ប្រជាពលរដ្ឋរាប់រយគ្រួសារ តវ៉ាបិទផ្លូវជាតិ ៣៣ ទាមទារដំណោះស្រាយដីហុយ

ប្រជាពលរដ្ឋរាប់រយគ្រួសារដែលមានលំនៅឋានរស់នៅអមសងខាងផ្លូវជាតិលេខ ៣៣ នៅភូមិភ្នំសាឡី-ភូមិអូរច្រនៀងនិងភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត នៅព្រឹកថ្ងៃទី ១៦ ខែមករា ឆ្នាំ ២០២៤ នេះ បានប្រមូលផ្ដុំគ្នា យករនាំងបាំងរោងការមកដាក់បិទផ្លូវមិនឱ្យធ្វើចរាចរណ៍។

ប្រជាពលរដ្ឋរស់នៅអមសងខាងផ្លូវជាតិលេខ ៣៣ បាននិយាយឱ្យដឹងថា ជាទូទៅពួកគាត់អត់ទ្រាំយូរខែមកហើយពីព្រោះ ​ដីហុយខ្លាំងពេកទើបពួកគាត់ទ្រាំលែងបានក៏នាំគ្នាទាញរបងចេញមកបិទផ្លូវតែម្ដងដើម្បីឱ្យម្ចាស់ក្រុមហ៊ុនស្ថាបនាផ្លូវចេញមកដោះស្រាយ។

បន្ទាប់ពីមានការបិទផ្លូវជាតិលេខ ៣៣ ចាប់ពីស្រុកកំពង់ត្រាចទៅដល់ព្រំទល់ខេត្តកែបគេឃើញលោកនាយករដ្ឋបាលសាលាស្រុកកំពង់ត្រាចបានរួមព្រមទាំង លោក ចាន់ ថា អភិបាលរងខេត្តកំពតក្នុងនោះក៏មានតំណាងឱ្យក្រុមហ៊ុនចិន​មកចូលរួមធ្វើការសម្រួលជាមួយប្រជាពលរដ្ឋ និងអាជ្ញាធរស្រុកកំពង់ត្រាចនៅឯសាលាឃុំកំពង់ត្រាចខាងលិចហើយបានយល់ព្រមតាមការចំណូមពររបស់ប្រជាពលរដ្ឋ។

លោក ចាន់ ថា អភិបាលរងខេត្តកំពតបានឱ្យខាងក្រុមហ៊ុនស្ថាបនាផ្លូវជាតិលេខ៣៣ ឱ្យមានការបាញ់ទឹកស្រោចផ្លូវដែលកំពង់ស្ថាបនានេះឱ្យបានក្នុងមួយថ្ងៃ ៦ ដងក្នុងមួយថ្ងៃចៀសវាងមិនបាញ់ទឹកធ្វើឱ្យមានការផលប៉ះពាល់ដល់សុខភាពរបស់ប្រជាពលរដ្ឋជាទូទៅដែលរស់នៅតាមបណ្តោយផ្លូវជាតិលេខ៣៣នេះ។

ចំណែកឯខាងក្រុមហ៊ុនក៏បានយល់ព្រមតាមការសំណូមពររបស់លោក ចាន់ ថា អភិបាលរងខេត្តកំពតធ្វើយ៉ាងណាកុំឱ្យមានបញ្ហាកើតសារជាថ្មី៕

អត្ថបទ៖ សឹង រ៉ាត់