សម្ដេច ហ៊ុន ម៉ាណែត ចង់ឃើញអ្នកជំនួញបង្វែរមកទិញសាច់ក្នុងស្រុក ហើយរៀបចំការបង្កកតាមបច្ចេកទេសវិញ  

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លើកឡើងថា ក្នុងអំឡុងពេលដែលរាជរដ្ឋាភិបាល សម្រេចផ្អាកការនាំចូលបណ្ដោះអាសន្ននូវគ្រឿងក្នុង និងបំណែកសាច់បង្កកមួយចំនួន គឺជាពេលវេលាមួយដែលអ្នកជំនួញ ធ្លាប់ទិញសាច់បង្កកនៅក្រៅប្រទេស បង្វែរមកទិញសាច់ក្នុងស្រុក ហើយរៀបចំការបង្កកតាមបច្ចេកទេស នាពេលខាងមុខ។

ការលើកឡើងនេះ ធ្វើឡើងក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងកសិកម្ម រុក្ខាប្រមាញ់និងនេសាទ នារសៀលថ្ងៃទី ៣០ ខែមករា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាល បានដាក់ចេញនូវគោលការណ៍ ផ្អាកនាំចូលនូវគ្រឿងក្នុង និងបំណែកសាច់បង្កកមួយចំនួន ជាបណ្ដោះអាសន្នរយៈពេល ៦ខែ​ ដែលចាប់ផ្ដើមអនុវត្តពីខែមីនា ឆ្នាំ ២០២៤នេះតទៅ។

សម្ដេចនាយករដ្ឋមន្ត្រី មានប្រសាសន៍បន្តថា ការអន្តរាគមន៍នេះ មិនមែនជាវិធានការដែលមានចីរភាព ដែលរាជរដ្ឋាភិបាលចង់ធ្វើគ្រប់ពេលនោះទេ។ «ប៉ុន្តែការអន្តរាគមន៍នេះ មិនមែនជាវិធានការមួយ សម្រាប់​​តែមានចីរភាព ដែលយើងចង់ធ្វើគ្រប់ពេលនោះទេ យើងត្រូវធ្វើយ៉ាងណា ដើម្បីឲ្យមានចីរភាព វិធីសាស្រ្ដយ៉ាងណា ដើម្បីធានានូវការចិញ្ចឹម​សត្វ មានភាពប្រកួតប្រជែង»។ នេះជាការថ្លែងបន្ថែមរបស់សម្ដេចធិបតី ហ៊ុន ម៉ាណែត។

ប្រមុខរាជរដ្ឋាភិបាល បាន​បន្ថែមទៀតថា នៅក្នុងអំឡុងពេលដែលរាជរដ្ឋាភិបាល ផ្អាកនាំចូលនូវគ្រឿងក្នុង និងបំណែកសាច់បង្កកមួយចំនួននោះ ក៏ជាពេលវេលាមួយធ្វើយ៉ាងណាឲ្យអ្នកជំនួញ ដែលធ្លាប់នាំចូលសាច់បង្កកពីក្រៅប្រទេស បង្វែរមកការទិញពីកសិករក្នុងស្រុកវិញ។

សម្ដេចធិបតី ហ៊ុន ម៉ាណែត លើកឡើងដែរថា «នៅក្នុងពេលដែលយើងផ្អាកការនាំចូលបណ្ដោះ​អាសន្ន នូវគ្រឿងបំណែកកកនេះ យើងធ្វើយ៉ាងណាឲ្យអ្នកទិញបំណែកកក ដែលនាំពីក្រៅនេះបង្វែរទៅភ្ជាប់ជាមួយនឹងកសិកររបស់យើង ដើម្បីអាចទិញមក ហើយគាត់យកបង្កកតាមបច្ចេកទេសចុះ ហើយពេលថ្ងៃក្រោយ ទោះបីមិនមានការដាក់ហាមឃាត់នេះ ក៏អាចបង្កើតទីផ្សារប្រព័ន្ធចរន្តមួយទៅហើយ»។

តាមសេចក្ដីប្រកាសព័ត៌មានរួម រវាងក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ១២ ខែមករា ឆ្នាំ ២០២៤កន្លងទៅ​នេះ បានបញ្ជាក់ថា វិធានការផ្អាកការនាំចូលជាបណ្តោះអាសន្ននូវគ្រឿងក្នុង និងបំណែកសាច់បង្កកមួយចំនួន នឹងចាប់ផ្ដើមអនុវត្តពីថ្ងៃទី ១២ ខែមីនា រហូត ដល់ថ្ងៃទី ១២ ខែកញ្ញា ឆ្នាំ ២០២៤។ ប្រភេទគ្រឿងក្នុង និងបំណែកសាច់បង្កកដែលផ្អាកនាំចូលរួមមាន អណ្ដាតគោ អណ្ដាតក្របីបង្កក ថ្លើម និងគ្រឿងក្នុងជ្រូក មាន់ ផ្សេងៗទៀត៕