ភ្ញៀវទេសចរឆ្លងកាត់បាត់ដំបងកុំភ្លេចចូលភ្លក់កណ្ដុរអាំងអូរតាគី

បើគេនិយាយអំពីឈ្មោះសត្វកណ្ដុរគឺជាពពួកសត្វចង្រៃម្យ៉ាងដែលគួរឲ្យខ្ពើមរអើមដែលអ្នកផងទាំងឡាយមិនចង់ឮឈ្មោះដោយសារតែពពួកសត្វប្រភេទនេះ វាមានលក្ខណៈស្មោកគ្រោកនេះបើយើងនិយាយអំពីសត្វកណ្ដុរដែលរស់នៅតាមភូមិនិងតាមគំនរសំរាម។

គួរបញ្ជាក់ដែរថា សត្វកណ្ដុរគឺស្ថិតក្នុងជំពូកសត្វចង្រៃ និងជាប្រភេទថនិកសត្វដែលចិញ្ចឹមកូនដោយទឹកដោះហើយសត្វទាំងនេះគឺកាត់បំផ្លាញគ្មានសល់តាំងពីសម្ភារៈក្នុងផ្ទះគឺពួកវាកាត់បំផ្លាញគ្មានរើសមុខមិនថាឡើយមុងភួយសម្លៀកបំពាក់និងខ្សែភ្លើងជាដើម៘ រហូតដល់ដំណាំក្នុងស្រែចម្ការដោយពួកវាចេញទាំងហ្វូងទាំងហ្វូងធ្វើការកាត់បំផ្លាញផលដំណាំរបស់ប្រជាកសិករ។

លោក ម៉ុង កក្កដា ជាអ្នកអាំង និងឆ្អើរសត្វកណ្ដុរលក់ស្ថិតនៅតាមបណ្ដោយផ្លូវជាតិលេខ៥ ត្រង់ចំណុចភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង បានរៀបរាប់ថា ថ្វីបើសត្វកណ្ដុរជាពពួកសត្វចង្រៃព្រមទាំងមានភាពស្មោក​គ្រោកក៏ពិតមែន ប៉ុន្តែសម្រាប់សត្វកណ្ដុរដែលលោកទិញយកមកអាំងលក់នៅទីនេះ គឺជាសត្វកណ្ដុរស្រែដែលប្រជាកសិករដាក់អន្ទាក់ ឬបរបាញ់នៅពេលយប់ក្រោយពីពួកគាត់ប្រមូលផលស្រូវរួចមក។

លោកបានបន្តទៀតថា ស្រែស្រូវដែលប្រជាកសិករប្រមូលផលរួច គឺសត្វកណ្ដុរតែងតែចេញមករកស៊ីគ្រាប់ស្រូវទាំងហ្វូងទាំងហ្វូងពិសេសគឺនៅរាត្រីខែភ្លឺដែលធ្វើឲ្យអ្នកភូមិ និងប្រជាកសិករដេញប្រមាញ់ដាក់អន្ទាក់ និងបរបាញ់នៅពេលយប់ដើម្បីយកមកលក់ឲ្យរូបលោកដែលជាអ្នកអាំងលក់បន្ត។

ចំពោះតម្លៃវិញលោកបានបន្ថែមថា គឺលោកទិញក្នុងមួយគីឡូក្រាមមួយម៉ឺនរៀលដោយពន្លះស្បែករួចជាស្រេចហើយលោកយកមកប្រឡាក់គ្រឿងដើម្បីឲ្យមានរសជាតិឆ្ងាញ់ហើយអាំងនិងឆ្អើលឡើងពណ៌ក្រហមសម្រាប់ទាក់ទាញភ្ញៀវទេសចរដែលឆ្លងកាត់ទីតាំងនេះរាល់ថ្ងៃការប្រកបរបរលក់សត្វកណ្ដុរអាំងគឺដាច់គ្រាន់បើវាជាមុខរបរមួយសុច្ចរិត និងទប់ទល់ទ្រទ្រង់ជីវភាពប្រចាំថ្ងៃរបស់គ្រួសារលោក។ លោកក៏បានផ្ដាំផ្ញើផងដែរថា បើភ្ញៀវទេសចរបានធ្វើដំណើរឆ្លងកាត់ខេត្តបាត់ដំបងតាមបណ្ដោយផ្លូវជាតិលេខ៥ កុំភ្លេចចូលភ្លក់សជាតិសត្វកណ្ដុរអាំងអូរតាគីឲ្យសោះព្រោះវាជាអាហារម្យ៉ាងសម្រាប់ទទួលទានលេងនិងជាគ្រឿងក្លែមយ៉ាងពិសេសផងដែរ៕

អត្ថបទ៖ សោ និយមរ័ត្ន