ព័ត៌មានជាតិ

អាជ្ញាធរខេត្តកំពង់ធំ ត្រៀមចុះអន្តរាគមន៍បូមទឹកសង្គ្រោះស្រូវប្រជាពលរដ្ឋប្រមាណជិត២០០ហិកតា នៅស្រុកប្រាសាទសំបូរ

បានផុស

១ year មុន

នៅ

ថ្ងៃពុធ ១៧ មករា ២០២៤

ដោយ

កំពង់ធំ ៖ អាជ្ញាធរខេត្តកំពង់ធំ ត្រៀមចុះអន្តរាគមន៍បូមទឹកស្រោចស្រពសង្គ្រោះស្រូវប្រជាពលរដ្ឋប្រមាណជិត ២០០ហិកតា ដែលអាចរងផលប៉ះពាល់ខ្វះខាតទឹកស្រោចស្រព នៅបឹងអភិរក្ស ឃុំតាំងក្រសៅ ស្រុកប្រាសាទសំបូរខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី១៧ ខែមករា ឆ្នាំ២០២៤, លោក ងួន រតនៈ អភិបាលខេត្តកំពង់ធំ ដឹកនាំសហការី ចុះពិនិត្យ បឹងអភិរក្ស និងស្ថានភាពបង្កបង្កើនផល របស់ប្រជាពលរដ្ឋ នៅស្រុកប្រាសាទសំបូរ។

ជាមួយគ្នានេះដែរ លោក អភិបាសខេត្ត លើកឡើងថា ការចុះពិនិត្យស្ថានភាពការបង្ករបង្កើនផល របស់ប្រជាពលរដ្ឋនៅតំបន់នេះ គឺដើម្បីពិនិត្យឲ្យឃើញពីស្ថានភាពជាក់ស្តែងនៃការបង្កបង្កើនផល។ ទន្ទឹមនឹងការពិនិត្យនេះ ក្រុមការងារខេត្តសង្កេតឃើញថា ស្រូវរបស់ប្រជាពលរដ្ឋ ក្នុងដំណាក់កាលបង្កបង្កើនផល រដូវសម្រកនេះ នៅទូទាំងខេត្តកំពង់ធំ មិនទាន់មានផលប៉ះពាល់នៅឡើយទេ។

ក្នុងករណី នៅតំបន់នេះមានការខ្វះខាតទឹកនាពេលខាងមុខ មន្ទីរធនធានទឹក និងឧត្តុនិយមខេត្ត សហការជាមួយអាជ្ញាធរមូល ត្រៀមខ្លួនដាក់ម៉ាស៊ីន ដើម្បីជួយសង្គ្រោះបានទាន់ពេលវេលា។ ជាមួយគ្នានេះផងដែរ ឯកឧត្តម សំណេះសំណាលជាមួយបងប្អូន ដែលបានកំពុងអាស្រ័យផលធ្វើស្រែប្រាំងនៅតំបន់នេះ ដោយលើកឡើងថា ស្រូវរដូវប្រាំងនៅពេលនេះ មានទឹកគ្រប់គ្រាន់ ស្ថានភាពស្រូវល្អ អាចប្រមូលបានផលច្រើន តម្លៃស្រូវសមរម្យ និងបានជួយសម្រួលជីវភាពបងប្អូនបានធូរស្រាលមួយកម្រិត។ ប៉ុន្តែបញ្ហាប្រឈម អាចកើតឡើងក្នុងរដូវទី២ នឹងខ្វះខាតទឹក។ លោក អំពាវនាវដល់បងប្អូនប្រជាពលរដ្ឋដែលបានកំពុងបង្កបង្កើនផលស្រូវរដូវប្រាំង បន្ទាប់ពីប្រមូលផលដំណាក់កាលនេះចប់ មុននឹងចាប់ផ្តើមបង្កបង្កើនផលម្តងទៀត សូមបងប្អូនធ្វើការសម្រេចចិត្តឲ្យបានត្រឹមត្រូវ និងស្វែងយល់ឲ្យបានច្បាស់អំពីសុវត្ថិភាពទឹកនៅក្នុងតំបន់នីមួយៗ តើអាចស្រោចស្របលើផ្ទៃដីបានប៉ុន្មានហិចតា? ហើយនេះជាបញ្ហាដែលយើងត្រូវស្វែងយល់ទាំងអស់គ្នា ទាំងសហគមន៍គ្រង់គ្រងទឹក ទាំងគ្រួសារធ្វើស្រែប្រាំង ទាំងអាជ្ញាធរមូលដ្ឋាន ដើម្បីយើងពិភាក្សាគ្នា ពិគ្រោះយោបល់គ្នា ជៀសវាងការបង្កបង្កើនផលដំណាក់កាលទី២ មានហានិភ័យខ្វះខាតទឹក ធ្វើឲ្យស្រូវក្រៀមស្វិតខូចខាត បាត់បង់ថវិកាប្រាក់ចំណូលរបស់បងប្អូនប្រជាពលរដ្ឋ។

លើសពីនេះទៀតលោក ងួន រតនៈ បានក្រើនរំលឹកដល់សហគមន៍ប្រើប្រាស់ទឹក ត្រូវពង្រឹងសហគមន៍របស់ខ្លួន ដើម្បីធានាសុវត្ថិភាពនៃការប្រើប្រាស់ទឹកបានត្រឹមត្រូវ ពីព្រោះ ទឹក ក៏មិនមែនប្រើប្រាស់សម្រាប់ការធ្វើស្រែប្រាំងតែមួយមុខនោះទេ វាជាតម្រូវការរបស់មនុស្ស សត្វ រុក្ខជាតិ និងមច្ឆាជាតិផងដែរ៕

អត្ថបទ ៖ ឈាង មករា