ព័ត៌មានជាតិ

ឯកឧត្ដម ហ៊ុន ម៉ានី គូសបញ្ជាក់ជូនសិក្ខាកាមនូវដំណើរប្រវត្តិសាស្ត្រកម្ពុជា

បានផុស

១២ ខែ មុន

នៅ

ថ្ងៃសុក្រ ១៩ មករា ២០២៤

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាសមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា គូសបញ្ជាក់ជូនសិក្ខាកាមទាំងអស់នូវដំណើរប្រវត្តិសាស្ត្រកម្ពុជា និងរំលេចព្រឹត្តិការណ៍សំខាន់ៗ ជាសក្ខីភាព ដែល កម្ពុជា បានធ្លាប់ឆ្លងកាត់ការសាកល្បងបំបែកបំបាក់សាមគ្គីផ្ទៃក្នុងដោយបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគូសបញ្ជាក់នេះ ក្នុងឱកាស ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាសមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា ផ្ដល់បទឧទ្ទេសនាមលើប្រធានបទ «ភាពជាអ្នកដឹកនាំ នវានុវត្តន៍ និងការកែទម្រង់រដ្ឋបាលសាធារណៈក្នុងវិស័យមុខងារសាធារណៈ» ជូនដល់សិក្ខាកាមវគ្គអប់រំនយោបាយរបស់គណបក្សប្រជាជនកម្ពុជា កម្រិត ២ ជំនាន់ទី ៦ ចំនួន ១២៥ នាក់ នៅវិមាន ៧ មករា កាលពីថ្ងៃទី ១៨ ខែមករា ឆ្នាំ ២០២៤។

នាឱកាសនោះ ផ្ដើមចេញពីការចែករំលែកអំពីភាពជាអ្នកដឹកនាំ និងតួអង្គអ្នកដឹកនាំគំរូរបស់កម្ពុជា ឯកឧត្ដម ហ៊ុន ម៉ានី បានគូសបញ្ជាក់ជូនសិក្ខាកាមទាំងអស់នូវដំណើរប្រវត្តិសាស្ត្រកម្ពុជា ព្រមទាំងរំលេចព្រឹត្តិការណ៍សំខាន់ៗ ជាសក្ខីភាពដែល កម្ពុជា ធ្លាប់ឆ្លងកាត់ការសាកល្បងបំបែកបំបាក់សាមគ្គីផ្ទៃក្នុងដោយបរទេស។

ជាមួយគ្នានេះ ទន្ទឹមការសង្កត់ធ្ងន់លើចំណុចខាងលើ ឯកឧត្ដម ហ៊ុន ម៉ានី ក្នុងនាមជាគ្រូឧទ្ទេស និងជាសមាជិកគណៈអចិន្ត្រៃយ៍របស់គណបក្សប្រជាជនកម្ពុជា ក៏បានផ្ដាំផ្ញើទៅសិក្ខាកាមធ្វើយ៉ាងណារក្សានូវស្មារតីសាមគ្គីឯកភាពផ្ទៃក្នុង និងបន្ថែមការប្រុងប្រយ័ត្នខ្ពស់ចំពោះកត្តាជ្រៀតជ្រែកដោយចេតនាណាមួយ ជាពិសេសបន្តជឿជាក់យ៉ាងមុតមាំចំពោះគណបក្សប្រជាជនកម្ពុជា និង សម្ដេចប្រធានគណបក្ស ហើយត្រូវក្ដាប់ឲ្យបានគ្រប់ជ្រុងជ្រោយនូវកម្មវិធីគោលនយោបាយសម្រាប់កសាងជាតិ មាតុភូមិ ឆ្នាំ ២០២៣-២០២៨។

គួរជម្រាបថា បន្ទាប់ពីការចែករំលែក និងពិភាក្សាយ៉ាងផុសផុលពីសំណាក់សិក្ខាកាម ដោយក្នុងនាមជា សមាជិក និងសកម្មជនគណបក្សប្រជាជនកម្ពុជា ជឿជាក់ និងប្ដេជ្ញាគាំទ្រឥតងាករេ ហើយចូលរួមជាមួយរាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការសម្រេចចក្ខុវិស័យដឹកនាំសម្រាប់អាណត្តិទី ៧ ជាពិសេសការអនុវត្តយុទ្ធសាស្ត្របញ្ចកោណដំណាក់កាលទី ១ និងការកែទម្រង់រដ្ឋបាលសាធារណៈ ឈានឆ្ពោះទៅកាន់ការរួមគ្នាសម្រេចបានចក្ខុវិស័យកម្ពុជា ឆ្នាំ ២០៣០ និង ឆ្នាំ ២០៥០៕

អត្ថបទ ៖ ពិសី