ព័ត៌មានជាតិ

ចង់ចេះជំនាញជួសជុលរថយន្ត មាន ៣០ គ្រឹះស្ថាននៅទូទាំងប្រទេស អាចចុះឈ្មោះសិក្សាបាន

បានផុស

១ year មុន

នៅ

ថ្ងៃពុធ ១៧ មករា ២០២៤

ដោយ

រហូតមកដល់ពេលនេះ ក្រសួងការងារ និងបណ្ដុះបណ្ដាលវិជ្ជាជីវៈ មានសាលាបណ្ដុះបណ្ដាលផ្នែករថយន្តប្រមាណ ៣០ គ្រឹះស្ថាន នៅទូទាំងប្រទេស ខណៈបច្ចុប្បន្នជំនាញនេះកំពុងមានតម្រូវការកម្លាំងពលកម្មខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ១៧ មករា នេះថា បច្ចុប្បន្នសាលាបណ្ដុះបណ្ដាលជំនាញរថយន្ត ដែលបានចុះបញ្ជិកាក្រោមឱវាទក្រសួងមានចំនួន ៣០ គ្រឹះស្ថាន ក្នុងនោះមានសាលាសាធារណៈចំនួន ២៦ គ្រឹះស្ថាន សាលាឯកជនចំនួន ១ គ្រឹះស្ថាន និងសាលាអង្គការចំនួន ៣ គ្រឹះស្ថាន។

លោកបានបន្តថា សាលាទាំងនេះគឺជាផ្នែកមួយយ៉ាងសំខាន់ក្នុងការបណ្ដុះបណ្ដាលធនធានមនុស្សជំនាញរថយន្តដោយសារជំនាញនេះមានតម្រូវការទីផ្សារខ្ពស់ស្របពេលចំនួនការ៉ាស់ជួសជុលរថយន្តកំពុងមានការកើនឡើង និងរីកដូចផ្សិត ដែលស្រូបទាញកម្លាំងពលកម្មបានយ៉ាងច្រើន ជួយលើកស្ទួយដល់ជីវភាពរស់នៅរបស់ប្រជាពលរដ្ឋកាន់តែប្រសើរ។

លោកបានបន្តទៀតថា ជំនាញផ្នែករថយន្តនេះត្រូវបានដាក់បញ្ចូលទៅក្នុងជំនាញទាំង ១០ ក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យប្រមាណ ១ លាន ៥ សែននាក់ របស់រាជរដ្ឋាភិបាលដែលបានបើកវគ្គជាលើកដំបូង កាលពីថ្ងៃទី ១៥ ខែមករា ឆ្នាំ ២០២៤ ដោយមានយុវជនចុះឈ្មោះចូលរៀនប្រមាណ ២ ម៉ឺននាក់ បន្ទាប់ពីរាជរដ្ឋាភិបាលបានប្រកាសដាក់ឱ្យអនុវត្តកម្មវិធីនេះជាផ្លូវការ កាលពីថ្ងៃទី ១៤ ខែវិច្ឆិកា ឆ្នាំ ២០២៤ កន្លងទៅ។ ក្រៅពីនេះ មានមុខជំនាញ សំណង់, អគ្គិសនី និងថាមពល,អេឡិចត្រូនិក, បរិក្ខារត្រជាក់ និងកម្ដៅ,កម្មន្តសាល,មេកានិកទូទៅ/ ,ទេសចរណ៍,សេវាកម្ម, កសិកម្ម និងកសិ-ឧស្សាហកម្ម, និង ធុរកិច្ច និងព័ត៌មាន។

លោក កត្តា អ៊ន បានជំរុញ និងលើកទឹកចិត្តដល់យុវជនមកពីគ្រួសារក្រីក្រ និងគ្រួសារងាយរងហានិភ័យដែលមិនទាន់បានចុះឈ្មោះចូលរៀនជំនាញវិជ្ជាជីវៈ សូមប្រញាប់មកចុះឈ្មោះចូលរៀនឱ្យបានច្រើន ព្រោះថាវគ្គបណ្ដុះបណ្ដាលនេះ មានរយៈពេល ៤ ខែ ហើយការចុះឈ្មោះចូលរៀនមិនតម្រូវឱ្យបង់ប្រាក់ទេ។ ចំពោះយុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានថវិកាឧបត្ថម្ភបន្ថែមចំនួន ២៨ ម៉ឺនរៀល ក្នុង ១ ខែ។ ប៉ុន្តែយុវជនមកពីសេដ្ឋកិច្ចក្នុង ឬ ក្រៅប្រព័ន្ធ ឬកម្មករ-និយោជិត ដែលមានបំណងចង់រៀនជំនាញបន្ថែម ក៏អាចចុះឈ្មោះចូលរៀនដោយឥតគិតថ្លៃបានដែរ តែមិនទទួលបានប្រាក់ឧបត្ថម្ភដូចយុវជនមកពីគ្រួសារក្រីក្រ និងងាយរងហានិភ័យទេ៕

អត្ថបទ ៖ សំអឿន