ្រាន់បម្រើទីផ្សារក្នុងស្រុក មានសិទ្ធិនាំចូលដោយពន្ធគយ អាករពិសេស និងអាករលើតម្លៃបន្ថែម សម្រាប់ការនាំចូលសម្ភារៈសាងសង់ បរិក្ខារសំណង់ និងសម្ភារៈបរិក្ខារ ផលិតកម្ម។ ការលើកទឹកចិត្តចំពោះធាតុចូលផលិតកម្ម ត្រូវកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រង និង/ ឬអនុក្រឹត្យ។

ការលើកទឹកចិត្តបន្ថែម

ក្រៅពីការលើកទឹកចិត្តជាមូលដ្ឋាន សកម្មភាពវិនិយោគដែលបានចុះបញ្ជីជាគម្រោងវិនិយោគដែលមានលក្ខណៈសម្បត្តិគ្រប់គ្រាន់ ទទួលបានការលើកទឹកចិត្តបន្ថែមដូចខាងក្រោម៖

-ការលើកលែងអាករលើតម្លៃបន្ថែម ចំពោះការទិញធាតុចូលផលិតកម្មដែលផលិតក្នុងស្រុកសម្រាប់បម្រើដល់ការអនុវត្ត.
-ការកាត់កងចំណាយក្នុងអត្រា ១៥០% ពីមូលដ្ឋានគិតពន្ធចំពោះសកម្មភាពណាមួយដូចខាងក្រោម៖

ក. ការស្រាវជ្រាវ អភិវឌ្ឍន៍ និងនវានុវត្តន៍
ខ. ការអភិវឌ្ឍធនធានមនុស្ស តាមរយៈការផ្តល់ការបណ្តុះបណ្តាលវិជ្ជាជីវៈ និង ជំនាញដល់កម្មករនិយោជិតខ្មែរ
គ. ការសាងសង់កន្លែងស្នាក់នៅ កន្លែងបរិភោគអាហារ ឬអាហារដ្ឋានតម្លៃសមរម្យ ទារកដ្ឋាន និងសុខូបត្ថម្ភវត្ថុ ដទៃទៀតសម្រាប់កម្មករ/ និយោជិត
ឃ. ការធ្វើទំនើបកម្មលើគ្រឿងម៉ាស៊ីនដើម្បីបម្រើខ្សែច្រវាក់ផលិតកម្ម
ង. ការផ្ដល់ការលើកកម្ពស់សុខុមាលភាពដល់កម្មករនិយោជិតខ្មែរដូចជាការផ្តល់ មធ្យោបាយដឹកជញ្ជូនប្រកបដោយផាសុកភាពដល់កម្មករនិយោជិតក្នុងការ ធ្វើដំណើរទៅមកពីកន្លែងស្នាក់នៅទៅរោងចក្រ កន្លែងស្នាក់នៅ កន្លែងបរិភោគអាហារ ឬអាហារដ្ឋានដែលមានតម្លៃសមរម្យ ទារកដ្ឋាន និងសុខូបត្ថម្ភវត្ថុដទៃទៀត

-ការលើកលែងពន្ធលើប្រាក់ចំណូលចំពោះការពង្រីកគម្រោងវិនិយោគដែលមានលក្ខណៈសម្បត្តិគ្រប់គ្រាន់ដែលត្រូវកំណត់ដោយអនុក្រឹត្យ។

ការលើកទឹកចិត្តពិសេស

វិស័យនិងសកម្មភាពវិនិយោគជាក់លាក់ណាមួយ ដែលមានសក្ដានុពលខ្ពស់ក្នុងការរួមចំណែកដល់ការអភិវឌ្ឍសេដ្ឋកិច្ចជាតិ អាចទទួលការលើកទឹកចិត្តពិសេសដោយឡែកផ្សេងទៀតដែលត្រូវកំណត់នៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រង។

ការធានាវិនិយោគ

ច្បាប់វិនិយោគក៏បានចែងអំពីការធានានិងការការពារវិនិយោគ។

ការមិនរើសអើងក្នុងករណីដែលមានការខូចខាតការវិនិយោគ៖

វិនិយោគិន នឹងទទួលបាននូវប្រព្រឹត្តកម្មមិនរើសអើងទាក់ទងនឹងបដិទានសំណង ឬដំណោះស្រាយជាតម្លៃសេដ្ឋកិច្ចផ្សេងទៀត ក្នុងករណីដែលការវិនិយោគរបស់ខ្លួនទទួលរងនូវការខូចខាតដោយសារជម្លោះប្រដាប់អាវុធ កលិយុគស៊ីវិល ឬការដាក់ប្រទេសជាតិនៅក្នុងភាពអាសន្ន ប្រសិនបើមានច្បាប់និងគោលនយោបាយរបស់រាជរដ្ឋាភិបាលកម្ពុជាស្តីពីការធ្វើបដិទានឬផ្តល់សំណងសមរម្យណាមួយ។

