ព័ត៌មានជាតិ

ឯកឧត្ដម ហ៊ុន ម៉ានី ៖ កងទ័ពកម្ពុជា កំពុងដើរតួនាទីជាឯកអគ្គរាជទូត តំណាងឲ្យ កម្ពុជា ក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ

បានផុស

៥ ខែ មុន

នៅ

ថ្ងៃពុធ ២៤ មករា ២០២៤

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ លើកឡើងថា កងទ័ពកម្ពុជា កំពុងតែដើរតួនាទីជាឯកអគ្គរាជទូត តំណាងឲ្យព្រះរាជាណាចក្រកម្ពុជា ក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ ដែលទទួលបានការកោតសរសើរពីសហគមន៍អន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ខណៈ ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានប្រកាសចូលរួមអបអរសាទរ ខួបទី ២៥ ថ្ងៃបង្កើត កងទ័ពជើងគោក នៃកងយោធពលខេមរភូមិន្ទ (២៤ មករា ១៩៩៩ – ២៤ មករា ២០២៤) នៅព្រឹកថ្ងៃទី ២៤ ខែមករា ឆ្នាំ ២០២៤ នេះ។

ឯកឧត្ដម ហ៊ុន ម៉ានី បានលើកឡើងយ៉ាងដូច្នេះថា «កងទ័ពកម្ពុជា កំពុងតែដើរតួនាទីជាឯកអគ្គរាជទូត តំណាងឲ្យព្រះរាជាណាចក្រកម្ពុជា ក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ ដែលទទួលបានការកោតសរសើរពីសហគមន៍អន្តរជាតិ»។

ឯកឧត្ដម ហ៊ុន ម៉ានី លើកឡើងបន្តថា កម្ពុជា ដែលពីមុនជាប្រទេសទទួលកងរក្សាសន្តិភាព បានក្លាយខ្លួនជាប្រទេសបញ្ជូនកងរក្សាសន្តិភាព នាពេលបច្ចុប្បន្ន។ នៅក្នុងសុខសន្តិភាព កងទ័ព បានទទួលឱកាសច្រើនសម្រាប់ការអភិវឌ្ឍសមត្ថភាព និងបង្កើនជីវភាពរបស់ខ្លួនប្រកបដោយភាពសុខដុមរមនា។

ជាមួយគ្នានេះ ឯកឧត្ដមរដ្ឋមន្ត្រី ក៏បានបញ្ជាក់ថា កងយោធពលខេមរភូមិន្ទ តំណាងឲ្យមូលដ្ឋាន នៃខឿនការពារជាតិ។ ទោះបី កម្ពុជា កំពុងរស់នៅក្នុងសុខសន្តិភាព តែ កងទ័ព ដើរតួនាទីយ៉ាងសំខាន់ក្នុងការធានាសន្តិភាព អធិបតេយ្យជាតិ និងបូរណភាពទឹកដី ដែលជាអ្នកឈរជើងយ៉ាងអង់អាចនៅតាមបន្ទាត់ព្រំដែន ក៏ដូចជាបានចូលរួមចំណែកយ៉ាងសកម្មក្នុងការជួយសង្គ្រោះប្រជាពលរដ្ឋពេលមានគ្រោះមហន្តរាយធម្មជាតិផ្សេងៗ។

ទន្ទឹមនោះ ឯកឧត្ដម ហ៊ុន ម៉ានី ក៏បានថ្លែងនូវការដឹងគុណដល់វីវកងទ័ពគ្រប់រូប ដែលបានធ្វើពលិកម្ម បូជាសាច់ស្រស់ ឈាមស្រស់ ដើម្បីការពារជាតិ ការពារទឹកដី និងប្រជាពលរដ្ឋគ្រប់ៗ ជំនាន់។

គួរជម្រាបថា នៅព្រឹកថ្ងៃទី ២៤ ខែមករា ឆ្នាំ ២០២៤ នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានអញ្ជើញជាអធិបតីក្នុងពិធីអបអរសាទរខួប ២៥ ឆ្នាំ នៃការបង្កើតបញ្ជាការដ្ឋានកងទ័ពជើងគោក (២៤ មករា ១៩៩៩-២៤ មករា ២០២៤)។

ពិធីនេះ បានរៀបចំឡើងនៅទីបញ្ជាការដ្ឋានកងទ័ពជើងគោក យ៉ាងមហោឡារិកបំផុត ដោយមានការបង្ហាញកម្លាំងកងទ័ព និងយុទ្ធោបករណ៍ មកពីតាមបណ្ដាអង្គភាពនានា ចំណុះឲ្យបញ្ជាការដ្ឋានកងទ័ពជើងគោក។

ការរៀបចំពិធីរំលឹកខួបអនុស្សាវរីយ៍លើកទី ២៥ ឆ្នាំ ថ្ងៃបង្កើតបញ្ហាការដ្ឋានកងទ័ពជើងគោក ក្នុងស្មារតីរំលឹកឡើងវិញនូវវីរភាពដ៏ថ្លៃថ្លារបស់វីរជន និងវីរយុទ្ធនារីកងទ័ពជើងគោក ដែលបានធ្វើពលីកម្មក្នុងបុព្វហេតុជាតិ មាតុភូមិ និងប្រជាជន ព្រមទាំងបន្តរួមចំណែកគោរព និងអនុវត្តនូវទស្សនវិស័យ កម្មវិធី នយោបាយយុទ្ធសាស្ត្របញ្ចកោណ-ដំណាក់កាលទី ១ និងវិធានការគន្លឹះ របស់រាជរដ្ឋាភិបាលនីតិកាលទី ៧ នៃរដ្ឋសភា៕

អត្ថបទ ៖ ពិសី