ព័ត៌មានជាតិ

វិទ្យាស្ថានជាតិពហុបច្ចេកទេសកម្ពុជា រៀបចំកម្មវិធីបោះជំរំ ក្រោមប្រធានបទ «យុវជនក្រោមដំបូលសន្តិភាព»

បានផុស

១០ ខែ មុន

នៅ

ថ្ងៃព្រហស្បតិ៍ ១ កុម្ភៈ ២០២៤

ដោយ

វិទ្យាស្ថានជាតិពហុបច្ចេកទេសកម្ពុជា បាននិងកំពុងរៀបចំកម្មវិធីបោះជំរំលើកទី ៧ ក្រោមប្រធានបទ«យុវជនក្រោមដំបូលសន្តិភាព» រយៈពេល ៣ ថ្ងៃ ចាប់ពីថ្ងៃទី ១ កុម្ភៈ រហូតដល់ថ្ងៃទី ៣ កុម្ភៈ ឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមវិទ្យាស្ថានជាតិពហុបច្ចេកទេសកម្ពុជា កម្មវិធីបោះជំរំរយៈពេល ៣ ថ្ងៃនេះ កំពុងរៀបចំធ្វើឡើងនៅទីតាំងបរិវេណវិទ្យាស្ថានផ្ទាល់ដែលមានការចូលរួមពីមន្ត្រីរាជការ សាស្ត្រាចារ្យ បុគ្គលិក និងនិស្សិត ព្រមទាំងសាស្ត្រាចារ្យ និងនិស្សិតដែលចូលរួមពីវិទ្យាស្ថានផ្សេងៗ ទូទាំងគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ នៅក្នុងព្រះរាជាណាចក្រកម្ពុជា មានចំនួនសរុប ៣២២ នាក់។

កម្មវិធីបោះជំរំរយៈពេល ៣ ថ្ងៃ ក្រោមប្រធានបទ យុវជនក្រោមដំបូលសន្តិភាព គឺជាមួយផ្នែក នៃការប្រមូលផ្ដុំយុវជនកម្ពុជាដែលជាអនាគតបញ្ញវន្តបច្ចេកវិទ្យា និងជាធនធានកម្ររបស់ជាតិ ដើម្បីសិក្សាពីរបៀប នៃការបង្កើតជាក្រុម របៀបធ្វើការជាមួយក្រុម និងរបៀបរស់នៅជាមួយគ្នា។

ក្នុងរយៈពេល ៣ ថ្ងៃនេះ នៅក្នុងជំរំ សមាជិកក្នុងជំរំ នឹងមានឱកាសប្រាស្រ័យទាក់ទងគ្នា បង្កើតជាបណ្ដាញទំនាក់ទំនងរវាងគ្នា និងគ្នា ទៅថ្ងៃអនាគត មានឱកាសលត់ដំ និងបន្សាំខ្លួនជាមួយគ្រប់ស្ថានភាពរស់នៅប្រចាំថ្ងៃតាមរយៈការគិតពិចារណាគ្រប់ជ្រុងជ្រោយមានតម្លៃជារូបិយផង និងអរូបិយផង ជាពិសេសមហាសាមគ្គីរបស់អនាគតបញ្ញវន្តដែលនឹងក្លាយជាទំពាំងស្នងឫស្សីប្រកបដោយស្មារតីស្នេហាជាតិមាតុភូមិ និងក្លាយជាកម្លាំងចលករយ៉ាងសកម្មក្នុងចលនាកសាង និងការពារជាតិមាតុភូមិមិនអាចឱ្យសត្រូវពីខាងក្រៅប្រមាថបានឡើយ។

បើតាមវិទ្យាស្ថាន ការបោះជំរំនេះបានធ្វើឡើងចំនួន ៧ លើក រួចមកហើយ គិតចាប់តាំងពីឆ្នាំ ២០២៤ ពោលគឺជំនាន់ទី ១ នៅឆ្នាំ ២០០៦ ជំនាន់ទី ២ នៅឆ្នាំ ២០០៨ ជំនាន់ទី ៣ នៅឆ្នាំ ២០១១ ជំនាន់ទី ៤ នៅឆ្នាំ ២០១៤ ជំនាន់ ៥ នៅឆ្នាំ ២០១៧ ជំនាន់ទី ៦ នៅឆ្នាំ ២០១៩ និងជំនាន់ទី ៧ នៅឆ្នាំ ២០២៤ នេះ ដែលកម្មវិធីកំពុងតែដំណើរការ៕