ព័ត៌មានជាតិ

មន្ទីរពេទ្យបង្អែកស្រុកស្រែអំបិល អំពាវនាវពលរដ្ឋបរិភោគចំណីអាហារមានអនាម័យល្អ អំឡុងខែប្រាំង

បានផុស

១២ ខែ មុន

នៅ

ថ្ងៃចន្ទ ២៩ មករា ២០២៤

ដោយ

មន្ត្រីនៅមន្ទីរពេទ្យបង្អែកស្រុកស្រែអំបិល បានអំពាវនាវដល់ប្រជាពលរដ្ឋ គប្បីបរិភោគចំណីអាហារណាដែលមានសុវត្ថិភាព និងអនាម័យល្អ អំឡុងពេលខែប្រាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរដូវប្រាំង ភាគច្រើនមន្ទីរពេទ្យបង្អែកស្រុកស្រែអំបិល តែងតែពិនិត្យ និងព្យាបាលអ្នកជំងឺក្អក ក្តៅខ្លួន និងរាករូសជាដើម ដូច្នេះមន្ត្រីមន្ទីរពេទ្យ បានអំពាវនាវដល់ពលរដ្ឋចូលរួមថែរក្សាសុខភាព ដើម្បីចៀសឆ្ងាយពីជំងឺទាំងនេះ។

លោក ខៀវ សាវ៉ុន ប្រធានរដ្ឋបាលមន្ទីរពេទ្យបង្អែកស្រុកស្រែអំបិល បានឱ្យដឹងកាលពីថ្ងៃទី ២៨ ខែមករា ឆ្នាំ ២០២៤ ថា ប្រជាពលរដ្ឋ ត្រូវជ្រើសរើសចំណីអាហារដែលបានចម្អិនឆ្អិនល្អ និងផ្តល់នូវជីវជាតិដល់សរីរាង្គកាយ ចៀសវាងបរិភោគអាហារណាមានជាតិជូរ ផ្អែម និងប្រៃពេក។

លោក ខៀវ សាវ៉ុន អះអាងថា រៀងរាល់ឆ្នាំ មន្ទីរពេទ្យ តែងប្រទះឃើញពលរដ្ឋមានជំងឺរាករូស ក្រពះពោះវៀន ព្រមទាំងក្អកក្តៅខ្លួនកើតមានច្រើនចំពោះកុមារ និងមនុស្សធំ។ តាមរបាយការណ៍ឆ្នាំ ២០២៣ អ្នកជំងឺទូទៅជាង ២ ពាន់នាក់ បានចូលពិនិត្យ និងសម្រាកព្យាបាលនៅមន្ទីរពេទ្យបង្អែកស្រុកស្រែអំបិល។ តួលេខនេះ បានកើនប្រមាណ ១ ពាន់នាក់ ធៀបនឹងឆ្នាំ ២០២២។ ទន្ទឹមនឹងអត្រាកំណើន អ្នកជំងឺចូលពិនិត្យសម្រាកព្យាបាលនៅមន្ទីរពេទ្យ បានកើនឡើងគួរឱ្យកត់សម្គាល់ ហើយក្រុមគ្រូពេទ្យ នឹងបន្តបេសកកម្មពង្រឹងសេវាពិនិត្យព្យាបាល និងក្រមសីលធម៌វិជ្ជាជីវៈគ្រូពេទ្យឱ្យបានកាន់តែល្អប្រសើរបន្ថែមទៀត ដើម្បីទាក់ទាញទំនុកចិត្តពីប្រជាពលរដ្ឋមកលើវិស័យសុខាភិបាលក្នុងមូលដ្ឋាន។

ចំណែកអ្នកជំងឺកំពុងសម្រាកព្យាបាលជំងឺនៅមន្ទីរពេទ្យបង្អែកស្រុក យល់ស្របដែរថា គ្រូពេទ្យពិតជាបំពេញការងារផ្តល់សេវាបានល្អ ស្របតាមការណែនាំរបស់ក្រសួងសុខាភិបាល និងរដ្ឋបាលខេត្តកោះកុង លើកិច្ចលើកកម្ពស់វិស័យសុខាភិបាល។

បើតាមអ្នកជំងឺដដែល ចាប់តាំងពីកន្លែងផ្តល់សេវាព័ត៌មាន ពិគ្រោះយោបល់ជំងឺ រហូតដល់ព្យាបាលជាសះស្បើយ គឺគ្រូពេទ្យមានសម្តីសុភាពរាបសារល្អ យកចិត្តទុកដាក់ចំពោះអ្នកជំងឺ និងមិនយកកម្រៃមុនការព្យាបាលនោះទេ។ ចំពោះអ្នកបណ្ណក្រីក្រ ឬ បណ្ណ ប.ស.ស គ្រូពេទ្យកាន់តែយកចិត្តទុកដាក់ផ្តល់សេវាប្រកបដោយការទទួលខុសត្រូវ៕

អត្ថបទ ៖ សិរីវឌ្ឍនៈ