កម្ពុជា លើកទឹកចិត្តឱ្យក្រុមហ៊ុនផ្គត់ផ្គង់នាំចូល​សារធាតុគីមីបម្រើដល់កម្មន្តសាលឧស្សាហកម្ម

មន្រ្តីនៃគណៈកម្មាធិការវិនិយោគកម្ពុជា បានជំរុញដល់សហគ្រាស PETRONAS Chemicals Marketing (Labuan) Sdn. Bhd. ឱ្យបន្ដសិក្សាជាមួយក្រសួង-ស្ថាប័នពាក់ព័ន្ធ ដើម្បីស្នើសុំគោលការណ៍​អនុញ្ញាត​នាំចូលសារធាតុគីមីដែលបម្រើដល់កម្មន្តសាលឧស្សាហកម្ម ផ្គត់ផ្គង់នៅកម្ពុជា។

កាលពីល្ងាចថ្ងៃទី ១៦ មករា ឆ្នាំ ២០២៤ លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានទទួលជួបពិភាក្សាការងារជាមួយគណៈប្រតិភូនៃសហគ្រាស PETRONAS Chemicals Marketing (Labuan) Sdn. Bhd. ដែលជាក្រុមហ៊ុនបុត្រសម្ព័ន្ធរបស់ PETRONAS Chemical Group (PCG) ក្នុងគោល​បំណងពិភាក្សាអំពីកាលានុវត្តភាពវិនិយោគ និងស្វែងយល់អំពីគម្រោងសន្ធានកម្មការផ្គត់ផ្គង់​សារធាតុគីមី​ដែល​បម្រើ​ដល់កម្មន្តសាលឧស្សាហកម្ម នៅកម្ពុជា។

ថ្លែងក្នុងជំនួនេះ លោកបានអរគុណជូនចំពោះគណៈប្រតិភូដែលបានចំណាយពេលមក​កម្ពុជាដើម្បីសិក្សាស្វែង​យល់បន្ថែម​អំពីឱកាសវិនិយោគលើសកម្មភាពខាងលើ សំដៅប្រមូលព័ត៌មានឱ្យកាន់តែជាក់លាក់ និងគ្រប់ជ្រុងជ្រោយ មុននឹងសម្រេចចិត្តក្នុងការបណ្ដាក់ទុននៅកម្ពុជា។

ជាមួយគ្នានេះ លោក សួន សុផល ​ក៏បានណែនាំ និងជំរុញលើកទឹកចិត្តឱ្យគណៈប្រតិភូបន្ដសិក្សាជាមួយ​ក្រសួង​-ស្ថាប័នពាក់ព័ន្ធ ដើម្បីស្នើសុំគោលការណ៍អនុញ្ញាតនាំចូល និងធានាបានថាសារធាតុគីមីទាំងនោះមានអនុលោម​ភាពជាមួយនឹងបទដ្ឋាន និងស្តង់ដារដូចមានចែងក្នុងច្បាប់ និងបទប្បញ្ញត្តិជាតិ និងអន្តរជាតិ។

ជាការឆ្លើយតប គណៈប្រតិភូ និងជាតំណាងក្រុមហ៊ុន បានបង្ហាញក្តីសង្ឃឹមថា បន្ទាប់ពីការសិក្សា​សមិទ្ធិលទ្ធភាព​ត្រូវបានបញ្ចប់ និងវាយតម្លៃគ្រប់ជ្រុងជ្រោយ គម្រោងនេះ​នឹងលេចត្រដែតឡើងនៅលើទីផ្សាររបស់កម្ពុជា៕