សម្ដេចធិបតី គាំទ្រចំពោះកំណែទម្រង់ធនធានមនុស្សផ្ទៃក្នុងរបស់ក្រសួងព័ត៌មាន

អញ្ជើញជាអធិបតីក្នុងពិធីបិទសន្និបាតបូកសរុបការងារប្រចាំឆ្នាំរបស់ក្រសួងព័ត៌មាន នៅរសៀលថ្ងៃទី២៣ ខែមករា ឆ្នាំ ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសគាំទ្រចំពោះកំណែទម្រង់រចនាសម្ព័ន្ធផ្ទៃក្នុងរបស់ក្រសួងព័ត៌មាន ជាពិសេសកំណែទម្រង់លើធនធានមនុស្ស។

សម្ដេចធិបតី ហ៊ុន ម៉ាណែត បានថ្លែងដូច្នេះថា៖ «ខ្ញុំសូមគាំទ្រណាស់ចំពោះការដាក់ចេញផែនការចំនួន៣ ក្នុងការពង្រឹងរចនាសម្ព័ន្ធរបស់ក្រសួងព័ត៌មាន»។ សម្ដេចធិបតី ថា ដំណើរការកំណែទម្រង់ និងការពង្រឹងអភិបាលកិច្ចល្អ គឺត្រូវផ្ដោតយកចិត្តទុកដាក់លើការធានាគុណភាព ប្រសិទ្ធភាពការងារ ការរៀបចំលិខិតបទដ្ឋានគតិយុត្ត និងការរៀបចំសណ្ដាប់ធ្នាប់ក្នុងវិស័យសារព័ត៌មាន ដោយផ្អែកលើអភិបាលក្រម ថ្មី ពិត លឿន និងទូលំទូលាយ ប្រកបដោយជំនឿទុកចិត្ត វិជ្ជាជីវៈ ដើម្បីផ្សារភ្ជាប់គ្រប់មជ្ឈដ្ឋាន។

សម្ដេច នាយករដ្ឋមន្ត្រី បន្តថា វិធានការជាក់ស្ដែងក្នុងការពិនិត្យកែសម្រួលពង្រឹងរចនាសម្ព័ន្ធផ្ទៃក្នុងរបស់ក្រសួងព័ត៌មាន ដោយក្នុងនោះ ការពង្រឹងធនធានមនុស្ស និងការរៀបចំប្រើប្រាស់ធនធានមនុស្សដែលមានស្រាប់ ក៏ដូចជាការចែងចែក និងការបង្កើនសមត្ថភាពធនធាន គឺជាគោលដៅដ៏សំខាន់ក្នុងការពង្រឹងស្ថាប័ន ឱ្យសមស្រាបតាមសភាពការណ៍ជាក់ស្ដែង ឱ្យទាន់សម័យឌីជីថល៕