អ្នកនាំពាក្យ៖ការចាប់ខ្លួនសកម្មជនបក្សភ្លើងទៀន គឺអនុវត្តន៍នីតិវិធីព្រហ្មទណ្ឌ មិនមែនគម្រាមអ្នកនយោបាយឡើយ

នៅល្ងាចថ្ងៃទី១ ខែកុម្ភៈ នេះ អ្នកនាំពាក្យស្នងការដ្ឋាននគរបាលរាជធានីភ្នំពេញ បានឆ្លើយតបថា ការចាប់ខ្លួនសកម្មជនគណបក្សភ្លើងទៀន២រូប គឺអនុវត្តន៍ស្របតាមក្រមនីតិវិធីព្រហ្មទណ្ឌ មិនមែនជាការចាប់ខ្លួនដើម្បីគម្រាមកំហែង ធ្វើទុក្ខបុកម្នេញសកម្មជនគណបក្សនយោបាយណាមួយឡើយ។ អ្នកនាំពាក្យបានឆ្លើយតបបែបនេះ បន្ទាប់ពីសមត្ថកិច្ចឃាត់បុរសពីររូប ហើយត្រូវបានបក្សភ្លើងទៀន ចោទថាការឃាត់ខ្លួននេះ ជាការគម្រាមកំហែងអ្នកនយោបាយ។

កាលពីថ្ងៃទី៣១ ខែមករា សមត្ថកិច្ចបានអនុវត្តន៍តាមដីការបង្គាប់ឱ្យនាំខ្លួនរបស់ចៅក្រម ចាប់ខ្លួនបុរសឈ្មោះ ម៉ា ចិន្ដា និងឈ្មោះ ហាក់ កុសល។ ការឃាត់ខ្លួននេះ អ្នកនាំពាក្យស្នងការដ្ឋានបានឱ្យដឹងថា ដោយសារបុគ្គលទាំងពីរនេះ ជាប់ពាក់ព័ន្ធនឹងករណីក្លែងបន្លំ និងប្រើប្រាស់លិខិតក្លែងក្លាយ ប្រព្រឹត្តនៅរាជធានីភ្នំពេញ កាលពីអំឡុងខែវិច្ឋិកា ឆ្នាំ២០២៣។

អ្នកនាំពាក្យ ក៏បានបដិសេធ និងច្រានចោលការចោទប្រកាន់ដោយបំពានទាំងស្រុង ដោយគ្មានមូលដ្ឋានច្បាស់លាស់របស់គណបក្សភ្លើងទៀន៕

ដោយ៖ ង៉ិល ណារ៉ាត់