រដ្ឋសភា ផ្ដើមដំណើរការនីតិវិធីជ្រើសតាំងសមាជិកព្រឹទ្ធសភានីតិកាលទី ៥ ចំនួន ២ រូប

នា​ព្រឹក​ថ្ងៃ​ទី ៣១ ខែ​មករា ឆ្នាំ ២០២៤ នេះ សម្ដេច​មហា​រដ្ឋសភា​ធិការ​ធិបតី ឃួន សុដារី ប្រធានរដ្ឋសភា បាន​ដឹកនាំ​កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា នៅ​ឯ​វិមាន​រដ្ឋសភា។

កិច្ចប្រជុំ​គណៈកម្មាធិការ​នា​ពេលនេះ បាន​អនុម័ត​លើ​គោលការណ៍ នៃ​ការ​ជ្រើសតាំង​សមាជិក​ព្រឹទ្ធសភា​សម្រាប់​នីតិកាល​ទី ៥ ចំនួន ២ រូប ដោយ​បាន​ប្រគល់​ភារកិច្ច​ជូន​អគ្គលេខាធិការដ្ឋាន​រដ្ឋសភា រៀបចំ​សេចក្ដីជូនដំណឹង​ជ្រើសរើស​ឥស្សរជន ដែល​មាន​លក្ខណៈសម្បត្តិ​សមស្រប ហើយ​ធ្វើ​របាយការណ៍​ជូន​គណៈកម្មាធិការ​អចិន្ត្រៃយ៍​រដ្ឋសភា​វិញ ដើម្បី​បន្ត​នីតិវិធី។

គួរ​ជម្រាប​ថា ក្នុង​ចំណោម​សមាជិក​ព្រឹទ្ធសភា​ចំនួន ៦២ រូប ក្រៅពី​ការ​បោះឆ្នោត​ជ្រើសតាំង តាមរយៈ​ការ​បោះឆ្នោត​ជា​អ​សកល សមាជិក​ព្រឹទ្ធសភា ២ រូប ត្រូវ​ចាត់​តាំង​ដោយ​ព្រះមហាក្សត្រ និង ២ រូប​ទៀត ជ្រើសតាំង​ដោយ​រដ្ឋសភា តាម​មតិ​ភាគច្រើន​ដោយ​ប្រៀប។

សូម​ជម្រាប​ជូន​ថា ព្រះរាជាណាចក្រ​កម្ពុជា នឹង​រៀបចំ​បោះឆ្នោត​ជ្រើសតាំង​សមាជិក​ព្រឹទ្ធសភា​នីតិកាល​ទី ៥ នៅ​ថ្ងៃ​ទី ២៥ ខែ​កុម្ភៈ ឆ្នាំ ២០២៤ ខាងមុខ៕