លោក កែវ រ៉េមី ៖ ស្ថានភាពសិទ្ធិមនុស្សក្នុងពន្ធនាគារ មណ្ឌលអប់រំកែប្រែ និងមណ្ឌលស្តារនីតិសម្បទា មានភាពល្អប្រសើរ

លោក កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា បានលើកឡើងថា ស្ថានភាពសិទ្ធិមនុស្ស នៅក្នុងពន្ធនាគារ មណ្ឌលអប់រំកែប្រែ និងមណ្ឌលស្តារនីតិសម្បទា គឺមានភាពល្អប្រសើរ។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការសិទ្ធមនុស្សកម្ពុជា បានឲ្យដឹង កាលពីព្រឹកថ្ងៃទី ១៥ ខែមករា ឆ្នាំ ២០២៤ នេះ។

តាមរយៈសេចក្តីប្រកាសព័ត៌មានរបស់គណៈកម្មាធិការសិទ្ធមនុស្សកម្ពុជា ស្តីពី«លទ្ធផលជំនួបរវាង លោក កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា ជាមួយ លោក Igor Driesmans ឯកអគ្គរដ្ឋទូត នៃស្ថានប្រតិភូសហភាពអឺរ៉ុប ប្រចាំព្រះរាជាណាចក្រកម្ពុជា» បានសរសេរយ៉ាងដូច្នេះថា នៅព្រឹកថ្ងៃទី ១៥ ខែមករា ឆ្នាំ ២០២៤ លោក កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា បានអនុញ្ញតឱ្យ លោក Igor Driesmans ឯកអគ្គរដ្ឋទូត នៃស្ថានប្រតិភូសហភាពអឺរ៉ុប ប្រចាំព្រះរាជាណាចក្រកម្ពុជា ចូលជួបសម្ដែងការគួរសម នៅសាលប្រជុំគណៈកម្មាធិការសិទ្ធិមនុស្សកម្ពុជា (គ.ស.ម) និងកិច្ចសហការរវាង គ.ស.ម.ក និងសហភាពអឺរ៉ុប នាពេលអនាគត។

សេចក្តីប្រកាសព័ត៌មានដដែល សរសេរបន្តថា ជាកិច្ចចាប់ផ្តើម លោក កែវ រ៉េមី បានសម្តែងការស្វាគមន៍ចំពោះ លោក Igor Driesmans និង គណៈប្រតិភូ និងបានគូសបញ្ជាក់ពីការរៀបចំរបាយការណ៍ នៃការពិនិត្យឡើងវិញជាសកលតាមកាលកំណត់ (UPR) ជុំទី ៤ ដោយបានពិគ្រោះយោបល់ជាមួយអន្តរក្រសួង និងភាគីពាក់ព័ន្ធរួចរាល់ហើយ និងត្រៀមដាក់ជូន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ពិនិត្យ និងសម្រេច មុននឹងបញ្ជូនទៅក្រសួងការបរទេស និងសហប្រតិបត្តិការអន្តរជាតិ ដើម្បីបន្តនីតិវិធី។ បន្ថែមពីនេះ លោកទេសរដ្ឋមន្ត្រី ក៏បានលើកឡើងពីសេចក្តីព្រាងច្បាប់ស្តីពីការបង្កើតស្ថាប័នសិទ្ធិមនុស្សជាតិ ដែលផ្អែកលើគោលការណ៍ ទីក្រុងប៉ារីស និងបទដ្ឋានសិទ្ធិមនុស្សអន្តរជាតិ និងបានសហការជាមួយឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា (OHCHR) រៀបចំកិច្ចពិគ្រោះយោបល់ចំនួន ៣២ លើក ដែលមានការចូលរួមពីភាគីពាក់ព័ន្ធ ហើយបញ្ជូនទៅទីស្តីការគណៈរដ្ឋមន្ត្រី នៅថ្ងៃទី ១៩ ខែកញ្ញា ឆ្នាំ ២០២៣ និងបានជួបពិគ្រោះយោបល់ជាមួយក្រុមប្រឹក្សាអ្នកច្បាប់ នៅថ្ងៃទី ១៩ ខែធ្នូ ឆ្នាំ ២០២៣។

ជាមួយគ្នានេះ បើតាមសេចក្តីប្រកាសព័ត៌មាន លោកទេសរដ្ឋមន្ត្រី បានលើកឡើងពីការចុះពិនិត្យស្ថានភាពសិទ្ធិមនុស្សជាប្រចាំនៅកន្លែងឃុំឃាំង ដូចជា ពន្ធនាគារ មណ្ឌលអប់រំកែប្រែ និងមណ្ឌលស្តារនីតិសម្បទា និងបានវាយតម្លៃថា គឺមានភាពល្អប្រសើរ។ ទន្ទឹមនេះ លោកទេសរដ្ឋមន្ត្រី ក៏បានស្នើដល់ ឯកអគ្គរដ្ឋទូត ពិនិត្យលទ្ធភាពក្នុងការពង្រឹងកិច្ច សហការរវាង គ.ស.ម.ក. និងស្ថានប្រតិភូសហភាពអឺរ៉ុបប្រចាំព្រះរាជាណាចក្រកម្ពុជា រួមជាមួយនឹង OHCHR លើវិស័យសិទ្ធិមនុស្សផងដែរ។

ចុងបញ្ចប់ នៃជំនួបនេះ លោក Igor Driesmans បានថ្លែងអំណរគុណចំពោះ លោក កែវ រ៉េមី ដែលចំណាយពេលដ៏មមាញឹកអនុញ្ញាតឱ្យ លោក និងគណៈប្រតិភូ ចូលជួបសម្តែងការគួរសម និងបានកោតសរសើរពីកិច្ចខិតខំរបស់ គ.ស.ម.ក. ក្នុងការលើកកម្ពស់ និងការការពារសិទ្ធិមនុស្សនៅប្រទេសកម្ពុជា។ ទន្ទឹមនេះ ឯកអគ្គរដ្ឋទូត បានស្វាគមន៍ចំពោះសំណើរបស់លោកទេសរដ្ឋមន្ត្រី លើការពង្រឹងកិច្ចសហការរវាង គ.ស.ម.ក. និងស្ថានប្រតិភូអឺរ៉ុបប្រចាំប្រទេសកម្ពុជា រួមជាមួយនឹង OHCHR លើវិស័យសិទ្ធិមនុស្សនៅកម្ពុជា៕