ឯកឧត្ដម ហ៊ុន ម៉ានី ៖ «ប្រពៃណីក្រុមគ្រួសារគណបក្សប្រជាជនកម្ពុជា តែងតែយកចិត្តទុកដាក់ និងដឹងពីសុខទុក្ខគ្នាទៅវិញទៅមក»

ឯកឧត្ដម ហ៊ុន ម៉ានី សមាជិក​គណៈ​អចិន្ត្រៃយ៍​គណៈកម្មាធិការ​កណ្ដាល និង​ជា​ប្រធាន​ក្រុម​ការងារ​គណបក្ស​ចុះ​ជួយ​ខេត្ត​កំពង់ស្ពឺ បាន​លើក​ឡើង​ថា ប្រពៃណី​របស់​ក្រុម​គ្រួសារ​គណបក្ស​ប្រជាជន​កម្ពុជា គឺ តែងតែ​យកចិត្តទុកដាក់ និង​ដឹង​ពី​សុខទុក្ខ​គ្នា​ទៅវិញទៅមក។

ការ​លើក​ឡើង​នេះ ក្នុង​ឱកាស ឯកឧត្ដម ហ៊ុន ម៉ានី សមាជិក​គណៈ​អចិន្ត្រៃយ៍​គណៈកម្មាធិការ​កណ្ដាល និង​ជា​ប្រធាន​ក្រុម​ការងារ​គណបក្ស​ចុះ​ជួយ​ខេត្ត​កំពង់ស្ពឺ បាន​អញ្ជើញ​ជួប​សំណេះ​សំណាល​ជាមួយ​ក្រុម​ប្រឹក្សា​ឃុំ​-​សង្កាត់ នៃ​ខេត្ត​កំពង់ស្ពឺ ឆ្ពោះ​ទៅ​កាន់​ការ​បោះឆ្នោត​ព្រឹទ្ធសភា​នីតិកាល​ទី ៥ ឆ្នាំ ២០២៤ នៃ​ភូមិភាគ​ទី ៧ នៅ​មន្ទីរ​គណបក្ស​ខេត្ត កាលពី​ព្រឹក​ថ្ងៃ​ទី ១៣ ខែ​មករា ឆ្នាំ ២០២៤។

នា​ឱកាស​នោះ ឯកឧត្ដម ហ៊ុន ម៉ានី បាន​លើក​ឡើង​ថា «ប្រពៃណី​របស់​ក្រុម​គ្រួសារ​គណបក្ស​ប្រជាជន​កម្ពុជា គឺ តែងតែ​យកចិត្តទុកដាក់ និង​ដឹង​ពី​សុខទុក្ខ​គ្នា​ទៅវិញទៅមក​»។ ឯកឧត្ដម គូស​បញ្ជាក់​ថា ភាព​ជោគជ័យ​កាលពី​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ​-​សង្កាត់ និង​ការ​បោះឆ្នោត​ជ្រើសតាំង​តំណាងរាស្ត្រ នីតិកាល​ទី ៧ កើត​ចេញពី​ការ​គាំទ្រ​របស់​ប្រជាជន និង​គណៈកម្មាធិការ​ខេត្ត ក្រុង ស្រុក ដែល​បាន​ចូលរួម​គាំទ្រ ជាពិសេស​តាមរយៈ​ការ​ឃោសនា​បោះឆ្នោត។ ដោយឡែក​សម្រាប់​ការ​បោះឆ្នោត​ជ្រើសតាំង​សមាជិក​ព្រឹទ្ធសភា នីតិកាល​ទី ៥ គឺ ពិត​ណាស់ ក្រុម​ប្រឹក្សា​ឃុំ​-​សង្កាត់ នឹង​ជួយ​គាំទ្រ​ដល់​បេក្ខជន​សមាជិក​ព្រឹទ្ធសភា​វិញ​ម្ដង។

ជាមួយ​នេះ ឯកឧត្ដម ហ៊ុន ម៉ានី បាន​សម្ដែង​នូវ​ភាព​ជឿជាក់ និង​ទំនុក​ចិត្ត​លើ​ថ្នាក់​ដឹកនាំ​ឃុំ-សង្កាត់​ទាំងអស់ ទាំង​ស្មារតី និង​សមត្ថភាព នៃ​ការ​បំពេញ​ការងារ ដែល​ធានា​បាន​នូវ​និរន្តរភាព​របស់​ប្រទេស​ជាតិ។ ទន្ទឹម​នេះ ឯកឧត្ដម ក៏បាន​លើក​ទឹកចិត្ត​ឲ្យ​ប្រជាពលរដ្ឋ​ថែទាំ​សុខភាព ថែរក្សា​ឲ្យ​បាន​នូវ​ឯកសារ​សម្រាប់​បម្រើ​ការ​បោះឆ្នោត និង​ត្រៀមខ្លួន​ចេញ​ទៅ​បោះឆ្នោត​ជ្រើសតាំង​សមាជិក​ព្រឹទ្ធសភា នីតិកាល​ទី ៥ នៅ​ថ្ងៃ​ទី ២៥ ខែ​កុម្ភៈ ឆ្នាំ ២០២៤ ខាងមុខនេះ។

ផ្សារភ្ជាប់​ការ​លើក​ឡើង​ខាង​លើ​នេះ ឯកឧត្ដម ហ៊ុន ម៉ានី ក៏បាន​គូស​បញ្ជាក់​ដែរ​ថា « កត្តា សាមគ្គី ឯកភាព ជំនឿ​ទុកចិត្ត ការ​ដោះស្រាយ​បញ្ហា​ផ្ទៃក្នុង​របស់​គណបក្ស​ប្រជាជន​កម្ពុជា គឺ ធានា​នូវ​និរន្តរភាព និង​ការ​អភិវឌ្ឍ​ទៅ​មុខ​របស់​ប្រទេសជាតិ​»។ ក្នុង​នោះ ឯកឧត្ដម បាន​រំលេច​បន្ថែម​ថា ទោះ​គណបក្ស​ប្រជាជន​កម្ពុជា មិន​ល្អ​ឥត​ខ្ចោះ តែ​អាច​ពឹង​ពាក់ និង​ជួយ​គ្នា​បាន​គ្រប់​កាលៈទេសៈ។ គណបក្ស​ប្រជាជន​កម្ពុជា នឹង​ខិតខំ​បន្ត​ក្នុង​ការ​ថែរក្សា និង​ធានា​ឲ្យ​បាន​នូវ​ផលប្រយោជន៍​ជូន​ប្រជាជន និង​ប្រទេសជាតិ។

សូម​ជម្រាប​ថា ក្នុង​ពិធី​សំណេះសំណាល​ខាង​លើ​នេះ ក៏​មាន​ការ​អញ្ជើញ​ចូលរួម​ពីសំណាក់ ឯកឧត្ដម លោកជំទាវ សមាជិក​ព្រឹទ្ធសភា រដ្ឋសភា ឯកឧត្ដម លោកជំទាវ​បេក្ខជន សមាជិក​ព្រឹទ្ធសភា ភូមិភាគ ៧ ឯកឧត្ដម​ប្រធាន​គណបក្ស​ខេត្ត ឯកឧត្ដម លោកជំទាវ លោក លោកស្រី​ក្រុម​ប្រឹក្សា ឃុំ សង្កាត់ ទាំង ៥៩៧ នាក់ ផង​ដែរ៕