ព័ត៌មានជាតិ

មន្រ្តីក្រសួងបកស្រាយវីដេអូរថភ្លើងបើកលើផ្លូវជាតិ ពលរដ្ឋសង្ស័យបើកខុសបច្ចេកទេស

បានផុស

១ year មុន

នៅ

ថ្ងៃអង្គារ ២៣ មករា ២០២៤

ដោយ

មានការបង្ហោះចែកចាយវីដេអូមួយ ក្រោយមានរថភ្លើងមួយខ្សែថែមទាំងដឹកទូរកុងតឺណ័របើកកាត់នៅលើផ្លូវជាតិនាំឲ្យមានការសង្ស័យបើកបរខុសបច្ចេកទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ លោក ផន រីម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានឆ្លើយតបថា មើលតាមរយៈវិដេអូមិនអាចមើលឃើញផ្លូវរថភ្លើងទេ ព្រោះថាផ្លូវបានសាងសង់ឡើងរាបស្មើនឹងផ្លូវថ្នល់។

«ប្រាកដណាស់គឺពិតជាមានផ្លូវរថភ្លើងក្នុងវីដេអូនោះ»។ នេះបើតាមលោក ផន រីម។ មុនលោកបន្តថា៖ «បើមើលឱ្យជាក់លាក់យើងនឹងឃើញមានរនាំងហាមឃាត់ ដើម្បីការពារមិនឱ្យយានជំនិះផ្សេងឆ្លងកាត់នៅពេលរថភ្លើងមកដល់»។

លោក ផន រីម អះអាងបន្ថែមថា ជាធម្មតារថភ្លើងនៅប្រទេសកម្ពុជាអាចរត់បានក្នុងល្បឿនត្រឹម ៤០ ទៅ ៥០ គីឡូម៉ែត្រក្នុងមួយម៉ោង ហើយរថភ្លើងដែលឃើញក្នុងឃ្លីបវីដេអូគឺនៅម្តុំតានីទូកមាសខេត្តកំពតបើកឆ្លងកាត់ផ្លូវជាតិលេខ ៣១។

ទាក់ទងវីដេអូរថភ្លើងបើកកាត់ផ្លូវជាតិនេះ បើតាមមន្រ្តីអ្នកនាំពាក្យក្រសួងសាធារណការអាចមកពីការបច្ចេកទេសនៃការថតដែលធ្វើឲ្យមហាជនមានការយល់ច្រឡំ។

គួរបញ្ជាក់ថា ថ្មីៗនេះមានការផ្សព្វផ្សាយវីដេអូរថភ្លើងមួយខ្សែរត់នៅលើផ្លូវជាតិដែលមហាជនដាក់ការសង្ស័យថា បើកបរខុសបច្ចេកទេស។ យ៉ាងណាមិញ បើតាមការពន្យល់ពីមន្រ្តីបច្ចេកទេស ជាធម្មតាផ្លូវរថភ្លើងដែលសាងសង់កាត់នៅលើផ្លូវជាតិតាមបច្ចេកទេសត្រូវសង់ឲ្យរាបស្មើកម្រាស់ផ្លូវជាតិ ដើម្បីឲ្យការបើកបរយានជំនិះឆ្លងកាត់មានភាពរលូន និងមិនបង្កគ្រោះថ្នាក់៕