នាយករដ្ឋមន្ត្រី ឲ្យអភិបាលខេត្តទាំង ៦ ជុំវិញបឹងទន្លេសាប សន្យាទប់ស្កាត់ការទន្ទ្រានយកដីនៅតំបន់ ៣ ឲ្យបាន

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យអភិបាលខេត្តទាំង ៦ នៅជុំវិញបឹងទន្លេសាប សន្យាចូលរួមទប់ស្កាត់ការទន្ទ្រានយកដីនៅតំបន់ ៣ ឲ្យបាន ហើយអ្នកដែលចាប់អារម្មណ៍ដីនៅតំបន់អភិរក្សនោះ ត្រូវដកខ្លួនចេញជាបន្ទាន់។

ការឲ្យសន្យាបែបនេះ​ ធ្វើឡើងក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងកសិកម្ម រុក្ខាប្រមាញ់និងនេសាទ នារសៀលថ្ងៃទី ៣០ ខែមករា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត បានណែនាំដល់អាជ្ញាធរមានសមត្ថកិច្ចថា ការការពារដីអភិរក្សតំបន់បឹងទន្លេសាប ពិសេសនៅតំបន់ ៣ គឺត្រូវអនុវត្តឲ្យបានម៉ត់ចត់ ហើយសម្ដេចមិនចង់ប្រើអភិក្រមទី ៥ គឺវះកាត់នោះទេ។

សម្ដេចធិបតី ហ៊ុន ម៉ាណែត បានថ្លែងថា «ខ្ញុំសង្ឃឹមថា អភិក្រម ៤ នឹងត្រូវបានប្រើ អភិក្រមទាំង ៥ ខ្ញុំមិនចង់ប្រើអំណាច​ចុងប៉ិចទេ តែបើបង្ខំខ្ញុំ ខ្ញុំត្រូវតែប្រើហើយ ការទទួលខុសត្រូវដឹកនាំរដ្ឋបាល បើគ្មានវិន័យក្នុងរដ្ឋបាលធ្វើការងារអីមិនចេញទេ ខ្ញុំនិយាយឲ្យច្បាស់ចឹងម៉ង ខ្ញុំអត់សូវចេះមាត់ទេ ប៉ុនដៃខ្ញុំចេះស៊ីញ៉េ»។

សម្ដេចនាយករដ្ឋមន្ត្រី បានដាក់បទបញ្ជាឲ្យអភិបាលខេត្តទាំង ៦ ជុំវិញបឹងទន្លេសាប ត្រូវមានភារកិច្ចដឹកនាំរួម ក្នុងការការពារដីអភិរក្សតំបន់បឹងទន្លេសាប ជាពិសេសនៅតំបន់ ៣។ ចំណែកអ្នកដែលចង់បានដីនៅតំបន់អភិរក្សទាំងនោះ ត្រូវដកខ្លួនចេញជាបន្ទាន់ មុននឹងត្រូវអនុវត្តច្បាប់។

សម្ដេចធិបតី ហ៊ុន ម៉ាណែត បានបន្ថែមថា «ចឹងខ្ញុំសង្ឃឹមថា បងប្អូនដែលចាប់អារម្មណ៍ទៅលើដី កន្លែងតំ​បន់ ៣នោះ សូមម្ចាស់ការដកថយ មុននឹងត្រូវការអនុវត្តច្បាប់ ព្រោះការប្ដេជ្ញាចិត្តរបស់រាជរដ្ឋាភិបាល គឺត្រូវធ្វើឲ្យបាន ត្រូវការពារឲ្យបាន ចឹងឯកឧត្ដមទាំង ៦ខេត្ត សន្យាជាមួយខ្ញុំចូលរួម ដើម្បីអនុវត្តទប់ស្កាត់ការទន្ទ្រានតំបន់ ៣នេះឲ្យបាន»៕