ព័ត៌មានជាតិ

សម្តេចតេជោ ចេញបទបញ្ជាបកស័ក្តិអធិការស្រុកកំរៀង ករណីនាំពលករឆ្លងដែនខុសច្បាប់ពីថៃចូលកម្ពុជាគេចពីការធ្វើចត្តាឡីស័ក

បានផុស

៤ years មុន

នៅ

ថ្ងៃចន្ទ ១៥ កុម្ភៈ ២០២១

ដោយ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញបទបញ្ជាឲ្យធ្វើការបកស័ក្តិ និងបណ្ដេញ វរសេនីយ៍ ឯក គឹម ពន្លក អធិការស្រុកកំរៀង ខេត្តបាត់ដំបង ចេញពីក្របខណ្ឌមន្ត្រីនគរបាលជាតិភ្លាម។

ក្នុងនោះផងដែរ ការចេញបទបញ្ជាដកស័ក្តិនេះ ធ្វើឡើងនារសៀលថ្ងៃទី១៥ ខែកុម្ភៈ ឆ្នាំ២០២១ ក្រោយក្រុមស្រាវជ្រាវរកឃើញថា លោកវរសេនីយ៍ ឯក គឹម ពន្លក បាននាំពលករឆ្លងដែនខុសច្បាប់ពីថៃចូលមកកម្ពុជា គេចពីការធ្វើចត្តាឡីស័ក និងជាមុខសញ្ញាផ្តល់ជំរកស្នាក់នៅដល់ពលករ ដើម្បីត្រៀមឆ្លងដែនខុសច្បាប់ពីកម្ពុជាទៅប្រទេសថៃ។

សម្តេចតេជោបានបន្ថែមទៀតថា ក្រៅពីបកស័ក្តិ និងបណ្តេញចេញពីក្របខណ្ឌ បានបញ្ជាឲ្យអភិបាលខេត្ត និងអគ្គស្នងការនគរបាលជាតិ ត្រូវបន្តចាត់ការអនុវត្តតាមផ្លូវច្បាប់ទៀត ដើម្បីផ្តន្ទាទោសជនពុករលួយរូបនេះ ដាក់ពន្ធនាគារឲ្យខានតែបាន ដើម្បីជាការព្រមានដល់ជនទាំងឡាយផ្សេងទៀត កុំឲ្យប្រព្រឹត្តទង្វើបែបនេះ។

ប្រភពព័ត៌មានបានឲ្យដឹងថា លោក គឹម ពន្លក ទទួលស្គាល់ថា ខ្លួនពិតជាបានទទួលមុខសញ្ញាមេខ្យល់នាំមនុស្សឆ្លងដែនខុសច្បាប់ ពីកម្លាំងវរៈការពារព្រំដែន-៨១៩ និងផ្តល់ជំរកស្នាក់នៅដល់ពលករ ដើម្បីត្រៀមឆ្លងដែនខុសច្បាប់ពីកម្ពុជាទៅថៃ ហើយនាំពលករឆ្លងដែនខុសច្បាប់ពីថៃចូលកម្ពុជា គេចពីការធ្វើចត្តាឡីស័ក ពិតប្រាកដមែន។

សូមបញ្ជាក់ថា នាព្រឹកថ្ងៃទី១៥ ខែកុម្ភៈ ឆ្នាំ២០២១ ស្នងការដ្ឋាននគរបាលខេត្តបាត់ដំបង បានចេញសេចក្តីសម្រេចផ្អាកការងារលោកវរសេនីយ៍ឯក គឹម ពន្លក អធិការនគរបាលស្រុកកំរៀងជាបណ្តោះអាសន្ន៕
កែសម្រួលដោយ ៖ នាគព័ន្ធ