ព័ត៌មានជាតិ

យុវជនមកពីគ្រួសារក្រីក្រ ចាត់ទុកកម្មវិធីបណ្ដុះបណ្ដាលថ្នាក់ជាតិ ជាជីវិតថ្មី អាចផ្លាស់ប្ដូរជីវភាពគ្រួសារនាពេលអនាគត

បានផុស

១ year មុន

នៅ

ថ្ងៃសុក្រ ១៩ មករា ២០២៤

ដោយ

យុវជនមកពីគ្រួសារក្រីក្រ ចាត់ទុកកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល ជាជីវិតថ្មីសម្រាប់ពួកគេ ហើយមានក្តីសង្ឃឹមថានឹងអាចមានជំនាញមួយច្បាស់លាស់ មានការងារធ្វើសមរម្យ បន្ទាប់ពីការសិក្សារយៈពេល ៤ ខែ ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុវតីមកពីគ្រួសារក្រីក្រ ហ៊ឹម ណារី លើកឡើងថា «បើគ្មានកម្មវិធីបណ្ដុះបណ្ដាលជំនាញវិជ្ជាជីវៈរបស់រាជរដ្ឋាភិបាលនេះទេ ខ្ញុំមិនអាចបន្តការសិក្សាបានទេ ពីព្រោះគ្រួសារខ្ញុំក្រពេក ដោយសារកត្តាគ្រួសារនេះហើយ ខ្ញុំគ្មានលទ្ធភាពបន្តរៀនបានទេ»។

យុវតីរូបនេះបន្តថា ដោយសារការរៀនជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលមានប្រាក់ឧបត្ថម្ភចំនួន ២៨ ម៉ឺនរៀល ជាប្រចាំខែផងនោះ ទើបយុវតីរូបនេះរួសរាន់មកចុះឈ្មោះចូលរៀននឹងគេ។ ក្រោយពីបានចុះឈ្មោះចូលរៀនជំនាញវិជ្ជាជីវៈ យុវតីរូបនេះ សង្ឃឹមថា ខ្លួននឹងមានការងារមួយច្បាស់លាស់នាពេលអនាគត ហើយថែមទាំងអាចផ្លាស់ប្ដូរជីវភាពរបស់គេបាន។ យុវតីរូបនេះថា «ខ្ញុំសង្ឃឹមថា ខ្ញុំនឹងអាចមានជំនាញមួយច្បាស់លាស់ រកការងារបានធ្វើ ហើយគ្រួសារខ្ញុំលែងលំបាកដូចសព្វថ្ងៃ»។

យុវតី រិទ្ធ រស្មី ដែលជាសិក្ខាកាមមួយរូបទៀត មកពីគ្រួសារក្រីក្រ និងជាក្មេងកំព្រាផងនោះ បានលើកឡើងថា «ខ្ញុំជាក្មេងកំព្រា ក្រីក្រ គ្មានលទ្ធភាពរៀនបន្តនោះទេ ដូច្នេះរាជរដ្ឋាភិបាលកម្ពុជា បានដាក់ចេញការបណ្ដុះបណ្ដាលដោយឥតគិតថ្លៃ ហើយថែមទាំងមានប្រាក់ឧបត្ថម្ភទៀតនោះ ខ្ញុំត្រូវតែចាប់យកឱកាសនេះឱ្យបាន»។

យុវតីរូបនេះបន្ថែមថា គាត់បានចុះឈ្មោះរៀនជំនាញកែច្នៃបន្លែផ្លែឈើ ហើយក៏សង្ឃឹមថា នឹងអាចមានការងារធ្វើមួយសមរម្យ កែប្រែជីវភាពគ្រួសារនាពេលអនាគតដែរ។ យុវតី រិទ្ធ រស្មី បានអរគុណរាជរដ្ឋាភិបាលកម្ពុជា ដែលផ្តល់ឱកាសដ៏ល្អមួយនេះសម្រាប់យុវជន យុវតី មានជីវភាពក្រីក្រ អាចរៀនជំនាញវិជ្ជាជីវៈ និងបច្ចេកទេសនេះបាន។

គួរបញ្ជាក់ផងដែរថា កាលពីថ្ងៃទី ១៥ ខែមករា ឆ្នាំ ២០២៤ កន្លងទៅ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសបើកបវេសនកាលជាផ្លូវការនូវកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងហានិភ័យ បើកបវេសនកាលវគ្គទី ១។ កម្មវិធីបណ្ដុះបណ្ដាលនេះ មានសិស្សចំនួន ៥០០ ថ្នាក់ និងមានសិក្ខាកាមចំនួន ១៥០០០ នាក់ ដែលសិក្សាក្នុងវិស័យចំនួន ១០ លើមុខជំនាញចំនួន ៣៨ នៅទូទាំងប្រទេស៕