ព័ត៌មានជាតិ

“ឃ្លាំងស្តុកទំនិញត្រជាក់” អាចកម្រិតសីតុណ្ហភាពដល់ -២២°C ដាក់ឲ្យប្រើប្រាស់នៅកំពង់ផែភ្នំពេញ

បានផុស

៥ ខែ មុន

នៅ

ថ្ងៃពុធ ២៤ មករា ២០២៤

ដោយ

ឃ្លាំងលើកដាក់ និងស្តុកទំនិញត្រជាក់ដែលមានទីតាំងស្ថិតនៅក្នុងបរិវេណចំណតផែកុងតឺន័រ LM17 នៃកំពង់ផែស្វយ័តភ្នំពេញស្ថិតនៅស្រុកកៀនស្វាយខេត្តកណ្តាល បានសម្ពោធដាក់ឲ្យប្រើប្រាស់ជាផ្លូវការក្រោមវត្តមានពីរដ្ឋមន្ត្រីក្រសួងសាធារណការ និងដឹកជញ្ជូន។

ការដាក់ឲ្យប្រើប្រាស់ឃ្លាំងលើកដាក់ និងស្តុកទំនិញត្រជាក់នេះមានការគាំទ្រពីមូលនិធិអភិវឌ្ឍន៍ និង USAID ក្រោមជំនួយឧបត្ថម្ភពី ប្រទេសអង់គ្លេស អូស្ត្រាលី ស្វីស និងហូឡង់។ ឃ្លាំងនេះមានសមត្ថភាពស្តុកទំនិញបាន ៥ ៨២៧ម៉ែត្រគូប ជាមួយនឹងកម្រិតសីតុណ្ហភាពចាប់ពី -២២°C ដល់ ១៥°C។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូនបានថ្លែងថា ឃ្លាំងលើកដាក់ និងស្តុកទំនិញត្រជាក់នេះនឹងជួយបំពេញបន្ថែមនូវមុខងាររបស់ចំណតផែកុងតឺន័រ LM17 ធ្វើឱ្យកំពង់ផែស្វយ័តភ្នំពេញទទួលបាននូវកំណើនបរិមាណកុងតឺន័រឆ្លងកាត់ ផ្តល់នូវតម្លៃសេវាបន្ថែម ជាពិសេសសេវាស្តុកទំនិញត្រជាក់ស្របតាមស្តង់ដារអន្តរជាតិ។

លោករដ្ឋមន្រ្តីបានបន្តថា ផែនការអាទិភាពរបស់ក្រសួងសាធារណការ និងដឹកជញ្ជូន ដើម្បីពង្រឹងនិងលើកកម្ពស់ការអភិវឌ្ឍវិស័យឡូជីស្ទីក និងកំពង់ផែនៅកម្ពុជា រួមទាំងការធ្វើកំណែទម្រង់ធ្វើយ៉ាងណាឱ្យតម្លៃឡូជីស្ទីកកាន់តែមានភាពប្រកួតប្រជែង និងការផ្តល់សេវាកាន់តែមានភាពឆាប់រហ័ស តម្លាភាព និងប្រសិទ្ធភាព ។

បើតាមលោករដ្ឋមន្រ្តី សមិទ្ធផលដែលសម្រេចនេះក៏បានឆ្លើយតបតាមកម្មវិធីនយោបាយនិងយុទ្ធសាស្ត្ររបស់រាជរដ្ឋាភិបាល ស្របទៅនឹងទិសដៅក្នុងការអភិវឌ្ឍវិស័យឡូជីស្ទីក និងកំពង់ផែនៅកម្ពុជា។

ឃ្លាំងលើកដាក់ និងស្តុកទំនិញត្រជាក់មានទីតាំងស្ថិតនៅក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ ក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។

ការអភិវឌ្ឍក្រោមគំនិតផ្តួចផ្តើមដោយក្រុមហ៊ុន InfraCo Asia សហការជាមួយកំពង់ផែស្វយ័តភ្នំពេញ ដោយមានការគាំទ្រពីមូលនិធិអភិវឌ្ឍន៍ និង USAID ក្រោមជំនួយឧបត្ថម្ភពី ប្រទេសអង់គ្លេស អូស្ត្រាលី ស្វីស និងហូឡង់។ ឃ្លាំងនេះមានសមត្ថភាពស្តុកទំនិញបាន ៥ ៨២៧ម៉ែត្រគូប ជាមួយនឹងកម្រិតសីតុណ្ហភាពចាប់ពី -២២°C ដល់ ១៥°C៕