រោងចក្រកែច្នៃដំឡូងមី បើកថ្មីនៅឧត្តរមានជ័យ មានសមត្ថភាពទិញដំឡូងមីពីកសិករ ៦០០ តោន ក្នុងមួយថ្ងៃ

រោងចក្រកែច្នៃដំឡូងមីតម្លៃជាង ១០ លានដុល្លារ ​ដែលមានសមត្ថភាពទទួលទិញដំឡូងមីស្រស់ពីកសិករប្រមាណ ៦០០ តោនក្នុងមួយថ្ងៃ ស្ថិតនៅភូមិអូរស្រម៉ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ​កំពុងសាកល្បង ផលិតម្សៅមីជាលើកដំបូង ​ហើយត្រៀមបើកដំណើរការ​នៅ​ខែកុម្ភៈ ឆ្នាំ ២០២៤ ឆាប់ៗខាងមុខនេះ។

​លោក អិល ឈិញ ប្រធានសមាគមដំឡូងមីខ្មែរ ​មានប្រសាសន៍ប្រាប់កម្ពុជាថ្មី នៅថ្ងៃទី ២៧ ខែមករា ឆ្នាំ ២០២៤​នេះ​ថា វត្តមានរោងចក្រផលិតម្សៅដំឡូងមី នៅខេត្ដ​ឧត្ដរមានជ័យ​នេះ នឹងជួយ​បង្កើន​តម្លៃ​ដំឡូងមីស្រស់របស់កសិករនៅតំបន់ជុំវិញរោងចក្រ ខណៈក្រុមហ៊ុនទទួលទិញដំឡូងមី​នៅពេលដែល​កសិករប្រមូលផលក្នុងតម្លៃទីផ្សារ។

​បច្ចុប្បន្ន មានរោងចក្រដំឡូងមីចំនួន ២ ដែលទទួលទិញដំឡូងមីពីករសិករ ក្រៅពីនោះ អ្នកវិនិយោគ​បង្កើតរោងចក្រ និងដាំដោយខ្លួនឯង។ លោក អិល ឈិញ បញ្ជាក់ថា រោងចក្រដែល​ទទួលទិញពីកសិករ​គឺនៅ​ខេត្តរតនគិរី និងខេត្តឧត្តរមាន​ជ័យ​​​ដែលជារោងចក្រថ្មីនេះ។

តម្លៃដំឡូងមីស្រស់នៅខេត្តឧត្តរមានជ័យ​ជាមធ្យមទទួលបាន ៣៥០ រៀល ក្នុងមួយគីឡូ ដែលកសិករអះអាងថា ជាតម្លៃល្អនៅដើមឆ្នាំនេះ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅឆ្នាំ២០២៣ កម្ពុជានាំចេញដំឡូងមីស្រស់ ដំឡូមីក្រៀម និងម្សៅដំឡូងមី សរុបជាង៣លានតោន។ ក្នុងនោះនាំចេញដំឡូងមីស្រស់ជិត ២ លាន​តោន (១ ៩៦១ ៣៧៥) កើនឡើង ២៦ ភាគរយ, ចំណិតដំឡូងមីក្រៀមមានចំនួនជាង ១ លានតោន (១ ២៨៩ ៧៣៩.០៤) ធ្លាក់ចុះ ៣៧.៦៤% និងម្សៅដំឡូងមីមានចំនួន ៣៦ ២៥៦.៨០តោន ធ្លាក់ចុះ៤៥.៣៩%៕