ព័ត៌មានជាតិ

អ្នកវិភាគ ថា សហជីពនៅកម្ពុជាគ្មានតម្លាភាពលើបញ្ហាហិរញ្ញវត្ថុ ខណៈកម្មករជាម្ចាស់លុយ

បានផុស

១ year មុន

នៅ

ថ្ងៃពុធ ១៧ មករា ២០២៤

ដោយ

អ្នកវិភាគនៅកម្ពុជា លើកឡើងថា បណ្ដាសហជីពនៅកម្ពុជាគ្មានតម្លាភាពផ្នែកហិរញ្ញវត្ថុជាមួយសមាជិករបស់ខ្លួននោះឡើយ ខណៈកម្មករ-និយោជិត ជាអ្នកបង់វិភាគទានជាទៀងទាត់ឱ្យសហជីពដើម្បីទ្រទ្រង់សកម្មភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត គី សេរីវឌ្ឍន៍ អ្នកវិភាគ នៃរាជបណ្ឌិតសភាកម្ពុជា បានលើកឡើងថា «ជារៀងរាល់ឆ្នាំ ខ្ញុំមើលឃើញថា បណ្ដាសហជីពទាំងនោះ (សហជីពនៅកម្ពុជា) មិនដែលបានបង្ហាញពីតម្លាភាព នៃការចំណាយហិរញ្ញវត្ថុរបស់ពួកគេនោះទេ»។

លោកបន្តបញ្ជាក់ថា «បណ្ដាសហជីពមួយចំនួនដែលទទួលជំនួយពីកម្មករ-និយោជិត ត្រូវតែបង្ហាញការចំណាយរបស់ពួកគេទៅកាន់កម្មករ-និយោជិត ដែលជាប្រភពជំនួយរបស់ពួកគេថា តើសហជីពបានប្រើប្រាស់ថវិកាដែលពួកគេបានបង់ទៅលើកិច្ចការងារអ្វីខ្លះ ជាពិសេសបង្ហាញអំពីថវិកាដែលនៅសល់បន្ទាប់ពីប្រើប្រាស់ផងដែរ»។

លោកបណ្ឌិត បានពន្យល់ថា ការមិនបង្ហាញតម្លាភាពផ្នែកហិរញ្ញវត្ថុរបស់សហជីពទៅកាន់សមាជិកខ្លួននេះ បានសបញ្ជាក់ពីភាពមិនស្មោះត្រង់របស់សហជីពទៅកាន់សមាជិកខ្លួន ខណៈអង្គការវិជ្ជាជីវៈទាំងអស់ គឺជាអ្នកដែលការពារសិទ្ធិ និងការរំលោភបំពានមកលើកម្មករ។

ទន្ទឹមនេះ លោកបណ្ឌិត បានជំរុញឱ្យសហជីពដែលមិនបង្ហាញពីតម្លាភាពជូនកម្មករ គួរសម្ដែងភាពស្មោះត្រង់ជូនកម្មករ-និយោជិត ជាជនស្លូតត្រង់ និងគួរបង្វែរថវិកានៅសល់ក្រោយប្រតិបត្តិការមកកម្មករវិញក៏ល្អផងដែរ៕