ការមិនរើសអើងចំពោះសញ្ជាតិបរទេស៖

វិនិយោគិនបរទេសមិនត្រូវជាកម្មវត្ថុនៃការរើសអើង ដោយសារមូលហេតុសញ្ជាតិបរទេស លើកលែងតែកម្មសិទ្ធិលើដីធ្លីដូចដែលមានចែងក្នុងរដ្ឋធម្មនុញ្ញព្រះរាជាណាចក្រកម្ពុជានិងបទប្បញ្ញត្តិទាំងឡាយជាធរមាន។

ការមិនធ្វើជាតូបនីយកម្ម៖

រដ្ឋមិនត្រូវធ្វើជាតូបនីយកម្ម ដែលនាំឱ្យប៉ះពាល់ដល់ទ្រព្យសម្បត្តិរបស់វិនិយោគិន ក្នុងព្រះរាជាណាចក្រកម្ពុជាឡើយ។

ការមិនធ្វើអស្សាមិករណ៍៖

រដ្ឋមិនធ្វើអស្សាមិករណ៍នាំឱ្យប៉ះពាល់ដល់គម្រោងវិនិយោគដែលបានទទួលការអនុម័តនោះឡើយ ទោះបីដោយផ្ទាល់ឬដោយប្រយោល ឬតាមរយៈវិធានការប្រហាក់ប្រហែល លើកលែងតែក្នុងករណីបម្រើប្រយោជន៍សាធារណៈដែលការធ្វើអស្សាមិករណ៍នេះត្រូវអនុវត្តតាមលក្ខខណ្ឌដូចខាងក្រោម៖

១. ភាពមិនរើសអើង
២. សំណងដោយសមរម្យនិងយុត្តិធម៌
៣. អនុលោមតាមច្បាប់និងនីតិវិធីអស្សាមិករណ៍ជាធរមាន។

ការមិនកំណត់ថ្លៃ៖

រាជរដ្ឋាភិបាលកម្ពុជា មិនត្រូវកំណត់ថ្លៃលើផលិតផលឬសេវានានាដែលបង្កើតដោយគម្រោងវិនិយោគនោះទេ។

ការទិញនិងបង្វិលទៅបរទសរូបិយបណ្ណបរទេសដោយសេរី៖

អនុលោមតាមច្បាប់និងបទប្បញ្ញត្តិជាធរមាន វិនិយោគិនមានសិទ្ធិទិញរូបិយបណ្ណបរទេសដោយសេរី និងធ្វើការបង្វិលទៅបរទេសនូវរូបិយបណ្ណបរទេសទាំងអស់នោះ ដើម្បីទូទាត់កាតព្វកិច្ចខាងហិរញ្ញវត្ថុដែលពាក់ព័ន្ធនឹងការវិនិយោគរបស់ខ្លួន តាមរយៈប្រព័ន្ធធនាគារដែលជាអន្តរការីប្រតិបត្តិ។

ការការពារកម្មសិទ្ធិបញ្ញា

កម្មសិទ្ធិបញ្ញារបស់វិនិយោគិនត្រូវបានការពារដោយអនុលោមតាមច្បាប់ និងលិខិតបទដ្ឋានគតិយុត្តពាក់ព័ន្ធនឹងកម្មសិទ្ធិបញ្ញានៃព្រះរាជាណាចក្រកម្ពុជា។

កម្មសិទ្ធិដីធ្លី៖

កម្មសិទ្ធិលើដីធ្លីរបស់វិនិយោគិនសម្រាប់បម្រើឱ្យគោលដៅអនុវត្តគម្រោងវិនិយោគ ត្រូវបានអនុញ្ញាតចំពោះតែបុគ្គលដែលមានសញ្ជាតិខ្មែរស្របតាមច្បាប់ និងលិខិតបទដ្ឋានគតិយុត្តជាធរមាន។ វិនិយោគិនមានសិទ្ធិប្រើប្រាស់ដីធ្លីតាមរយៈជាអាទិ៍ សម្បទានដីសេដ្ឋកិច្ច ឬសិទ្ធិជួលអចិន្ត្រៃយ៍ និងការជួលដែលមានអំឡុងពេលកំណត់ស្របតាមច្បាប់ និងលិខិតបទដ្ឋានគតិយុត្តិជាធរមាន។

