ត្រឹមថ្ងៃទី២៤ ខែមករា រាជធានី-ខេត្តទាំង២៥  បានបញ្ចប់ការប្រកាសទ្រព្យសម្បត្តិ១០០%

តាមរយៈប្រព័ន្ធតេឡេក្រាម នាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ (ACU) បានឱ្យដឹងថា គិតត្រឹមព្រឹកថ្ងៃទី២៤ ខែមករា ឆ្នាំ២០២៤ បុគ្គលដែលជាប់កាតព្វកិច្ចប្រកាសទ្រព្យសម្បត្តិ មកពីរាជធានី ខេត្តទាំង២៥ បានបញ្ចប់ការតព្វកិច្ចប្រកាសទ្រព្យសម្បត្តិទាំងស្រុង ១០០%។

សម្រាប់ការប្រកាសទ្រព្យសម្បត្តិ និងបំណុល តាមរបប ០២ឆ្នាំ ឆ្នាំ២០២៤ គឺមានបុគ្គលចំនួន១៨ ២៧៩រូប ដែលជាប់កាតព្វកិច្ចតាមច្បាប់កំណត់ ត្រូវប្រកាសទ្រព្យសម្បត្តិ និងបំណុលនៅអង្គភាពប្រឆាំងអំពើពុករលួយ។

បើតាមនាយកដ្ឋានប្រកាសទ្រព្យសម្បត្តិ និងបំណុល ខេត្តចុងក្រោយគេដែលបានបញ្ចប់កាតព្វកិច្ចប្រកាសទ្រព្យសម្បត្តិ និងបំណុលទាំងស្រុងចុងក្រោយគេ គឺខេត្តស្វាយ រៀង និងខេត្តកំពង់ធំ។  ចំពោះទិន្នន័យបឋម គិតត្រឹមម៉ោង១២ ថ្ងៃត្រង់នេះ ក្រុមការងារនាយកដ្ឋានប្រកាសទ្រព្យសម្បត្តិ និងបំណុលបានទទួលឯកសារពីអ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល បានចំនួន ១៧ ៦៧៣រូប ស្មើនឹង ៩៦.៦៨% នៃចំនួនត្រូវប្រកាសសរុប។

ដោយឡែក ក្រៅពីរាជធានី ខេត្តទាំង២៥ ដែលបានប្រកាសទ្រព្យសម្បត្តិរួចរាល់ទាំងស្រុង ក្នុងនោះក៏មានដែរនូវក្រសួង ស្ថាប័នចំនួន១១ ដែលបានបញ្ចប់ការប្រកាសទ្រព្យសម្បត្តិទាំងស្រុង។ ក្រសួង ស្ថាប័នទាំង១១មានដូចជា គណកម្មាធិការជាតិរៀបចំការបោះឆ្នោត, ធនាគារជាតិនៃកម្ពុជា, ក្រសួងការងារ និងបណ្ដុះបណ្ដាលវិជ្ជាជីវៈ, ក្រុមប្រឹក្សាធម្មនុញ្ញ, រដ្ឋលេខាធិការកិច្ចការព្រំដែន, ក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍, ក្រសួងវប្បធម៌ និងវិចិត្រសិល្បៈ, អាជ្ញាធរសវនកម្មជាតិ,ក្រសួងអធិការកិច្ច,ក្រសួងព័ត៌មាន និងក្រសួងព្រះបរមរាជវាំង។  

គួរឱ្យដឹងថា អង្គភាពប្រឆាំងអំពើពុករលួយ បានចាប់ផ្ដើមទទួលឯកសារប្រកាសទ្រព្យសម្បត្តិ ចាប់តាំងពីថ្ងៃទី០១ ខែមករា ហើយបន្តទទួលរហូតដល់ថ្ងៃទី៣១ ខែមករា ហើយក្រុមការងារនៃនាយកដ្ឋានប្រកាសទ្រព្យសម្បត្តិ និងបំណុល គឺរង់ចាំទទួលឯកសារប្រកាស ០៧ថ្ងៃក្នុងមួយសប្ដាហ៍ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ ចាប់ពីវេលាម៉ោង០៨:០០ព្រឹក ដល់ម៉ោង០៥:០០ល្ងាច៕

ដោយ៖ ង៉ិល ណារ៉ាត់