កម្ពុជា ស្នើចិនបន្ថែមវគ្គហ្វឹកហ្វឺនក្នុងប្រតិបត្តិការរក្សាសន្តិភាព និងសម្ភារៈបោសសម្អាតមីន

តាមរយៈមន្ត្រីជាន់ខ្ពស់ក្រសួងការបរទេសចិន, លោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព បានស្នើសុំភាគីចិនបន្ថែមវគ្គហ្វឹកហ្វឺនក្នុងប្រតិបត្តិការរក្សាសន្តិភាព និងជំនួយជាសម្ភារៈបោសសម្អាតមីនមួយចំនួនទៀត។

ក្នុងជំនួបជាមួយលោក MA Shangkun អគ្គនាយករងនៃអគ្គនាយកដ្ឋានគ្រប់គ្រងអាវុធ ក្រសួងការបរទេសចិន នាថ្ងៃទី១៨ ខែមករា ឆ្នាំ២០២៤ លោកនាយឧត្តមសេនីយ៍ សែម សុវណ្ណនី អនុប្រធានទី១គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានសម្ដែងការអរគុណចំពោះចិន ដែលបានជួយកម្ពុជាយ៉ាងសស្រាក់សស្រាំ និងយកចិត្តទុកដាក់ក្នុងការផ្តល់វគ្គហ្វឹកហ្វឺនទាំងក្នុង និងក្រៅប្រទេសដល់កម្ពុជាសម្រាប់ប្រតិបត្តិការរក្សាសន្តិភាព នាពេលកន្លងមក និងបច្ចុប្បន្ន។

ទោះបីយ៉ាងនេះក្តី ចំណុចខ្វះខាតក៏នៅតែមាន ដូច្នេះហើយ លោកនាយឧត្តមសេនីយ៍ សែម សុវណ្ណនី បានស្នើសុំបន្ថែមនូវវគ្គហ្វឹកហ្វឺន ដោយបង្កើនការហ្វឹកហ្វឺនពីរយៈពេលខ្លី មកធម្យម និងពីមធ្យម មករយៈពេលវែង ព្រមជាមួយនេះ លោកនាយឧត្តមសេនីយ៍ ក៏បានស្នើសុំនូវសម្ភារៈបោសសម្អាតមីន ក៏ដូចជាគ្រឿងបំពាក់ក្នុងថ្នាក់សិក្សា ដើម្បីគាំទ្រដល់កម្ពុជា ក្នុងការធ្វើជាម្ចាស់ផ្ទះវគ្គហ្វឹកហ្វឺនគម្រោងត្រីភាគី ឆ្នាំ២០២៤-២០២៥។

លោក MA Shangkun អគ្គនាយករងគ្រប់គ្រងអាវុធនៃក្រសួងការបរទេសចិន បានសម្ដែងសេចក្តីរីករាយដែលបានអញ្ជើញមកទស្សនកិច្ចកម្ពុជាពេលនេះ ដោយលោក បានលើកឡើងថា កម្ពុជា និងកម្ពុជា ជាមិត្តដ៏ល្អ ជាមិត្តរួមសុខរួមទុក្ខ និងជាបងប្អូនយ៉ាងស្មោះត្រង់។ មន្ត្រីជាន់ខ្ពស់ក្រសួងការបរទេសចិនរូបនេះ បានបញ្ជាក់ថា កិច្ចសហប្រតិបត្តិការរវាងកម្ពុជា និងចិន ពិតជាមានអត្ថប្រយោជន៍សម្រាប់ប្រទេសទាំងពីរ ហើយមានផលប្រយោជន៍សម្រាប់ស្ថិរភាពសន្តិសុខក្នុងតំបន់ និងអន្តរជាតិ​ ដែលក្នុងនោះ កិច្ចសហប្រតិបត្តិការលើវិស័យបោសសម្អាតមីន គឺជាផ្នែកមួយសំខាន់នៃប្រតិបត្តិការរវាងប្រទេសទាំងពីរ៕