កម្ពុជា បន្តស្នើ ADB អភិវឌ្ឍវិស័យថាមពល និងកសិកម្ម ដើម្បីធានាសន្តិសុខស្បៀង

លោក អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ស្នើដល់ធនាគារអភិវឌ្ឍន៍អាស៊ី (ADB) បន្តការគាំទ្រអភិវឌ្ឍវិស័យថាមពល និងវិស័យកសិកម្មកម្ពុជា ដើម្បីអាចធានាបាននូវសន្តិសុខស្បៀង។ ការស្នើរបស់​លោករដ្ឋមន្រ្តីបែបនេះ ធ្វើឡើងនៅក្នុងជំនួបពិភាក្សាការងារជាមួយលោក ស្កុត ម៉ូរីស (Scott Morris) អនុប្រធាន​ធនាគារអភិវឌ្ឍន៍អាស៊ី (ADB) ក្នុងអំឡុងពេល នៃដំណើរទស្សនកិច្ចនៅកម្ពុជា របស់លោក ចាប់ពីថ្ងៃទី ១៥ ដល់ថ្ងៃទី ២០ ខែមករា ឆ្នាំ ២០២៤ ក្នុងគោលបំណង ដើម្បីបន្តពង្រឹង និងពង្រីកកិច្ចសហប្រតិបត្តិការរវាង ADB ជាមួយរាជ​រដ្ឋាភិបាលកម្ពុជា។

ក្រៅពីស្នើសុំគាំទ្រលើវិស័យសំខាន់ទាំងពីរនេះ លោក អូន ព័ន្ធមុន្នីរ័ត្ន ក៏បានជំរុញការធ្វើពាណិជ្ជបនីយកម្ម ការអភិវឌ្ឍហេដ្ឋារចនាសម្ព័ន្ធទីក្រុង ដោយផ្តោតជាពិសេសលើការរៀបចំប្រព័ន្ធលូ, ប្រព័ន្ធប្រព្រឹត្តកម្ម និងការ​គ្រប់-គ្រងសំណល់ផ្សេងៗ ដោយមានការរៀបចំផែនការមេ និងផែនការវិនិយោគច្បាស់លាស់ រួមទាំងការ​គិតគូរអំពីយន្តការសងថ្លៃដើម, ថ្លៃវិនិយោគ (Cost recovery) និងនិរន្តរភាពប្រតិបត្តិការផងដែរ។ ជាមួយគ្នា ក៏ជំរុញលើការគ្រប់គ្រងធនធានទឹក ប្រកបដោយប្រសិទ្ធភាព តាមរយៈការវិនិយោគសាងសង់ហេដ្ឋារចនា​សម្ព័ន្ធធា​រាសាស្ត្រ ដែលមានសមត្ថភាពបម្រើឱ្យមុខងារសំខាន់យ៉ាងហោច ៣ រួមមាន មុខងារគ្រប់គ្រងគ្រោះមហន្តរាយ, មុខងារស្រោចស្រពកសិកម្ម និងមុខងារជា ប្រភពទឹកសម្រាប់ការផលិតទឹកស្អាតបម្រើឱ្យជីវភាពរស់នៅរបស់ប្រជាជន និងការអភិវឌ្ឍវិស័យឧស្សាហកម្មផងដែរ។

លោករដ្ឋមន្រ្តី ក៏បានវាយតម្លៃខ្ពស់ ចំពោះការចូលរួមចំណែកដ៏សំខាន់ របស់ ADB ដែលបានផ្តល់កិច្ច​សហប្រតិ​បត្តិការយ៉ាងល្អ និងរឹងមាំ ក្នុងការគាំទ្រកម្ពុជា ក្នុងដំណើរការអភិវឌ្ឍន៍សេដ្ឋកិច្ចអស់រយៈពេលជាង ៣០ ឆ្នាំកន្លងទៅ, ជាពិសេស ADB បានដើរតួនាទីយ៉ាងសំខាន់ ក្នុងការជួយរាជរដ្ឋាភិបាលកម្ពុជា ឆ្លើយតបភ្លាមៗក្នុងកាលៈ​ទេសៈដ៏លំបាក ដែលក្នុងនោះ រួមមាន ការសម្រេចផ្តល់ហិរញ្ញប្បទាន ជូនរាជរដ្ឋាភិបាលកម្ពុជា ក្នុងការប្រយុទ្ធប្រឆាំង​នឹងជំងឺកូវីដ-១៩ និងការបន្តគាំទ្ររាជរដ្ឋាភិបាល ក្នុងការស្ដារឡើងវិញ នូវសេដ្ឋកិច្ចក្រោយវិបត្តិជំងឺកូវីដ- ១៩ តាមរយៈការអនុវត្ត “ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅ​ជាមួយកូវីដ-១៩ តាមគន្លងប្រក្រតីភាពថ្មីសម្រាប់ ឆ្នាំ២០២១-២០២៣” ។

ជុំវិញបញ្ហានេះ លោក ស្កុត ម៉ូរីស បានថ្លែងកោតសរសើរ ចំពោះភាពជោគជ័យលើសមរភូមិប្រយុទ្ធប្រឆាំង​នឹងជំងឺកូវីដ-១៩ របស់រាជរដ្ឋាភិបាលកម្ពុជា កន្លងទៅនេះ។ លោក ស្ពត ម៉ូរីស ក៏បានគូសរំលេចឡើងវិញ នូវការប្ដេជ្ញាចិត្ត របស់ ADB ក្នុងការបន្តជួយកម្ពុជាសម្រេចបាននូវគោលដៅអភិវឌ្ឍន៍ ដូចមានចែងក្នុង​យុទ្ធសាស្ត្របញ្ចកោណ-ដំណាក់កាលទី ១ ។

លោកឧបនាយករដ្ឋមន្ត្រី បានថ្លែងអំណរគុណដល់ ADB សម្រាប់ការរួមចំណែកក្នុងការ គាំទ្រដល់កម្មវិធីកែទម្រង់​ការគ្រ​ប់​គ្រងហិរញ្ញវត្ថុសាធារណៈ របស់រាជរដ្ឋាភិបាល ដែលនេះជារបៀបវារៈមួយនៃយុទ្ធសាស្ត បញ្ចកោណ​-ដំណាក់​កាលទី ១ សំដៅពង្រឹងភាពប្រកួតប្រជែង និងជំរុញល្បឿននៃកំណើនសេដ្ឋកិច្ច ប្រកបដោយចីរភាព និងបរិយាបន្ន ។

ទន្ទឹមនេះលោក ក៏បានសាទរចំពោះការសន្យារបស់ ADB ក្នុងការកៀរគរ ហិរញ្ញវត្ថុអាកាសធាតុ និងការប្ដេជ្ញាចិត្តខ្ពស់ របស់ ADB ក្នុងការដោះស្រាយបញ្ហាបម្រែបម្រួលអាកាសធាតុ ក្នុងតំបន់ សម្រាប់ឆ្នាំ ២០១៩-២០៣០ ដែលក្នុងនោះ ក៏រួមមានប្រទេសកម្ពុជាផងដែរ ។ ទោះជាយ៉ាងណា, ការលើកកម្ពស់ការ អភិវឌ្ឍបៃតងក្នុងការ​ឆ្លើយតបទៅ​នឹងការ​ប្រែប្រួលអាកាសធាតុ ត្រូវផ្អែកលើអភិក្រម “រក្សាតុល្យការរវាងកំណើនសេដ្ឋកិច្ចខ្ពស់ ប្រកបដោយចីរភាព និងបរិយាបន្ន ជាមួយនឹងតម្រូវការបៃតង”៕