លោក សាយ សំអាល់ ប្រគល់វិញ្ញាបនបត្រសម្គាល់ ម្ចាស់អចលនវត្ថុជូនសម្បទានិក ២០០គ្រួសារ នៅខេត្តស្វាយរៀង

លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងមន្ត្រីជាច្រើនរូបទៀតកាលពីថ្ងៃអង្គារ ម្សិលមិញ បានចូលរួមក្នុងពិធីសំណេះសំណាល និងប្រគល់វិញ្ញាបនបត្រសម្គាល់ម្ចាស់អចលនវត្ថុជូនសម្បទានិកចំនួន ២០០គ្រួសារនៃអតីតយុទ្ធជន នៅក្នុងឃុំអណ្តូងត្របែក ស្រុករមាសហែក ខេត្តស្វាយរៀង។

លោកឧបនាយករដ្ឋមន្ត្រី សាយ សំអាល់ បានថ្លែងថា ប្រជាពលរដ្ឋនឹងទទួលបានការពង្រីកភូមិថ្មីដែលផ្សារភ្ជាប់ជាមួយ​នឹងភូមិចាស់ និងមានការរៀបចំទៅតាមលក្ខខណ្ឌ និងតាមគំនិតនគរូបនីយកម្ម ដែលមានការគិតគូរអំពីសេដ្ឋកិច្ច ស្របតាមអ្វីដែលហៅថាបុរីជនបទ។ លោកថា ដីឡូត៍ដែលរាជរដ្ឋាភិបាលបានប្រគល់ជូនសម្បទានិកនាពេលនេះ គឺជាទ្រព្យមួយដ៏មានតម្លៃ ដូច្នេះ សូមធ្វើយ៉ាងណាកែច្នៃពង្រីកទ្រព្យនេះឱ្យកើនឡើងថែមទៀត ដើម្បីបង្កើនជីវភាពគ្រួសារឱ្យកាន់តែប្រសើរឡើង។ ជាមួយគ្នានេះ លោកឧបនាយករដ្ឋមន្ត្រី បានថ្លែងអំណរគុណក្រុមការងារទាំងអស់ ដែលបានរួមសហការក្នុងការជំរុញឱ្យគម្រោងនេះទទួលបានជោគជ័យយ៉ាងពេញលេញ។

គួរជម្រាបថា គ្រួសារអតីតយុទ្ធជនទាំង ២០០គ្រួសារ មានគ្រួសារពលី ២៤នាក់ ស្រី២៣នាក់ គ្រួសារមរណៈ ៧នាក់ ស្រី៧នាក់ គ្រួសារបាត់បង់ ៣នាក់ គ្រួសារពិការ ៧០នាក់ ស្រី១នាក់ គ្រួសារនិវត្តជន ២៩នាក់ ស្រី ៣នាក់ គ្រួសារយោធា ២៥នាក់ ស្រី១នាក់ គ្រួសារប៉ូលីស ៣៦នាក់ និងគ្រួសារកងរាជអាវុធហត្ថ ៦នាក់ផងដែរ៕

ដោយ៖ភក្ដី