វិនិយោគិនក៍មានសិទ្ធិដូចខាងក្រោម៖

១. សិទ្ធិជួលនិយោជិតបរទេសដើម្បីគ្រប់គ្រង ឬប្រតិបត្តិការគម្រោងវិនិយោគក្នុងចំនួនមិនលើសពីចំនួនដែលកំណត់ដោយច្បាប់ និងលិខិតបទដ្ឋានគតិយុត្តជាធរមាន ក្នុងករណីពុំអាចរក និយោជិតខ្មែរដែលមានជំនាញដើម្បីគ្រប់គ្រង ឬប្រតិបត្តិការគម្រោងវិនិយោគនោះ។ ការអនុញ្ញាត ឱ្យជួលនិយោជិតបរទេសគឺត្រូវពិនិត្យទៅតាមស្ថានភាពជាក់ស្តែង និងពុំមានលក្ខណៈអចិន្ត្រៃយ៍ទេ។
២. សិទ្ធិទទួលបានការអនុញ្ញាតស្នាក់នៅបណ្តោះអាសន្នរយៈពេលវែង សម្រាប់ខ្លួនឯងផ្ទាល់ សហព័ទ្ធ និងកូន ដែលជាអនីតិជនក្នុងអំឡុងពេលដែលគម្រោងវិនិយោគរបស់ខ្លួនមានប្រតិបត្តិការ។
៣. សិទ្ធិស្នើសុំការអនុញ្ញាតស្នាក់នៅ បណ្តោះអាសន្នរយៈពេលវែងសម្រាប់និយោជិកបរទេស សហព័ទ្ធ និងកូនដែលជាអនីតិជនក្នុងអំឡុងពេលកិច្ចសន្យាការងារនៅមានសុពលភាព។
៤. សិទ្ធិទទួលបានបណ្ណការងារ និង សៀវភៅការងារសម្រាប់ខ្លួនឯងផ្ទាល់ និង និយោជិកបរទេសរបស់ខ្លួន។

ក្រុមប្រឹក្សាអភិវឌ្ឍន៍កម្ពុជា ឬអនុគណៈកម្មាធិការវិនិយោគរាជធានីខេត្ត ត្រូវចេញលិខិតបញ្ជាក់អំពីឋានៈជាវិនិយោគិនជូនបុគ្គលពាក់ព័ន្ធក្នងគម្រោងវិនិយោគទៅតាមការស្នើសុំរបស់វិនិយោគិន ដើម្បីប្រើប្រាស់សម្រាប់ការស្នើសុំការអនុញ្ញាតស្នាក់នៅបណ្តោះអាសន្នរយៈពេលវែង បណ្ណការងារនិងសៀវភៅការងារ និងគោលបំណងចាំបាច់ដទៃទៀតស្របតាមនីតិវិធីជាធរមាន។

គួរបញ្ជាក់ថា ច្បាប់ស្ដីពីវិនិយោគបង្កើតឱ្យមាននូវក្របខ័ណ្ឌច្បាប់ថ្មី ដែលមានលក្ខណៈអំណោយផលដល់ការវិនិយោគ ជាពិសេសបង្កើតនូវក្របខ័ណ្ឌលើកទឹកចិត្តវិនិយោគដ៏សំខាន់មួយសម្រាប់វិស័យ និងសកម្មភាពវិនិយោគចំនួន ១៩ រួមទាំងការវិនិយោគលើហេដ្ឋារចនាសម្ព័ន្ធឌីជីថល ការគ្រប់គ្រងនិងការពារបរិស្ថាន ប្រសិទ្ធផលថាមពល ទេសចរណ៍ ការបណ្តុះបណ្តាលវិជ្ជាជីវៈ ឡូជីស្ទីក និងការស្រាវជ្រាវ និងអភិវឌ្ឍន៍ និងហេដ្ឋារចនាសម្ព័ន្ធជាដើម។

ច្បាប់នេះត្រូវបានរំពឹងថានឹងបង្កើនសមត្ថភាពប្រកួតប្រជែង និងភាពទាក់ទាញរបស់កម្ពុជា ក្នុងស្មារតីនៃការធ្វើពិពិធកម្មមូលដ្ឋានសេដ្ឋកិច្ច គាំទ្រនវានុវត្តន៍ និងជំរុញការស្តារសេដ្ឋកិច្ចឡើងវិញ៕